ଜମି ପାଇଁ ପ୍ରମୋଦଙ୍କ ଜୀବନ ଗଲା
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଖଣ୍ଡପଡ଼ା ଥାନା ଅନ୍ତର୍ଗତ ବେଣାଗାଡ଼ିଆରେ ଆଜି ବାପ ଓ ପୁଅଙ୍କ ଟାଙ୍ଗୀଆ ଚୋଟରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି । ଜମିବାଡିକୁ କେନ୍ଦ୍ର କରି ହୋଇଥିବା ଏହି ଆକ୍ରମଣରେ ବେଣାଗାଡ଼ିଆ ଗ୍ରାମର ପ୍ରମୋଦ ଦାସ(୫୧)ଙ୍କ ମୃତ୍ୟୁ ଘଟିଛି । ସୂଚନାନୁସାରେ, ଦୀର୍ଘ ବର୍ଷ ଧରି ଜମିବାଡିକୁ କେନ୍ଦ୍ର କରି ମୃତ ପ୍ରମୋଦ ଏବଂ ତାଙ୍କ ସଂପର୍କୀୟ ମାନଙ୍କ ମଧ୍ୟରେ ବିବାଦ ଲାଗି ରହିଥିଲା । ଶନିବାର ସନ୍ଧ୍ୟା ପ୍ରାୟ ୮.୪୫ମିନିଟିରେ ପ୍ରମୋଦ ବେଣାଗାଡିଆ ବଜାରରେ ଛିଡା ହୋଇଥିବା ବେଳେ ହଠାତ୍ ସେଠାରେ ବେଣାଗାଡିଆ ପଂଚାୟତ ଅଧିନ କାଦୁଆ ଗ୍ରାମର ରମା ବେହେରା, ତାର ପୁଅ ଶିବ ଓ ୨ଜଣ ସହଯୋଗୀ ସେଠାରେ ପହଁଚିଥିଲେ । ରମା ବେହେରା ଏକ ଟାଙ୍ଗିଆ ସହାୟତାରେ ହଠାତ୍ ପ୍ରମୋଦଙ୍କୁ ଆକ୍ରମଣ କରିଥିବାରୁ ସେ ଘଟଣାସ୍ଥଳରେ ଚେତାଶୁନ୍ୟ ହୋଇ ତଳେ ଖସି ପଡିଥିଲେ । ଘଟଣାସ୍ଥଳରେ ହିଁ ପ୍ରମୋଦଙ୍କର ମୃତ୍ୟୁ ହୋଇଥିବା ପ୍ରତ୍ୟେକ୍ଷଦର୍ଶୀଙ୍କଠାରୁ ପ୍ରକାଶ । ଖବରପାଇ ଖଣ୍ଡପଡା ପୁଲିସ ଘଟଣାସ୍ଥଳରେ ପହଁଚି ଶବକୁ ଜବତ କରି ବ୍ୟବଚ୍ଛେଦ ନିମନ୍ତେ ଖଣ୍ଡପଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇଥିବା ବେଳେ ଏ ନେଇ ଘଟଣାର ଖୋଳ ତାଡ଼କରୁଥିବା ଜଣାଯାଇଛି । ଅଭିଯୁକ୍ତମାନେ ଏଭଳି କାଣ୍ଡ ଘଟାଇ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାଯାଇଛି । ତେବେ ରିପୋର୍ଟ ଲେଖାହେବା ପର୍ଯ୍ୟନ୍ତ ଉପରୋକ୍ତ ଘଟଣାକୁ ନେଇ ଖଣ୍ଡପଡା ଥାନାରେ କୈାଣସି ଲିଖିତ ଅଭିଯୋଗ ହୋଇ ନଥିବା ଖଣ୍ଡପଡା ଥାନା ସୁତ୍ରରୁ ପ୍ରକାଶ ।
