ପଦ୍ମପୁର, (ବାଘୁଆବାର୍ତ୍ତା): ରାୟଗଡ଼ା ଜିଲ୍ଲା ପଦ୍ମପୁର ଅଞ୍ଚଳରେ ଦିନକୁ ଦିନ ବଢିବାରେ ଲାଗିଛି ନିଶା ବେପାରୀଙ୍କ ଦୌରାତ୍ମ୍ୟ। ଛତିଶଗଡ଼ ବସନାରୁ ଆସିଥିବା କଫ୍ ସିରପ୍ ବୋଝେଇ ଭ୍ୟାନ୍କୁ ସତୀଭଟା ଛକ ନିକଟରେ ଜବତ କଲା ପଦ୍ମପୁର ପୋଲିସ। ତେବେ ଅଭିଯୁକ୍ତ ଡ୍ରାଇଭର ଫେରାର୍ ହୋଇଯାଇଛି। ଏନେଇ ପଦ୍ମପୁର ପୋଲିସ ଅଧିକ ତଦନ୍ତ କରୁଛି। ସୂଚନାନୁଯାୟୀ, ଛତିଶଗଡ଼ ବସନାରୁ କଫ୍ ସିରପ୍ ଚାଲାଣ ହେଉଥିବା ପଦ୍ମପୁର ପୋଲିସ ଖବର ପାଇଥିଲା। ଏହାପରେ ପୋଲିସ ସତୀଭଟା ଛକ ନିକଟରେ ଛକି ରହିଥିଲା। ଏହି ସମୟରେ ଏକ ନମ୍ବର ବିହୀନ ପିକଅପ୍ ଭ୍ୟାନ୍କୁ ପୋଲିସ ଅଟକାଇ ଯାଞ୍ଚ୍ କରିଥିଲା। ଏହି ଭ୍ୟାନ୍ ଭିତରୁ ୨୬ ଗୋଟି କାଟୁନରେ ବୋଝେଇ ହୋଇଥିବା କଫ୍ ସିରପ୍ ଜବତ ହୋଇଛି। ପ୍ରାୟ ୩୯୨୦ ଗୋଟି କଫ୍ ସିରପ୍ ପଦ୍ମପୁର ପୋଲିସ ଉକ୍ତ ଗାଡିରୁ ଜବତ କରିଛି। ଏହାର ଆନୁମାନିକ ମୂଲ୍ୟ ୬ ଲକ୍ଷ ଟଙ୍କା ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି। ତେବେ ପୋଲିସ କଫ୍ ସିରପ୍ ଓ ଭ୍ୟାନକୁ ଜବତ କରିବାରେ ସଫଳ ହୋଇଥିବା ବେଳେ ଗାଡି ଚାଳକ ଫେରାର୍ ହୋଇଯାଇଛନ୍ତି। ଏନେଇ ପଦ୍ମପୁର ଥାନା କେସ ନମ୍ବର ୨୨୯ ତା.୧୦/୧୦/୨୦୨୧ରେ ମାମଲା ରୁଜୁକରି ଅଧିକ ତଦନ୍ତ ଜାରି ରଖିଛି ।
