ଚାଟ୍ ମାଗିବାକୁ ନେଇ ଗଣ୍ଡଗୋଳ ଘଟି ଜଣେ ଗୁରୁତର ହେବା ସହ ଦମ୍ପତ୍ତି ଆହତ

ରଙ୍ଗେଇଲୁଣ୍ଡା, (ବାଘୁଆବାର୍ତ୍ତା): ଜାତୀୟ ରାଜପଥ ନିକଟ ସୁରଳ ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। ଚାଟ୍ ମାଗିବାକୁ ନେଇ ଗଣ୍ଡଗୋଳ ଘଟି ଜଣେ ଗୁରୁତର ହେବା ସହ ଦମ୍ପତ୍ତି ଆହତ ହୋଇଛନ୍ତି। ଗୁରୁତର ବ୍ୟକ୍ତି ଜଣଙ୍କ ହେଲେ ଶଙ୍କର ବେହେରା। ଆହତ ଦମ୍ପତି ଦୁଇ ଜଣ ହେଲେ କୁଶ ବେହେରା ଓ ସ୍ତ୍ରୀ ଲକ୍ଷ୍ମା ବେହେରା। କୁଶ ଘୁଗୁନି ଚାଟ୍ ବିକି ପରିବାର ଚଳନ୍ତି। ରବିବାର ସନ୍ଧ୍ୟାରେ ଶଙ୍କର ମଦ୍ୟପାନ କରି ଆସି ସୁରଳ ବସଷ୍ଟାଣ୍ଡ ଠାରେ କୁଶଙ୍କୁ ଚାଟ୍ ମାଗିଥିଲେ। ହେଲେ କୁଶ ମନା କରିବାରୁ ଉଭୟଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ପରେ ଶଙ୍କରଙ୍କ ଛୁରା ମାଡରେ କୁଶ ଓ ଲକ୍ଷ୍ମା ଆହତ ହୋଇଥିଲେ। ପୁଣି ରାତିରେ ଶଙ୍କର କୁଶ ଓ ତାଙ୍କ ଭାଇ ଲବଙ୍କ ଘରେ ପଶି ଟିଭି ଓ ଆସବାବପତ୍ର ଭଙ୍ଗାରୁଜା କରିବା ସହ ଚାଉଳ ବସ୍ତା ଫୋପାଡ଼ି ଦେଇଥିଲା। ଉତକ୍ଷୀପ୍ତ ଦୁଇ ଭାଇଙ୍କ ପାଲଟା ଆକ୍ରମଣରେ ଶଙ୍କର ଗୁରୁତର ହୋଇ ପଡିଥିଲା। ଗୁରୁତର ଶଙ୍କରଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି।