ନୟାଗଡ଼,(ବାଘୁଆବାର୍ତ୍ତା ବ୍ୟୁରୋ): ସିଟୁ ସହବନ୍ଧିତ ମଧ୍ୟାହ୍ନଭୋଜନ ପାଚିକା-ସହାୟିକା ୟୁନିୟନ୍ର ନୟାଗଡ଼ ବ୍ଲକ୍ସ୍ତରୀୟ ସାଧାରଣ ସଭାରେ ଆସନ୍ତା ଜାନୁଆରୀ ଆଠତାରିଖ ସର୍ବଭାରତୀୟ ସାଧାରଣ ଧର୍ମଘଟକୁ ସକ୍ରିୟଭାବେ ସଫଳ କରିବା ପାଇଁ ସର୍ବସମ୍ମତ ପ୍ରସ୍ତାବ ଗ୍ରହଣ କରାଯାଇଛି । ୩୧ତାରିଖ ଦିନ ପ୍ରତାପପ୍ରସାଦ ଭୈରବୀପୀଠରେ ବ୍ଲକ୍ର ସଭାପତି ଏସ୍.ଏ. କରିମ୍ଙ୍କ ଅଧ୍ୟକ୍ଷତାରେ ବ୍ଲକ୍ର ସମସ୍ତ ପଞ୍ଚାୟତରୁ ଯୋଗ ଦେଇଥିବା ଶତାଧିକ ପାଚିକା-ସହାୟିକାଙ୍କ ଉପସ୍ଥିତିରେ ସେମାନଙ୍କର ଭତ୍ତା, କାର୍ଯ୍ୟକ୍ଷେତ୍ରରେ ନିରାପତ୍ତାହୀନତା, ପ୍ରୋତ୍ସାହନରେ ଶୂନ୍ୟତା, ଅବସରକାଳୀନ ଦୁର୍ଦ୍ଦଶା, ନିଯୁକ୍ତି କ୍ଷେତ୍ରରେ ଦୋଦୁଲ୍ୟମାନତା, ଘରୋଇକରଣର ଅବାଧ ପ୍ରବେଶ ଉପରେ ଆଲୋଚନା କରାଯାଇଥିଲା । ମାସିକ ୧୪୦୦ ଟଙ୍କା ଦେଇ ବକେୟା ୬୦୦ ଟଙ୍କା ପିଛିଲା ତାରିଖରୁ ଦେବା କଥା କହି କେନ୍ଦ୍ର ଓ ରାଜ୍ୟ ସରକାର ଉଭୟେ ପ୍ରତାରଣା କରିଥିବାରୁ ଏବଂ ସର୍ବନିମ୍ନ ମଜୁରୀ ଆଇନ୍ରୁ ବଞ୍ଚିତ କରିଥିବାରୁ ତୁରନ୍ତ ବର୍ଦ୍ଧିତ ଭତ୍ତା ଦେବା ଦାବିରେ ଆନ୍ଦୋଳନରେ ସାମିଲ୍ ହେବାପାଇଁ ଘୋଷଣା କରାଯାଇଥିଲା । ଏହି ସଭାରେ ସଂଘର ଜିଲ୍ଲା ସମ୍ପାଦିକା ଜୟନ୍ତୀ ଦାଶ, କାର୍ଯ୍ୟକାରୀ କମିଟି ସଭ୍ୟା ପ୍ରଭାତୀ ଦେବୀ, କୁମାରୀ ଦେଇ, ଦୁହିତା ପ୍ରଧାନଙ୍କ ସମେତ ସିଟିରୁ ନେତୃତ୍ୱ ବିଶ୍ୱନାଥ ମହାପାତ୍ର, ଶଣତଚନ୍ଦ୍ର ବେହେରା ଓ ଅଧିକାରୀ ବେହେରା ପ୍ରମୁଖ ଆଲୋଚନା ରଖିଥିଲେ ।
