ଡାକ୍ତର ରହୁନଥିବାରୁ ରାସ୍ତାରେ ବସିଲେ ଗ୍ରାମବାସୀ

ବଡ଼ପଣ୍ଡୁସର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ବଡ଼ପଣ୍ଡୁସର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ନାନାଦି ଅବ୍ୟବସ୍ଥା ମଧ୍ୟରେ ଗତି କରୁଛି । ଡାକ୍ତରମାନେ ରହୁନଥିବା ଏବଂ ନିୟମିତ ଆସୁନଥିବା ଅଭିଯୋଗ କରି ଗ୍ରାମବାସୀ ଡାକ୍ତରଖାନା ଘେରାର କରିଛନ୍ତି । ସୂଚନାନୁସାରେ, କିଛିଦିନ ତଳେ ବଡ଼ପଣ୍ଡୁସର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଅବ୍ୟବସ୍ଥାକୁ ନେଇ ଲୋକମାନେ ତାତିଥିବା ବେଳେ ଆଜି ପୁଣିଥରେ ବଡ଼ପଣ୍ଡୁସରରେ ସମାନ ଅବସ୍ଥା ଦେଖିବାକୁ ମିଳିଛି । ବଡ଼ପଣ୍ଡୁସର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ୯ଜଣ ଡାକ୍ତରଙ୍କ ଆବଶ୍ୟକତା ରହିଥିବା ବେଳେ ସରକାରଙ୍କ ତରଫରୁ ୫ ଜଣ ଡାକ୍ତର ନିଯୁକ୍ତ ହୋଇଛନ୍ତି । ସେମାନଙ୍କ ମଧ୍ୟରୁ ୩ଜଣ ଡାକ୍ତର ନିୟମିତ ଆସୁନଥିବା ଅଭିଯୋଗ ହୋଇଛି । ଆଜି ଜଣେ ଶ୍ୱାସ ରୋଗୀ ଏଠାକୁ ଆସି ଡାକ୍ତରଙ୍କୁ ନଥିବା ଦେଖି କର୍ମଚାରୀଙ୍କୁ ଏନେଇ ପଚାରିଥିଲେ । ମାତ୍ର କର୍ମଚାରୀମାନେ ତାଙ୍କୁ ଦୁର୍ବବ୍ୟବହାର କରିବାରୁ ସେ ଏହାକୁ ବିରୋଧ କରିଥିଲେ । ଏହି ଘଟଣାକୁ କେନ୍ଦ୍ରକରି ବଡ଼ପଣ୍ଡୁସର ଗ୍ରାମବାସୀ ଖୋର୍ଦ୍ଧା ବଲାଙ୍ଗିରୀ ଜାତୀୟ ରାଜପଥକୁ ସଂନ୍ଧ୍ୟାରେ ଅବରୋଧ କରିଛନ୍ତି । ଇଟାମାଟି ପୁଲିସ ଘଟଣାସ୍ଥଳରେ ପଂହଚି ବୁଝାଶୁଝା କରିବା ପରେ ରାସ୍ତାରୋକ ହଟିଛି ।