ନୟାଗଡ଼, (ବାଘୁଆର୍ତ୍ତା) : ନୟାଗଡ଼ ଜିଲ୍ଲାପାଳଙ୍କ ସଦ୍ଭାବନା ସଭା ଗୃହରେ ଜାତୀୟ ଖାଉଟି ସୁରକ୍ଷା ଦିବସ ପାଳିତ ହୋଇଯାଇଛି । ଜଷ୍ଟିସ ଦ୍ୱାରା ଆୟୋଜିତ ଏହି ସଚେତନତା କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ତଥା ଖାଉଟି ସୁରକ୍ଷା ଅଧିକାରୀ ବିଧାନ ଚନ୍ଦ୍ର ରାୟ ସଭାପତିତ୍ୱ କରିଥିବା ବେଳେ ଖାଉଟି ବିବାଦ ପ୍ରତିକାର ମଂଚର ସଭାପତି ନାରାୟଣ ମହାପାତ୍ର, ଜିଲ୍ଲା ଯୋଗାଣ ଅଧିକାରୀ ଦେବବ୍ରତ ମହାପାତ୍ର, ଅତିରିକ୍ତ ଯୋଗାଣ ଅଧିକାରୀ ଜୟନ୍ତ କୁମାର ଦାଶ, ବୈଧ୍ୟମାପ ବିଭାଗ ସହକାରୀ ନିୟନ୍ତ୍ରକ ସୁରେଶ କୁମାର ଜାନି ପ୍ରମୂଖ ଯୋଗ ଦେଇଥିଲେ । ଜିଲ୍ଲାରେ ଖାଉଟିଙ୍କ ସୁରକ୍ଷା ଏବଂ ସଚେତନତା ପାଇଁ ବିଭିନ୍ନ କର୍ମଶାଳା ଆୟୋଜନ କରିବାକୁ ଅତିଥିମାନେ ମତବ୍ୟକ୍ତ କରିଥିବା ବେଳେ ଖାଉଟି ନିଜେ ସଚେତନ ହେବାର ଯଥେଷ୍ଟ ଆବଶ୍ୟକତା ରହିଥିବା କହିଥିଲେ । ଜିନିଷ କିଣିବା ବେଳେ ମାପ ଓଜନକୁ ଭଲ ଭାବେ ଗୁରୁତ୍ୱ ନଦେଇ ଅଣଦେଖା କରିବା ସହ ବ୍ୟବସାୟୀଙ୍କ ଉପରେ ଅତ୍ୟଧିକ ବିଶ୍ୱାସରେ ଖାଉଟି ସାଧାରଣତଃ ଠକାମିରେ ପଡ଼ିଥାନ୍ତି ବୋଲି ଅତିଥିମାନେ ମତବ୍ୟକ୍ତ କରିଥିଲେ । କାର୍ଯ୍ୟକ୍ରମରେ ବରିଷ୍ଠ ଆଇନଜୀବୀ ଚନ୍ଦ୍ର ବିଜୟୀ ମିଶ୍ର ସଂଯୋଜନା କରିଥିବା ବେଳେ ଜଷ୍ଟିସର ଆବାହକ ଶୁନ୍ୟଜୟୀ ମିଶ୍ର ଉପସ୍ଥିତ ଥିଲେ । ଆୟୋଜିତ କାର୍ଯ୍ୟକ୍ରମରେ ସହରର ବହୁ ବୁଦ୍ଧିଜୀବୀଙ୍କ ସମେତ ବହୁ ଉପଭୋକ୍ତା ସାମିଲ ହୋଇଥିଲେ ।
