ନିଶ୍ଚିନ୍ତକୋଇଲି, (ବାଘୁଆବାର୍ତ୍ତା): ସ୍ଥାନୀୟ ମହମ୍ମଦପୁର ଗ୍ରାମର ଜଣେ ମହିଳାଙ୍କ ତନ୍ତ ପୋଡି ଯିବା ଯୋଗୁ ସେ ଜୀବିକା ହରାଇ ଏବେ ହତାଶ ହୋଇପଡ଼ିଛନ୍ତି । ନିଶ୍ଚିନ୍ତକୋଇଲି ବ୍ଲକ ତଥା କଟକ ସଦର ନିର୍ବାଚନ ମଣ୍ଡଳୀ ଅଧୀନ ମହମ୍ମଦପୁର ପଞ୍ଚାୟତରେ ସରୋଜିନୀ ନାୟକଙ୍କ ଘର । ତନ୍ତରେ ଲୁଗା ବୁଣି ୪ ପ୍ରାଣୀ କୁଟୁମ୍ୱ ପୋଷୁଥିଲେ ସେ । କିନ୍ତୁ ନିକଟ ଅତିତରେ ସରୋଜିନୀ ତନ୍ତ ଆକସ୍ମିକ ଭାବେ ପୋଡ଼ିଯାଇଥିଲା । ଏଣୁ ସେ ରୋଜଗାର ହରାଇ ଜୀବନସହ ସଂଗ୍ରାମ କରୁଛନ୍ତି । ସ୍ୱାମୀ ନିରଞ୍ଜନ ମାନସିକ ମାନସିକ ଭିନ୍ନକ୍ଷମ ହୋଇଥିଲା ବେଳେ ୨ ପୁଅ ଝିଅଙ୍କୁ ନେଇ ତାଙ୍କର ତେଲ ଲୁଣର ସଂସାର । ବିଭିନ୍ନ ସରକାରୀ ଦପ୍ତର ଓ ଲୋକପ୍ରତିନିଧିଙ୍କୁ ତନ୍ତ ପାଇଁ ଗୁହାରି କରି ମଧ୍ୟ ସବୁଆଡୁ ନିରାଶ ହୋଇପଡ଼ିଛନ୍ତି ସରୋଜିନୀ । ଦୁଇବର୍ଷ ହେବ ତନ୍ତ ନଥିବାରୁ ସେ କୁଳ ବେଉସା ଠାରୁ ଦୂରେଇ ରହିଛନ୍ତି । ରାସନ କାର୍ଡ ପାଇଁ ବାରମ୍ୱାର ସରକାରୀ ଦପ୍ତର ଓ ସ୍ଥାନୀୟ ନେତୃମଣ୍ଡଳୀଙ୍କୁ ଗୁହାରି କରିଥିଲେ ମଧ୍ୟ କେହି ଶୁଣୁନାହାଁନ୍ତି । ସବୁ ଆଡୁ ନିରାଶ ହୋଇ କଟକ ସଦର ବିଧାୟକ ଚନ୍ଦ୍ରସାରଥି ବେହେରାଙ୍କୁ ଗୁହାରି କରିଛନ୍ତି । ତେବେ ତାଙ୍କୁ ଖୁବ ଶୀଘ୍ର ସମସ୍ତ ସରକାରୀ ସୁବିଧା ସୁଯୋଗ ଯୋଗାଇ ଦିଆଯିବ ବୋଲି ବିଧାୟକ ଶ୍ରୀ ବେହେରା ପ୍ରତିଶ୍ରୁତି ଦେବା ସହ ତାଙ୍କ ପରିବାରକୁ ତୁରନ୍ତ ସରକାରୀ ସୁବିଧା ଯୋଗାଇ ଦେବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ତେବେ ବିଧାୟକଙ୍କ ପ୍ରତିଶ୍ରୁତି କେବେ ପାଳନ ହେବ ତାହା ସମୟ କହିବ । ଏ ସମ୍ପର୍କରେ ଯୋଗାଣ ଅଧିକାରୀ ପ୍ରତିମ ଦାସ କୁହନ୍ତି ଅନ୍ଲାଇନ୍ରେ ରାସନକାର୍ଡ ପାଇଁ ଆବେଦନ କଲେ ଏହା ଯୋଗାଇ ଦିଆଯିବ ।
ଆକସ୍ମିକ ଭାବେ ତନ୍ତ ପୋଡି ଯିବା ଯୋଗୁ ଜୀବିକା ହରାଇ ହତାଶ ହୋଇପଡ଼ିଛନ୍ତି ମହିଳା
