କିଭଳି ଅନ୍ଧାର କୋଠରୀରେ କଟିଛି ୪ବର୍ଷ
ନୟାଗଡ଼, (ବାଘୁଆବାର୍ତ୍ତା) : ଜଣେ ପତିବ୍ରତା ନାରୀ ନିଜ ସ୍ୱାମୀପାଇଁ ବଳିଦାନ ଦେଇ ଅନ୍ଧାରୀ କୋଠରୀରେ ୪ବର୍ଷ କାଟିଛି । ଏଭଳି ଘଟଣା ଦେଖିବାକୁ ମିଳିଛି ନୟାଗଡ଼ ଜିଲ୍ଲାରେ । ସ୍ୱାମୀଙ୍କୁ କାଳେ ପୁଲିସ ବାନ୍ଧି ନେବା ଭୟରେ ନାବାଳିକା ପତ୍ନୀ ନିଜକୁ ସାବାଳିକା କହି ୪ ବର୍ଷ ହେବ ନୟାଗଡ଼ ଉପକାରାଗାରରେ ସଜ୍ଜା କାଟୁଥିବା ବେଳେ ଆଜି ଜେଲରୁ ବାହାରିଛନ୍ତି । ସୂଚନାନୁସାରେ, ଗଞ୍ଜାମ ଜିଲ୍ଲା ବ୍ରହ୍ମପୁର ଅଂଚଳ ବନିତା ସେଠୀ ବାପା ମାଆଙ୍କ ସହ ଗୁଜୁରାଟର ସୁରଟ ସହର ସ୍ଥିତ ଆମ୍ବାନଗରରେ ରହୁଥିଲେ । ନୟାଗଡ଼ ଜିଲା ନୂଆଗାଁ ବ୍ଳକ ଉଦୟପୁର ପଞ୍ଚାୟତ ଶିଖରଗୋଛା ହରିପୁର ଗ୍ରାମର ଦୁଃଶାସନ ସେଠୀ ସୁରଟକୁ କାମ କରିବାକୁ ଯାଇଥିବା ସମୟରେ ତାଙ୍କ ସହିତ ଦେଖା ଓ ପ୍ରେମ ହୋଇଥିଲା । ୨୦୧୩ ମସିହାରେ ଉଭୟ ବିବାହ କରିଥିଲେ । ବିବାହ ପରେ ବନିତାଙ୍କ ଘର ଲୋକ ତାଙ୍କ ସହିତ ସମ୍ପର୍କ କାଟି ଦେବାରୁ ଶିଖରଗୋଛା ଶାଶୁ ଘରେ ବନିତା ରହିଲେ । ବିବାହର ଦୁଇ ବର୍ଷ ପରେ ଯୌତୁକ ନିର୍ଯ୍ୟାତନା ବାବଦରେ ବନିତାଙ୍କ ବଡ଼ ଯାଆଙ୍କୁ ମାରି ଦିଆଗଲା । ନୂଆଗାଁ ପୋଲିସ ଏହି ଘଟଣାରେ ଶାଶୁ ଓ ବନିତାଙ୍କୁ ୧୩ ନଭେମ୍ବର ୨୦୧୫ରେ ଗିରଫ କରି କୋର୍ଟ ଚାଲାଣ କରିଥିଲା । ୨୯ ମାର୍ଚ୍ଚ ୨୦୧୭ରେ ବନିତାଙ୍କୁ ନୟାଗଡ଼ ଅତିରିକ୍ତ ଜିଲା ଓ ଦୌରାଜଜ୍ ବଡ଼ ଯାଆଙ୍କୁ ମାରିଦେବା ଘଟଣାରେ ଆଜୀବନ କାରାଦଣ୍ଡ ପ୍ରଦାନ କରିଥିବା ଜଣାପଡ଼ିଛି । ଜୁଭେନାଇଲ ଜଷ୍ଟିସ କେୟାର ଆଣ୍ଡ ପୋଟେକ୍ସନ ଅଫ ଚିଲ୍ଡେନ (ଜେଜେସିପିସି) ୨୦୧୫ ଆକ୍ଟର ଧାରା ୮ରେ ଥିବା ନିୟମ ଅନୁସାରେ ଜଷ୍ଟିସ୍ ବୋର୍ଡ଼ ପରିଭ୍ରମଣ ସମୟରେ ନୟାଗଡ଼ ଜେଲରେ ବନୀତା ଆଜୀବନ କାରଦଣ୍ଡ ଭୋଗୁଥିବା ବୋର୍ଡ଼ର ସଦସ୍ୟମାନେ ଜାଣିବାକୁ ପାଇଲେ । ଏହା ପରେ ବନିତାଙ୍କୁ କାଉନସେଲିଂ କରିବା ପରେ ଜଣାପଡ଼ିଲା କି, ଯେତେବେଳେ ତାଙ୍କୁ ଜେଲ୍କୁ ପଠାଗଲା ସେତେବେଳେ ତାଙ୍କୁ ୧୭ ବର୍ଷ ହୋଇଥିଲା । ଯାହାକି ନଗର ପ୍ରାଥମିକ ଶିକ୍ଷାସନ ସମିତି, ସୁରଟ ଅଧିନରେ ଥିବା ଅମ୍ବାନଗର ପ୍ରାଥମିକ ବିଦ୍ୟାଳୟରୁ ବନିତାର ସାର୍ଟିଫିକେଟ ମିଳିଲା ପରେ ଜଣାପଡ଼ିଲା । ସାର୍ଟିଫିକେଟର ତାର ଜନ୍ମ ତାରିଖ ୬ ଅଗଷ୍ଟ ୧୯୯୮ । ତେଣୁ ବୋର୍ଡ ଏହାର ପୁର୍ନବିଚାର ପାଇଁ ହାଇକୋର୍ଟରେ ଆବେଦନ କରିଥିଲେ । ହାଇକୋର୍ଟରୁ ବନିତାଙ୍କ ଜାମିନ ମଂଞ୍ଜୁର ହେବା ପରେ ଆଜି ସେ ଜେଲରୁ ମୁକୁଳିଥିବା ଜଣାପଡ଼ିଛି । ଏନେଇ ସେ ତାଙ୍କ ସ୍ୱାମୀଙ୍କ ସମେତ ଜଷ୍ଟିସ ବୋର୍ଡ଼ ସଦସ୍ୟ, ଜେଲତ୍ତକର୍ତ୍ତୁପକ୍ଷ ଏବଂ ଗଣମାଧ୍ୟମ ପ୍ରତିନିଧିଙ୍କୁ ସାଧୁବାଦ ଜଣାଇଛନ୍ତି । ଏଠାରେ ପ୍ରକାଶ ଯୋଗ୍ୟ ଯେ, ବନିତାଙ୍କ ସହ ତାଙ୍କ ପୁଅ ୪ ବର୍ଷ ହେବ ଜେଲରେ ଥିଲେ ।
