ରଥକାଠ ଅଟକାଇବା ନେଇ ଚେତାବନି

ନୟାଗଡ଼,(ବାଘୁଆବାର୍ତ୍ତା): ଆଦିବାସୀ କୁଇ ଉନ୍ନୟନ ସଂଘ ଆଂଚଳିକ ଶାଖା ରଥକାଠ ଅଟକାଇବା ନେଇ ଚେତାବନି ଦେଇଛି । ସୂଚନାନୁସାରେ, ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ଚଢ଼େୟାପଲ୍ଲୀ, କଳାସାଖମଣ, ନୂଆଗାଁ, ଦୁଡ଼ା ପଂଚାୟତ ଅଂଚଳ ଜିଲ୍ଲାର ଏକ ବିଚ୍ଛିନ୍ନାଞ୍ଚଳ ଭାବେ ପରିଗଣିତ ହେଉଥିବା ବେଳେ ଏହି ଅଂଚଳ ମୈାଳିକ ସୁବିଧା ପାଇବାରୁ ବଂଚିତ ହେଉଛି । ଫଳରେ ଆଦିବାସୀ କୁଇ ଉନ୍ନୟନ ସଂଘର ଶାଖାର କର୍ମକର୍ତ୍ତାମାନେ ଆଜି ଜିଲ୍ଲାପାଳଙ୍କ ଅଭିଯୋଗ ଶୁଣାଣିକୁ ଆସି ଅଭିଯୋଗ କରିଛନ୍ତି । ନୂଆଗାଁ ଏବଂ ଚଢ଼େୟାପଲ୍ଲୀ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ କର୍ମଚାରୀ ଅଭାବରୁ ଲୋକେ ସ୍ୱାସ୍ଥ୍ୟ ସେବାରୁ ବଂଚିତ ହେଉଛନ୍ତି । ଏଠାରେ ସ୍ଥାୟୀ ଡାକ୍ତର ନିଯୁକ୍ତି ସହ ୨୪ ଘଣ୍ଟିଆ ସ୍ୱାସ୍ଥ୍ୟ ସେବା ଯୋଗାଇ ଦେବାକୁ ସେମାନେ ଦାବି କରିଛନ୍ତି । ଏଥିସହିତ ଚଢ଼େୟାପଲ୍ଲୀ ୟୁନିୟନ ବ୍ୟାଙ୍କରେ କମ୍ପ୍ୟୁଟର ଅଚଳ ହେତୁ ଟଙ୍କା ନେଣଦେଣ ପାଇଁ ଦୁଇରୁ ଚାରିଦିନ ଦୈାଡ଼ିବାକୁ ପଡ଼ୁଥିବା ଅଭିଯୋଗ ହୋଇଛି । ସେହିପରି ଭାବେ ଏହି ଅଂଚଳରେ ମୋବାଇଲ ସେବା ପାଇଁ ଏକ ଟାୱାର ନିର୍ମାଣ କରାଯିବା ନେଇ ଜିଲ୍ଲାପାଳଙ୍କ ପାଖରେ ଦାବି ରଖିଛନ୍ତି । ସମସ୍ୟାର ସମାଧାନ ନହେଲେ ସେମାନେ ରଥକାଠ ଅଟକାଇବାକୁ ନିଷ୍ପତ୍ତି ନେଇଥିବା କହିଛନ୍ତି ।