ନୟାଗଡ଼, (ବାଘୁଆବାର୍ତ୍ତା) : ଭାରତ ସରକାରଙ୍କର ଗ୍ରାମ୍ୟ ଉନ୍ନୟନ ବିଭାଗ ଅନ୍ତର୍ଗତ ଭୂସମ୍ବଳ ବିଭାଗର ଅତିରିକ୍ତ ସଚିବ ସତ୍ୟବ୍ରତ ସାହୁ ଆଜି ରଣପୁର ଗ୍ରସ୍ତ କରିଛନ୍ତି । ତାଙ୍କ ସହିତ ରାଜ୍ୟ ସରକାରଙ୍କର ମୃତ୍ତିକା ସଂରକ୍ଷଣ ବିଭାଗର ନିର୍ଦ୍ଦେଶକ ହେମନ୍ତ କୁମାର ପଣ୍ଡା, ନୟାଗଡ଼ ଜିଲ୍ଲାପାଳ ଡ. ପୋମା ଟୁଡୁ, ନୟାଗଡ଼ ମୃତ୍ତିକା ସଂରକ୍ଷଣ ଓ ଜଳ ବିଭାଜିକା ବିଭାଗ ପ୍ରକଳ୍ପ ନିର୍ଦ୍ଦେଶକ ଚନ୍ଦନ କୁମାର ସାହୁ ପ୍ରମୂଖ ବିଭିନ୍ନ ଉନ୍ନୟନ ମୂଳକ କାର୍ଯ୍ୟର ସମୀକ୍ଷା କରିଛନ୍ତି । ରଣପୁର ଥାନା ଅନ୍ତର୍ଗତ ଗୋପାଳପୁର ଗ୍ରାମପଂଚାୟତର ଅନ୍ଧାରୁଆ, ସାମନ୍ତସିଂହାରପୁର, କୃଷ୍ଣପୁର, ବିମ୍ବାଧର ପୁର ଗ୍ରାମ ବୁଲି ବିଭିନ୍ନ ଜଳବିଭାଜିକା କ୍ଷେତ୍ର ପରିଦର୍ଶନ କରିବା ସହିତ ସମୀକ୍ଷା କରିଥିଲେ । ଗୋଡ଼ିଝର ନାଳ ଜଳବିଭାଜିକା ଅଧିନରେ ୪୩ ଗୋଟି କ୍ଷେତ ପୋଖରୀ ହାତକୁ ନିଆଯାଇଥିଲା । ଏହା ଶେଷ ହୋଇଥିବା ବେଳେ ଏହା ଦ୍ୱାରା ଉପକୃତ ହୋଇଥିବା ଚାଷୀ ବାନାମ୍ବର ମାଝୀକୁ ଅଧିକାରୀମାନେ ସିଧାସଳଖ ଭେଟିଥିଲେ । ଚାଷୀ ଅଢ଼େଇ ଏକର ଜମିରେ ବିଭିନ୍ନ ପ୍ରକାର ପନିପରିବା ଚାଷ କରିବା ସହିତ କିପରି ଉପକୃତ ହେଉଛି ଏବଂ କେତେ ଲାଭବାନ ହେଉଛି, ସେ ସମ୍ବନ୍ଧରେ ଚାଷୀ ନିଜେ ବଖାଣିଥିଲା । ଅଧିକାରୀ ଫେରିଲା ବେଳେ ଏକ କୁକୁଡ଼ା ଫାର୍ମକୁ ବାହାରୁ ଦେଖିଥିଲେ । ଅତିରିକ୍ତ ସଚିତ ସତ୍ୟବ୍ରତ ସାହୁ ଏବଂ ଜିଲ୍ଲାପାଳ ଡ. ପୋମା ଟୁଡୁ ଏହି ଅଂଚଳର ବିକାଶ ପାଇଁ କି ପଦକ୍ଷେପ ନିଆଯିବ ସେ ନେଇ ଜିଲ୍ଲା ସ୍ତରୀୟ ଅଧିକାରୀଙ୍କ ଆଲୋଚନା କରିଥିଲେ । ଚାଷୀମାନେ କିପରି ଉପକୃତ ହେବେ ସେ ନେଇ ଏକ ବୈଠକରେ ଆଲୋଚନା ହୋଇଛି । ଏହି ଗ୍ରସ୍ତ କାର୍ଯ୍ୟକ୍ରମରେ ମତ୍ସ ବିଭାଗ ଉପ ନିର୍ଦ୍ଦେଶକ, ରଣପୁର ସହକାରୀ କୃଷି ଅଧିକରୀ, ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସ ଅଧିକାରୀମାନେ ଯୋଗଦେଇଥିଲେ ।
