ସମ୍ବଲପୁର, (ବାଘୁଆବାର୍ତ୍ତା): ତିନି ବର୍ଷ ତଳେ ପୁଲିସକୁ ଚକମା ଦେଇ ଖସି ଯାଇଥିବା ଅପରାଧୀ ଧନେଶ୍ୱର ଝାଙ୍କର ଓରଫ ଟିମାକୁ ଗୁରୁବାର ଗିରଫ କରିଛି ପୁଲିସ୍। ସମ୍ବଲପୁର ଏସ୍ପି ବି. ଗଙ୍ଗାଧର ଆଜି ଏକ ସାମ୍ବାଦିକ ସମ୍ମଳନୀରେ ଏହି ସୂଚନା ଦେଇଛନ୍ତି। ସେ କହିଛନ୍ତି, ଟିମା ସହିତ ତା’ର ତିନି ଜଣ ସହଯୋଗୀଙ୍କୁ ମଧ୍ୟ ଗିରଫ କରାଯାଇଛି। ଟିମାରେ ନାଁରେ ରାଜ୍ୟର ବିଭିନ୍ନ ଥାନାରେ ୪୧ରୁ ଅଧିକ ଅପରାଧିକ ମାମଲା ରହିଛି। ୨୦୧୮ ମସିହାରେ ଟିମା କୁଚିଣ୍ଡା ଥାନା ପୁଲିସ ଦ୍ୱାରା ଏକ ମାମଲାରେ ଗିରଫ ହୋଇଥିଲା। ତେବେ ଏକ ପୁରୁଣା ମାମଲାରେ କେନ୍ଦୁଝର ପୁଲିସ ତାକୁ ରିମାଣ୍ଡରେ ନେଉଥିବା ବେଳେ ସେ ପୁଲିସ ହେପାଜତରୁ ଖସି ପଳାଇ ଯାଇଥିଲା। ଏସ୍ପି ଆହୁରି କହିଛନ୍ତି, ଗତ ତିନି ମାସ ହେବ ପୁଲିସ ଟିମାକୁ ଧରିବାକୁ ଜାଲ ବିଛାଇ ଥିଲା। ଟିମାର ନିଜ ଘର ସମ୍ବଲପୁର ଜିଲ୍ଲା ସଦର ଥାନା ଅନ୍ତର୍ଗତ ରାସନ ପୁର ଗାଁରେ। ସେ ଗାଁ ଲୋକଙ୍କୁ ଧମକାଇ ରଖୁଥିଲା। ଟିମା ଦ୍ୱିତୀୟ ବିବାହ କରିଛି। ତାର ସ୍ତ୍ରୀ ସମ୍ବଲପୁରର ଯମନପୁରା ଅଞ୍ଚଳରେ ରହୁଛି। ସେ କେତେ ବେଳେ ରାସନପୁରାରେ ରହୁଥିଲା ତ କେତେବେଳେ ଯମନପୁରାରେ ରହୁଥିଲା। ସେ ହ୍ୱାଟସପ୍ ଓ ଫେସବୁକ୍ ବ୍ୟବହାର କରେ ନାହିଁ। ଆମେ ଟିମା ଘରେ ବହୁଥର ଘରେ ଚଢ଼ଉ କରିଛୁ। ହେଲେ ତାକୁ ଧରିବାରେ ସଫଳ ହୋଇ ନଥିଲୁ। କିନ୍ତୁ ଶେଷରେ ଗତକାଲି ତାକୁ ଧରିବାରେ ସଫଳ ହୋଇଥିଲୁ।
ତିନି ବର୍ଷ ତଳେ ପୁଲିସକୁ ଚକମା ଦେଇ ଖସିଯାଇଥିବା ଅପରାଧୀ ଧନେଶ୍ୱର ଝାଙ୍କର ଓରଫ ଟିମାକୁ ଗିରଫ କରିଛି ପୁଲିସ୍
