ସାପ୍ତାହିକ ହାଟରେ ବ୍ୟାନର ମାରିଲେ ମାଓବାଦୀ, ମେ ୨୦ରେ ବନ୍ଦ ଡାକରା

ପାଟଣାଗଡ଼, (ବାଘୁଆବାର୍ତ୍ତା): ବହୁ ଦିନର ନୀରବତା ପରେ ବ୍ୟାନର ମାରିଲେ ମାଓବାଦୀ। ପାଟଣାଗଡ ଉପଖଣ୍ଡ ଖପ୍ରାଖୋଲ ବ୍ଲକ ଲାଠୋର ଥାନା ଅନ୍ତର୍ଗତ ପୁଟୁକେଲଚୁଆ ଓ ଘୁନୁସର ମଝିରେ ଥିବା ବଜାର ପେଣ୍ଡାଲ ଠାରେ ପୃଥକ ପୃଥକ ସ୍ଥାନରେ ଦୁଇଟି ମାଓ ବ୍ୟାନର ଲାଗିଛି। ରବିବାର ଦିନ ଘୁନୁସର ବଜାର ହୋଇଥିବା ବେଳେ ବଜାରକୁ ଆସିଥିବା ବ୍ୟବସାୟୀ ଓ ଜନସାଧାରଣ ଏହି ବ୍ୟାନର ଦେଖିଥିଲେ। ପୋଲିସ ଦମନ ବିରୋଧରେ ମେ ୨୦ ତାରିଖ ଏକ ଦିନ ଓଡ଼ିଶା ରାଜ୍ୟ ବନ୍ଦ ସଫଳ କରିବାକୁ ମାଓବାଦୀମାନେ ବ୍ୟାନରରେ ଆହ୍ଵାନ କରିଛନ୍ତି। ସୂଚନାନୁଯାୟୀ, ଗତ ଦୁଇ ବର୍ଷ ଭିତରେ ବର୍ବରତା ପୂର୍ବକ ପୁଲିସର ଗୁଳିବର୍ଷଣରେ ୨୦ ଜଣ ମାଓବାଦୀଙ୍କ ହତ୍ୟା କରାଯାଇଛି। ଏଥିପାଇଁ ମାଓବାଦୀମାନେ ମେ ୨୦ ତାରିଖ ଦିନ ଓଡ଼ିଶା ବନ୍ଦ ଡାକରା ଦିଆଯାଇଛି। ଏହି ବ୍ୟାନରରେ ଉଲ୍ଲେଖ କରାଯାଇଛି ଯେ, ରାଜନୈତିକ ସମାଧାନ ଦମନ ଅଭିଯାନ ନାମରେ ଦେଶ ଭିତରେ ଜନତା ଉପରେ ସରକାରଙ୍କ ଯୁଦ୍ଧକୁ ବିରୋଧ କରନ୍ତୁ । ଦେଶରୁ ସମ୍ମତି ଦବାଇବା ଲାଗି, ହିନ୍ଦୁତ୍ଵ, ଫାସିବାଦ ସରକାର ଦ୍ଵାରା ଚାଲଯାଉଥିବା ଦମନ ଅଭିଯାନକୁ ବିରୋଧ କରନ୍ତୁ । ତେବେ ମାଓ ବ୍ୟାନର ଲାଗିଥିବା ସ୍ଥାନରେ ଲୋକମାନେ ଭୟଭୀତ ନହୋଇ ବ୍ୟବସାୟ କରୁଥିବା ଦେଖିବାକୁ ମିଳିଛି। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଏହି ବ୍ୟାନର ଦୁଇଟିକୁ ଜବତ କରିଛି।