ସରସ୍ୱତୀ ଶିଶୁମନ୍ଦିର ରୌପ୍ୟଜୟନ୍ତୀ ଉଦ୍ଯାପିତ

ନୟାଗଡ଼,(ବାଘୁଆବାର୍ତ୍ତା ବ୍ୟୁରୋ): ସରସ୍ୱତୀ ଶିଶୁମନ୍ଦିରର ତିନିଦିନ ଧରି ରୌପ୍ୟଜୟନ୍ତୀ ଉତ୍ସବ ଉଦ୍ଯାପିତ ହୋଇଯାଇଛି । ମୁଖ୍ୟଅତିଥି ଭାବେ ନୟାଗଡ଼ର ଆରକ୍ଷୀ ଅଧିକ୍ଷକ ଶଷିଭୂଷଣ ଶତପଥୀ ଯୋଗଦେଇଥିବା ବେଳେ ମୁଖ୍ୟବକ୍ତା ଭାବେ ଶିକ୍ଷାବିକାସ ସମିତି ସଂଗଠନ ମନ୍ତ୍ରୀ ରମାକାନ୍ତ ମହାନ୍ତ ଯୋଗ ଦେଇଥିଲେ । ମୁଖ୍ୟଅତିଥି ବିଦ୍ୟାମନ୍ଦିରର ସ୍ୱତନ୍ତ୍ରତା ବିକାଶ ଉପରେ ମତ ରଖିଥିବା ସହିତ ଆଗାମୀ ଦିନରେ ଛାତ୍ରଛାତ୍ରୀମାନଙ୍କ ଉନ୍ନତି ପାଇଁ ବ୍ୟାପକ ଗବେଷଣା ଆବଶ୍ୟକ ବୋଲି ମତବ୍ୟକ୍ତ କରିଥିଲେ । ସେହିପରି ଭାବେ ମୁଖ୍ୟବକ୍ତା ଛୋଟ କୁଡିଆରୁ ଆରମ୍ଭ ହୋଇଥିବା ନୟାଗଡ଼ ଶିଶୁମନ୍ଦିର ଆଜି ଏକ ମହାନ୍ ବିଦ୍ୟାଳୟର ପ୍ରତିଷ୍ଠା ଲାଭ କରିଥିବା ବେଳେ ସରସ୍ୱତୀ ଶିଶୁମନ୍ଦିର ସମାଜକୁ ଏକ ସ୍ୱତନ୍ତ୍ର ବାର୍ତ୍ତା ଦେଉଛି ବୋଲି ଅଭିଭାଷଣ ରଖିଥିଲେ । ଶିକ୍ଷା ବ୍ୟବସ୍ଥାକୁ ସମାଜ ସହିତ ଯୋଡିବା ଏବଂ ପାଶ୍ଚାତ୍ୟରୁ ଦୁରେଇ ରହିବା ପାଇଁ ସେ ପରାମର୍ଶ ଦେଇଥିଲେ । ଏହି ଉପଲକ୍ଷେ ଅନୁଷ୍ଠାନର ଅଧ୍ୟକ୍ଷ ମୃତ୍ୟୁଞ୍ଜୟ ମହାପାତ୍ର, ସମ୍ପାଦକ ସାନ୍ତନୁ କୁମାର ସ୍ୱାଇଁ ଓ ପ୍ରଧାନ ଆଚାର୍ଯ୍ୟ ସ୍ୱାଗତ ଭାଷଣ ଦେଇଥିଲେ । ଛାତ୍ରଛାତ୍ରୀମାନଙ୍କ ଦ୍ୱାରା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।