ସୋନପୁର, (ବାଘୁଆବାର୍ତ୍ତା): ପାଣି ପମ୍ପ ଚୋରି ଘଟଣାର ପର୍ଦ୍ଦାଫାଶ । ଘଟଣାରେ ସାମିଲ ଥିବା ଜଣଙ୍କୁ ଗିରଫ କରିବା ସହ ମୋଟ ୧୧ଟି ପାଣି ପମ୍ପ ଜବତ କରିଛି ପୋଲିସ । ଏନେଇ ସୋନପୁର ପୋଲିସ ପ୍ରେସ୍ମିଟ୍ ଜରିଆରେ ସୂଚନା ଦେଇଛି । ଖବର ଅନୁଯାୟୀ, ଗତ କିଛି ଦିନ ହେଲା ସୋନପୁର ସହର ସମେତ ଆଖ ପାଖ ଗାଁର ଲୋକଙ୍କ ଘରୁ ପାଣି ମୋଟର ଚୋରି ହେଉଥିବାର ଅଭିଯୋଗ ଆସିଥିଲେ । ଏନେଇ ସୋନପୁର ଥାନାରେ ଲିଖିତ ଭାବେ ଅଭିଯୋଗ ମଧ୍ୟ ହୋଇଥିଲା । ଏପରିକି ସହରର ଅତିରିକ୍ତ ତହସିଲଦାରଙ୍କ ଘରୁ ମଧ୍ୟ ପାଣି ପମ୍ପ ଚୋରି ହୋଇଥିଲା । ଅତିରିକ୍ତ ତହସିଲଦାର ଏନେଇ ଥାନାରେ ଅଭିଯୋଗ କରିଥିଲେ । ତେବେ ଅଞ୍ଚଳରୁ ବାରମ୍ବାର ଏପରି ଚୋରି ଘଟଣା ପରେ ପୋଲିସ ଆକ୍ସନକୁ ଆସିଥିଲା । ସହରର କଳିଙ୍ଗ ନଗରର ରହୁଥିବା ୨୧ ବର୍ଷୀୟ ରାମ ଗଡିଆ ନାମକ ଜଣେ ଯୁବକକୁ ସନ୍ଦେହ କରି ଅଟକ ରଖିଥିଲା ପୋଲିସ । ପୋଲିସ ପଚରାଉଚରାରେ ଅଟକ ଥିବା ଯୁବକ ସତ ମାନିଥିଲେ । ଅଟକ ଯୁବକ ନିକଟରୁ ୧୧ଟି ଚୋରି ହୋଇଥିବା ପାଣି ପମ୍ପ ଜବତ ହୋଇଛି । ଯୁବକ ଜଣଙ୍କ ସମସ୍ତ ପାଣି ପମ୍ପ ଚୋରୀ କରିଥିବା ପୋଲିସ ତଦନ୍ତରୁ ଜଣାପଡିଛି । ତେବେ ପୋଲିସ ଅଭିଯୁକ୍ତ ଯୁବକ ରାମକୁ ଗିରଫ କରି ସଦର ଥାନାରେ ଏକ ସାମ୍ବାଦିକ ସମ୍ମିଳନୀ କରି ଚୋରୀ ଘଟଣା ସଂପର୍କରେ ଗଣମାଧ୍ୟମକୁ ସୂଚନା ଦେଇଛି ।
ପାଣି ପମ୍ପ ଚୋରି ଘଟଣାର ପର୍ଦ୍ଦାଫାଶ: ଜଣଙ୍କୁ ଗିରଫ କରିବା ସହ ମୋଟ ୧୧ଟି ପାଣି ପମ୍ପ ଜବତ କରିଛି ପୋଲିସ
