ପ୍ରଜାମଣ୍ଡଳ ମହିଳା ମହାବିଦ୍ୟାଳୟ ୩୯ ତମ ବାର୍ଷିକ ଉତ୍ସବ
ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ପ୍ରଜାମଣ୍ଡଳ ମହିଳା ମହାବିଦ୍ୟାଳୟର ଗୋଲାପ ରାଣୀ ଛାତ୍ରୀନିବାସ ପକ୍ଷରୁ ୩୯ ତମ ବାର୍ଷିକ ଉତ୍ସବ ଦ୍ୱିତୀୟ ସଂନ୍ଧ୍ୟାରେ ମୁଖ୍ୟ ଅତିଥି ଭାବେ ମନ୍ତ୍ରୀ ଡ. ଅରୁଣ କୁମାର ସାହୁ ଯୋଗ ଦେଇଥିଲେ । କାର୍ଯ୍ୟକ୍ରମରେ ମୁଖ୍ୟ ବକ୍ତା ଭାବେ ଆରକ୍ଷୀ ଅଧିକ୍ଷକ ଶଶୀଭୂଷଣ ଶତପଥୀ ଯୋଗଦେଇ ଏଠାରେ ପଢ଼ୁଥିବା ଛାତ୍ରୀମାନେ ନିଜ ଅଂଚଳର ସାଙ୍ଗସାଥିମାନଙ୍କୁ କନ୍ୟାଭୃଣ ହତ୍ୟା, ବାଲ୍ୟବିବାହ ଏବଂ ବାଇକ ଚଳେଇବା ବେଳେ ହେଲେମେଟ ବ୍ୟବହାର ଉପରେ ସଚେତନତ କରିବା ପାଇଁ ଆହ୍ୱାନ ଦେଇଥିଲେ । ସେହିପରି ଭାବେ ମୁଖ୍ୟ ଅତିଥି ଡ. ସାହୁ ସ୍ୱାସ୍ଥ୍ୟ ସଂମ୍ପର୍କିତ ବହୁ ତଥ୍ୟ ପୂର୍ଣ୍ଣ ଆଲୋଚନା କରିବା ସହିତ ମାନସିକ ଓ ଶାରିରୀକ ସ୍ତରରେ ସ୍ୱାସ୍ଥ୍ୟବାନ ହେଲେ ଜ୍ଞାନର ପରିମାପରେ ବୃଦ୍ଧି ଘଟିବ ବୋଲି କହିଥିଲେ । ଏହା ସହିତ ଜଣେ ସ୍ୱୟଂ ସମ୍ପୂର୍ଣ୍ଣା ହେବା ପାଇଁ ପାଠ୍ୟ ପୁସ୍ତକ ବାଦ ଅନ୍ୟାନ ସମସ୍ତ ବିଷୟ ଉପରେ ଧ୍ୟାନ ଦେବା ଆବଶ୍ୟକ ବୋଲି କହିଥିଲେ । ଚୀନ ଓ ଭାରତ ମଧ୍ୟରେ ଏକ ତୁଳନାତ୍ମକ ମତ ଦେଇ ମନ୍ତ୍ରୀ ଡ. ସାହୁ କହିଥିଲେ, ଚୀନରେ ଏକାଅଶୀ ଭାଗ ଲୋକ ଶାରୀରିକ ସୁସ୍ଥ ଥିବା ବେଳେ ଭାରତ ବର୍ଷରେ ୭୬ ଭାଗ ଲୋକ ଅସୁସ୍ଥ ଅଟନ୍ତି । ତେଣୁ ସେଥିପାଇଁ ଫିଟ ଇଣ୍ଡିଆର କାର୍ଯ୍ୟକ୍ରମ ହାତକୁ ନିଆଯାଉଛି । ଏହି କାର୍ଯ୍ୟକ୍ରମ ମୁଖ୍ୟତଃ ମହାବିଦ୍ୟାଳୟ ସ୍ତରରୁ ଆରମ୍ଭ ହେବାକୁ ଯାଉଛି ବୋଲି ପ୍ରକାଶ କରିଥିଲେ । ଏହି କାର୍ଯ୍ୟକ୍ରମରେ ମହାବିଦ୍ୟାଳୟ ଅଧ୍ୟକ୍ଷା ପ୍ରଫେସର ରାଜଶ୍ରୀ ମହାପାତ୍ର, ହଷ୍ଟେଲ ପରିଚାଳିକା ରୀନାବାଳା ଆଚାର୍ଯ୍ୟ, ଛାତ୍ରୀ ନିବାସର ସାଧାରଣ ସଂପାଦିକା ଜ୍ୟୋର୍ତିମୟୀ ସାହୁ ପ୍ରମୂଖ ମଂଚାସନ ଥିଲେ । କୃତ୍ତି ଛାତ୍ରୀମାନଙ୍କୁ ମୁଖ୍ୟ ଅତିଥି ପୁରସ୍କାର ପ୍ରଦାନ କରିବା ସହିତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
