ନୟାଗଡ଼,(ବାଘୁଆବାର୍ତ୍ତା) : ନୟାଗଡ଼ ସହର ଯୁବ ପିଢ଼ି ଏବେ ବ୍ରାଉନ୍ସୁଗାର କବଳରେ । ଏହି ବ୍ରାଉନ୍ ସୁଗାର କବଳରୁ ଯୁବପିଢ଼ିଙ୍କୁ ମୁକୁଳାଇବା ପାଇଁ ଟାଉନଥାନା ପୁଲିସ ବେପାର କରୁଥିବା ତିନିଜଣ ଯୁବକଙ୍କୁ ଗିରଫ କରିଛି । ଗିରଫ ଯୁବକମାନେ ହେଲେ ନୟାଗଡ଼ ଶରଣକୂଳ ଗ୍ରାମ ସୁଆରସାହିର କୈଳାଶ ମହାପାତ୍ରଙ୍କ ପୁଅ ଦିପୁ ମହାପାତ୍ର ଓରଫ ଚଗଲୁ, ଶରଣକୂଳ ଥାନା ଅନ୍ତର୍ଗତ ବଡ଼ଗୋରଡ଼ା ଗ୍ରାମର ଗୋବିନ୍ଦ ପ୍ରଧାନଙ୍କ ପୁଅ ପ୍ରଦୀପ୍ତ କୁମାର ପ୍ରଧାନ ଓରଫ ବାପି, ଟାଉନଥାନା ଅନ୍ତର୍ଗତ ଦୁର୍ଗାପ୍ରସାଦ ଗ୍ରାମର ଫକିର ପାଳଙ୍କ ପୁଅ ପ୍ରିୟରଂଜନ ପାଳ ଓରଫ ଚିଆଁ । ସୂଚନାନୁସାରେ, ଅଭିଯୁକ୍ତମାନେ ନୟାଗଡ଼ ଜଜାଙ୍ଗୀସାହି ନିକଟବର୍ତ୍ତୀ ଓମଶାନ୍ତି ଆଶ୍ରମଠାରେ ଆଜି ଦିନବେଳା ଏକାଠି ହୋଇ ବ୍ରାଉନସୁଗାର ବ୍ୟବସାୟ କରୁଥିବା ନେଇ ପୁଲିସ ଖବର ପାଇଥିଲା । ଟାଉନଥାନା ଏସଆଇ ଧର୍ମେନ୍ଦ୍ର ଶିଆଳଙ୍କ ନେତୃତ୍ୱରେ ଏକ ଟିମ ସେଠାରେ ଚଢ଼ାଉ କରିବା ସହ ତିନିଜଣ ଅଭିଯୁକ୍ତଙ୍କୁ ଗିରଫ କରିଛନ୍ତି । ସେମାନଙ୍କଠାରୁ ୧.୯ ଗ୍ରାମର ବ୍ରାଉନସୁଗାର ଏବଂ ତିନୋଟି ମୋବାଇଲ ଜବତ ହୋଇଛି । ଅନ୍ୟପକ୍ଷେ ଏହି ଘଟଣାର ଅନ୍ୟତମ ଅଭିଯୁକ୍ତ ମୁଣ୍ଡିଆସାହିର ନିରଂଜନ ମହାରଣା ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ପୁଲିସ ସେ ଛାଡ଼ିଯାଇଥିବା ହିରୋହୋଣ୍ଡା ବାଇକ ଜବତ କରିଥିବା ନୟାଗଡ଼ ଏସପି ଶଶୀଭୂଷଣ ଶତପଥିୀ ଏବଂ ଟାଉନଥାନା ଅଧିକାରୀ ଜୟଦୀପ ମହାନ୍ତି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
