ଆଠଗଡ଼, (ବାଘୁଆବାର୍ତ୍ତା): କଟକ ଜିଲ୍ଲା ନରସିଂହପୁର ଥାନାରେ ପୋଲିସ ଓ ଜନତା ମଧ୍ୟରେ ଖଣ୍ଡଯୁଦ୍ଧ। ଆଠଗଡ଼ ନରସିଂହପୁର ଥାନାରେ ବିଜେପି ପକ୍ଷରୁ ଧାରଣା ଦେବା ସମୟରେ ଉତ୍ତେଜନା ପ୍ରକାଶ ପାଇଥିଲା। ଏହାପରେ ପୋଲିସ ଓ ବିଜେପି କର୍ମୀ ଧସ୍ତାଧସ୍ତି ହୋଇଥିଲେ। ପୋଲିସ ପକ୍ଷରୁ ଲାଠି ଚାଳନା କରାଯାଇଥିଲା। ବିଧାୟକଙ୍କ ହାତବାରିସ ହୋଇ ପୋଲିସ ୩ ଜଣ ବିଜେପି କର୍ମୀଙ୍କୁ ଗିରଫ କରିଥିବାରୁ ବିଜେପି କର୍ମୀମାନେ ଥାନା ଆଗରେ ଧାରଣା ଦେଇଥିଲେ। ବିନା କୌଣସି କାରଣରେ ରାଜନୈତିକ ଆକ୍ରୋଶ ରଖି ଏପରି ହୋଇଥିବା ବିଜେପି କର୍ମୀମାନେ ଅଭିଯୋଗ କରିଛନ୍ତି। ସେହିପରି ଏ ସମ୍ପର୍କରେ ଥାନା ଅଧିକାରୀ ଅଲେଖ ଗରଡ଼ିଆଙ୍କୁ ପଚାରିବାରୁ ସେ ଏ ସମ୍ପର୍କରେ କିଛିବି କହିବେ ନାହିଁ ବୋଲି ସିଧାସଳଖ ଭାବେ କହିଛନ୍ତି। ସୂଚନାନୁଯାୟୀ, ଗତକାଲି ବିଳମ୍ବିତ ରାତିରେ ନରସିଂହପୁର ଥାନା ପୋଲିସ ବଡମ୍ବା ଥାନା ଅନ୍ତର୍ଗତ ରତାପାଟ ଗ୍ରାମର ୩ ଜଣ ବିଜେପି କର୍ମୀଙ୍କୁ ଉଠାଇ ଆଣିଛି। ସେମାନେ ହେଉଛନ୍ତି ମନୋଜ ନାୟକ, ରଞ୍ଜନ ସାମନ୍ତରାୟ, ଲିପୟ ବଳିୟାରସିଂ। କିଛି ଦିନ ତଳେ ନରସିଂହପୁର କୋର୍ଟ ପରିସରରେ ବିଜେପି ଓ ବିଜେଡି ମଧ୍ୟରେ ଗଣ୍ଡଗୋଳ ହୋଇଥିଲା। ଯାହାକୁ ନେଇ ପୁଣି ଉଭୟ ଦଳ ମଧ୍ୟରେ ସମାଧାନ କରାଯାଇଥିଲା। ସମାଧାନ ହେବାପରେ ପୂର୍ବରୁ ଜଣଙ୍କୁ ଏବଂ ଗତକାଲି ବିଳମ୍ବିତ ରାତିରେ ଅନ୍ୟ ତିନି ଜଣଙ୍କୁ ପୋଲିସ ଉଠାଇ ଆଣିଥିବାରୁ ବିଜେପି କର୍ମୀମାନେ ଥାନା ଘେରାଉ କରିଥିଲେ। ପରିସ୍ଥିତି ଅଣାୟତ୍ତ ହେବାରୁ ପୋଲିସ ତରଫରୁ ଲାଠି ଚାଳନା କରାଯାଇଥିଲା। ତେବେ ପୋଲିସ ଓ ବିଜେପି କର୍ମୀମାନଙ୍କ ମଧ୍ୟରେ ହୋଇଥିବା ଏହି ଧସ୍ତାଧସ୍ତିରେ ୩ଜଣ ପୋଲିସ କର୍ମଚାରୀ ଓ ଜଣେ ବିଜେପି କର୍ମୀ ଆହତ ହୋଇଛନ୍ତି।
