ଭୁବନେଶ୍ୱର, (ବାଘୁଆବାର୍ତ୍ତା): ରାଜ୍ୟରେ ୧ ଲକ୍ଷ ୪ ହଜାର ୨୭୨ ପିଲା ଅଧାରୁ ପାଠ ଛାଡ଼ିଛନ୍ତି । ଏହି ସବୁ ପିଲାଙ୍କୁ ପୁଣିଥରେ ସ୍କୁଲ ଫେରାଇ ଆଣିବାକୁ ରୋଡମ୍ୟାପ୍ ପ୍ରସ୍ତୁତ କରିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ । ଯଥାଶୀଘ୍ର ଏହି ପିଲାମାନେ କିଭଳି ପୁଣି ପାଠ ପଢ଼ିବେ ସେନେଇ ଷ୍ଟ୍ରାଟେଜି ତିଆରି ହୋଇଛି । ସମସ୍ତ ଛାତ୍ରଛାତ୍ରୀ ଯେଭଳି ପୁଣି ସ୍କୁଲ ଫେରିବେ ଆଉ ପାଠପଢ଼ିବେ ସେଥିପାଇଁ ବ୍ୟବସ୍ଥା କରିବାକୁ ସବୁ ଜିଲ୍ଲାପାଳଙ୍କୁ ଚିଠି ଲେଖିଛନ୍ତି ବିଦ୍ୟାଳୟ ଓ ଗଣଶିକ୍ଷା ସଚିବ ବିଷ୍ଣୁପଦ ସେଠୀ । ସଚିବ ଚିନ୍ତାପ୍ରକଟ କରି କହିଛନ୍ତି, କୋଭିଡ୍ ପାଇଁ ଦୁଇ ଶିକ୍ଷାବର୍ଷ ବରବାଦ୍ ହେଲା । ସ୍ଥିତିରେ ସୁଧାର ଆସିବା ପରେ ଶିକ୍ଷାକୁ ପୁଣିଥରେ ଟ୍ରାକ୍କୁ ଫେରାଇବାକୁ ସରକାର ବ୍ୟବସ୍ଥା କରୁଛନ୍ତି । କିନ୍ତୁ ୭୦ ପ୍ରତିଶତ ପିଲା ସ୍କୁଲ ଆସୁଛନ୍ତି । ଆହୁରି ୩୦ ପ୍ରତିଶତ ପିଲା ଆଦୌ ସ୍କୁଲ ଆସୁନାହାନ୍ତି । ବିଶେଷକରି ମାଲକାନଗିରି, ବୌଦ୍ଧ, ଗଜପତି, ସମ୍ବଲପୁର, ନୂଆପଡ଼ା ଜିଲ୍ଲାରେ ପ୍ରଥମରୁ ଅଷ୍ଟମ ଶ୍ରେଣୀ ପିଲାଙ୍କ ଉପସ୍ଥାନ ରାଜ୍ୟ ହାରଠୁ ବହୁତ କମ୍ ରହିଛି । ସେହିଭଳି ଗଜପତି, ବଲାଙ୍ଗୀର, ବରଗଡ଼, ସୋନପୁର, ନୂଆପଡ଼ା, କଟକ, ଖୋର୍ଦ୍ଧା, କୋରାପୁଟ, ଗଞ୍ଜାମ, ବୌଦ୍ଧ, ମାଲକାନଗିରି, କେନ୍ଦୁଝର, ସମ୍ବଲପୁର ଜିଲ୍ଲାରେ ନବମ ଓ ଦଶମ ପିଲାଙ୍କ ଉପସ୍ଥାନ ନୈରାଶ୍ୟଜନକ ରହିଛି । ଉଚ୍ଚ ମାଧ୍ୟମିକ (ଏକାଦଶ ଓ ଦ୍ୱାଦଶ) ଶ୍ରେଣୀରେ ମଧ୍ୟ ଗଜପତି, ସୋନପୁର, ବରଗଡ଼, କନ୍ଧମାଳ ଓ ନୂଆପଡ଼ା ଜିଲ୍ଲାରେ ବହୁତ ସଂଖ୍ୟକ ପିଲା ସ୍କୁଲ ଆସୁନାହାନ୍ତି । ଏହି ପିଲାଙ୍କୁ କିଭଳି ସ୍କୁଲ ଅଣାଯିବ ତାହାହିଁ ସବୁଠୁ ଗୁରୁତ୍ୱପୂର୍ଣ୍ଣ ବିଷୟ । ଜିଲ୍ଲାପାଳଙ୍କୁ ସଚିବ ଶ୍ରୀ ସେଠୀ କହିଛନ୍ତି, ସବୁ ସ୍କୁଲ ସ୍ତରରେ ଏକ ସର୍ଭେ କରାଯାଇ କେଉଁ ପିଲା ଆସୁନାହାନ୍ତି ତାହାର ତାଲିକା ତିଆରି କରାଯିବ । ସ୍କୁଲର କନିଷ୍ଠ ଶିକ୍ଷକଙ୍କୁ ପିଲାମାନଙ୍କ ଘରକୁ ଯାଇ ସ୍କୁଲ ନଆସିବାର କାରଣ ବୁଝିବା ସହ ସେମାନଙ୍କୁ ପୁଣି ସ୍କୁଲ ଫେରାଇ ଆଣିବା ପାଇଁ ଛାତ୍ରଛାତ୍ରୀ ଓ ଅଭିଭାବକଙ୍କୁ ବୁଝାଇବେ । ମଧ୍ୟାହ୍ନଭୋଜନ, ମାଗଣା ବହି, ବାଇସାଇକେଲ୍, ପୋଷାକ ଆଦି ବିଷୟରେ ଅଭିଭାବକଙ୍କୁ ବୁଝାଇବେ । ଯଦି ଆବଶ୍ୟକ ପଡ଼େ ତେବେ ପିଲାଙ୍କୁ ଫେରାଇ ଆଣିବା ଲାଗି ସ୍କୁଲ ପରିଚାଳନା କମିଟି (ଏସ୍ଏମ୍ସି), ଏସ୍ଏମ୍ଡିସି, ପିଆର୍ଆଇଏସ୍, ଡବ୍ଲ୍ୟୁଏସ୍ଏଚ୍ଜିଏସ୍ ଓ ଆଞ୍ଚଳିକ ଲୋକମାନଙ୍କ ସହାୟତାରେ ବିଭିନ୍ନ ପଦକ୍ଷେପ ନିଆଯିବ ବୋଲି ସଚିବ ଜିଲ୍ଲାପାଳଙ୍କୁ କହିଛନ୍ତି । ୨୦୨୧ ସର୍ଭେ ଅନୁସାରେ ରାଜ୍ୟରେ ୧.୦୪ ଲକ୍ଷ ପିଲା ଅଧାରୁ ପାଠ ଛାଡ଼ିଛନ୍ତି । ଏମାନଙ୍କ ମଧ୍ୟରୁ ସର୍ବାଧିକ ୬୫ ହଜାର ୯୦୪ ଜଣ ପିଲା ୧୬ରୁ ୧୮ ବର୍ଷ ବୟସର ଅଛନ୍ତି । ସେହିପରି ୬ରୁ ୧୦ ବର୍ଷ ବୟସରେ ଅଛନ୍ତି ୩ ହଜାର ୨୪ ଛାତ୍ରଛାତ୍ରୀ । ୧୧ରୁ ୧୩ ବର୍ଷ ବୟସରେ ୯୯୧୫ ଜଣ ପାଠ ଛାଡ଼ିଥିବାବେଳେ ୧୪-୧୫ ବର୍ଷର ୨୫ ହଜାର ୪୨୯ ଜଣ ପିଲା ଆଉ ସ୍କୁଲ ଆସୁନାହାନ୍ତି ।
ପିଲାଙ୍କୁ ସ୍କୁଲ ଫେରାଇ ଆଣିବାକୁ ଗଣଶିକ୍ଷା ବିଭାଗର ରୋଡ୍ମ୍ୟାପ୍, ଜିଲ୍ଲାପାଳ ମାନଙ୍କୁ ଚିଠି
