ବସ ଧକ୍କାରେ ଜଣେ ମୃତ୍ୟୁ, ଡ୍ରାଇଭର ଗିରଫ

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଦଶପଲ୍ଲା ଥାନା ଅନ୍ତର୍ଗତ ବଲାଙ୍ଗୀର ୫୭ ନମ୍ବର ଜାତୀୟ ରାଜପଥର ସ୍ଥାନୀୟ ଟାକରା ନିକଟସ୍ଥ ଗୋପାଳପୁର ଠାରେ ଗତକାଲି ରାତିରେ ଏକ ବସ୍ ଧକ୍କାରେ ଜଣେ ପଥଚାରୀଙ୍କ ମୃତ୍ୟୁ ହୋଇଛି । ମୃତ ବ୍ୟକ୍ତି ଜଣଙ୍କ ହେଲେ ମକର ପ୍ରସାଦ ଗ୍ରାମର ମାଧବ ନାୟକ । ସୂଚନାନୁସାରେ, ରାତି ପ୍ରାୟ ସାଢେ ୯ଟାରେ ମାଧବ ଟାକରା ଠାରେ ନିଜ ବାଇକକୁ ରଖି ଗୋପାଳପୁର ନିକଟକୁ ଚାଲିଚାଲି ଯାଉଥିଲେ । ଏହି ସମୟରେ ଦଶପଲ୍ଲା ଅଭିମୁଖେ ଆସୁଥିବା ଶାରଳା ନାମକ (ଓଡି ୦୨ ଏପି ୮୧୯୯) ଏକ ବସ ଧକ୍କାଦେଇ ପଳାଇ ଆସିଥିଲା । ଯାହାକୁ ନେଇ ଘଟଣାସ୍ଥଳରେ ମାଧବଙ୍କ ମୃତ୍ୟୁ ହୋଇଥିଲା । ଖବରପାଇ ଦଶପଲ୍ଲା ଥାନା ଅଧିକାରୀ ବିଶ୍ୱଜିତ୍ ରାଉତରାୟ ଦୁର୍ଘଟଣା ଘଟାଇଥିବା ଗାଡି ଏବଂ ଡ୍ରାଇଭରକୁ ଅଟକ ରଖିଥିବା ବେଳେ ଆଜି ପୂର୍ବାହ୍ନରେ ଶବ ବ୍ୟବଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ଦୁର୍ଘଟଣା ଘଟାଇ ଥିବା ବସ ଡ୍ରାଇଭର ତଥା ସ୍ଥାନୀୟ ଶିମିଳିସାହି ଗ୍ରାମର କାର୍ତ୍ତିକେଶ୍ୱର ପ୍ରଧାନ(୩୮)ଙ୍କୁ ଗିରଫ କରି ପୁଲିସ କୋର୍ଟ ଚାଲାଣ କରିଛି ।