ଭୁବନେଶ୍ୱର, (ବାଘୁଆବାର୍ତ୍ତା): ରାଜଧାନୀରେ ଆସିକାର ପୂର୍ବତନ ବିଧାୟକ ସରୋଜ ପାଢ଼ି ନିଖୋଜର ୪ ଦିନ ପରେ ଭାରତୀୟ ବାୟୁସେନାର ଜଣେ ପୂର୍ବତନ ଅଧିକାରୀଙ୍କ ନିଖୋଜ ଖବର ସାମ୍ନାକୁ ଆସିଛି । ଭେଟେରାନ୍ ଜଣକ ହେଲେ ହେଲେ ଅଜିତ କୁମାର ଖୁଣ୍ଟିଆ(୫୮) । ଏନେଇ ନୂଆପଲ୍ଲୀ ଥାନାରେ ନିଖୋଜ ଅଭିଯୋଗ ହୋଇଛି । ସୂଚନା ମୁତାବକ, ବେହେରା ସାହି ଦମୟନ୍ତୀ ଆପାର୍ଟମେଣ୍ଟରେ ଅଜିତ୍ ରହୁଛନ୍ତି । ମଙ୍ଗଳବାର ସନ୍ଧ୍ୟା ସାଢ଼େ ୫ଟା ବେଳୁ ଅଜିତ୍ ଘରୁ କେଉଁଆଡେ ପଳାଇଛନ୍ତି । ପରିବାର ଲୋକ ତାଙ୍କୁ ଅନେକ ଖୋଜାଖୋଜି କରିବା ସତ୍ତେ୍ୱ ତାଙ୍କର ପତ୍ତା ମିଳିନାହିଁ । ଗୁରୁବାର ପତ୍ନୀ ବିଜୟୀଲକ୍ଷ୍ମୀ ନାୟକ ଏନେଇ ଥାନାରେ ଅଭିଯୋଗ କରିଥିଲେ । ପୁଲିସ ଏକ ନିଖୋଜ ମାମଲା ରୁଜୁ କରି ଆପାର୍ଟମେଣ୍ଟରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରିବା ସହ ପୁଲିସ ତାଙ୍କ ପରିବାର ଲୋକ ଓ ସମ୍ପର୍କୀୟଙ୍କୁ ପଚରାଉଚରା କରୁଛି । ସୂଚନା ଅନୁଯାୟୀ, ଅଜିତ୍ ଘରୁ ଯିବା ବେଳେ ସାଙ୍ଗରେ ମୋବାଇଲ ନେଇନଥିଲେ । ଏମିତିକି ସେ ପିନ୍ଧିଥିବା ସୁନା ମୁଦି ଓ ଚେନ୍ ମଧ୍ୟ ଘରେ ରଖିଦେଇ ଯାଇଥିଲେ । ସେପଟେ ସମାନ ଢ଼ଙ୍ଗରେ ପୂର୍ବତନ ବିଧାୟକ ମଧ୍ୟ ମୋବାଇଲ୍ ଫୋନ୍ ସହ ସୁନା ମୁଦି ଓ ସୁନା ଚେନ୍ ଘରେ ରଖି କେଉଁଆଡ଼େ ପଳାଇଥିବା ପୁଲିସ କହୁଛି । କିଡ୍ନାପିଂ ଓ ମ୍ୟାନ୍ ମିସିଂ ସେଲ୍ ଏହି ୨ଟି ମାମଲାରେ ସାମଞ୍ଜସ୍ୟକୁ ନେଇ ତଦନ୍ତ ଚଳାଇଛି ।
ବାୟୁସେନା ପୂର୍ବ ଅଧିକାରୀ ନିଖୋଜ
