ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଯୋଗାଣ ଅଧିକାରୀଙ୍କ ସମେତ ଛଅ ଜଣ କର୍ମଚାରୀଙ୍କୁ ବିଭାଗ ନିଲମ୍ବିତ କରିଥିବା ଜଣାପଡ଼ିଛି । ଏହି କର୍ମଚାରୀଙ୍କ ମଧ୍ୟରେ ଜିଲ୍ଲା ଯୋଗାଣ ଅଧିକାରୀ ବିକ୍ରମ ମାଝୀ, ସହକାରୀ ଯୋଗାଣ ଅଧିକାରୀ ଶ୍ରୀନିବାସ ସାହୁ, ସଂଗ୍ରାହକ ଅଧିକ୍ଷକ ସଂଜୀବ ସାହୁ, ମାନ ନିର୍ଦ୍ଧାରକ ଜୟଶ୍ରୀ ମୁନୀ, ଡାଟା ଏଣ୍ଟ୍ରି ଅପରେଟର ସୁଧାକର ଦଳବେହେରା ଓ ରୋଜାଲିନ୍ ସେଠୀ । ନୟାଗଡ଼ ଜିଲ୍ଲାରେ ଥିବା ମିଲରମାନେ ନିଜ ଗାଡ଼ିରେ ଚାଉଳ ପରିବହନ କରୁଥିବା ଏବଂ ଜିଲ୍ଲାରେ ନିମ୍ନ ମାନର ଚାଉଳ ଯୋଗାଣ ହେଉଥିବା ନେଇ କିଛି ଦିନ ତଳେ ଅଭିଯୋଗ ହୋଇଥିଲା । ନଭେମ୍ବର ୨ ତାରିଖରେ ଏହାକୁ ନେଇ ଯୋଗାଣ ବିଭାଗର ଅଧିକାରୀ ଏବଂ କର୍ପୋରେସନ ଅଧିକାରୀମାନେ ଅଳ୍ପଦିନ ତଳେ ଜିଲ୍ଲାଗ୍ରସ୍ତ କରି ସରକାରଙ୍କୁ ରିର୍ପୋଟ ଦେଇଥିଲେ । ଯାହା ଫଳରେ ଯୋଗାଣ ବିଭାଗ ଯୋଗାଣ ଅଧିକାରୀ ଏବଂ ସହକାରୀ ଯୋଗାଣ ଅଧିକାରୀଙ୍କୁ ନିଲମ୍ବନ କରିଥିବା ବେଳେ କର୍ପୋରେସନ ଅନ୍ୟ କର୍ମଚାରୀମାନଙ୍କୁ ନିଲମ୍ବନ କରିଥିବା ଜଣାପଡ଼ିଛି । ଏନେଇ ଅତିରିକ୍ତ ଜିଲ୍ଲାପାଳ ବିଧାନ ଚନ୍ଦ୍ର ରାୟଙ୍କୁ ପଚାରିବାରେ, ସେ ଯୋଗାଣ ଅଧିକାରୀ ଏବଂ ସହକାରୀ ଯୋଗାଣ ଅଧିକାରୀଙ୍କୁ ନିଲମ୍ବନ କରାଯାଇଥିବା କହିଛନ୍ତି । ଅନ୍ୟପକ୍ଷେ, କର୍ପୋରେସନ ବିଷୟରେ ସେ ଜାଣିନଥିବା କହିଛନ୍ତି ।
