ଆନ୍ଧ୍ର-ଓଡ଼ିଶା ସୀମାରେ ଥିବା ଅଞ୍ଚଳ ବାସୀଙ୍କ ଦାବିକୁ ନଜରରେ ରଖି ପ୍ରଶାସନ ପକ୍ଷରୁ ବିଭିନ୍ନ ଉନ୍ନୟନ ମୂଳକ କାର୍ୟ୍ୟକ୍ରମ ଆରମ୍ଭ

ଗଜପତି, (ବାଘୁଆବାର୍ତ୍ତା): ଆନ୍ଧ୍ର-ଓଡ଼ିଶା ସୀମାକୁ ନେଇ ଲାଗି ରହିଥିବା ବିବାଦର ସ୍ଥାୟୀ ସମାଧାନ ପାଇଁ ପଦକ୍ଷେପ ନେଉନି ପ୍ରଶାସନ । ଘଟଣାର ଏତେ ଦିନ ପରେବି ବିବାଦୀୟ ଅଞ୍ଚଳରେ ପାଦ ପଡ଼ିଲାଣି କିମ୍ବା ଅଞ୍ଚଳ ବାସୀଙ୍କ ଦୁଃଖ ଶୁଣିବାକୁ ସମୟ ପାଇ ପାରିଲେନି ପ୍ରଶାସନ । ମାତ୍ର ଅଞ୍ଚଳ ବାସୀଙ୍କ ଦାବିକୁ ନଜରରେ ରଖି ପ୍ରଶାସନ ପକ୍ଷରୁ ବିଭିନ୍ନ ଉନ୍ନୟନ ମୂଳକ କାର୍ୟ୍ୟକ୍ରମ ହାତକୁ ନେଇଥିବା ସାମ୍ବାଦିକ ସମ୍ମିଳନୀରେ ସୁଚନା ଦେଇଛନ୍ତି ଅତିରିକ୍ତ ଜିଲ୍ଲାପାଳ ସଂଗ୍ରାମ ଶେଖର ପଣ୍ଡା । ସୀମାନ୍ତ ପଞ୍ଚାୟତ ବାସୀଙ୍କ ଦାବି ମୁତାବକ ଓଡିଶା ଦେଇ ଯୋଗାଯୋଗ ପାଇଁ ୯ କୋଟି ୬୫ ଲକ୍ଷ ଟଙ୍କା ମଞ୍ଜୁର କରି ରାସ୍ତା ନିର୍ମାଣ କାର୍ୟ୍ୟ ଆରମ୍ଭ ହୋଇଛି, ଗଙ୍ଗାବାଡ ଓ ମାଣିକପାଟଣା ଗ୍ରାମରେ ୧୭ଲକ୍ଷ ବ୍ୟୟରେ ଘରେ ଘରେ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଣ, ୮ଲକ୍ଷ ବ୍ୟୟରେ ସ୍ଥାନେ ସ୍ଥାନେ ସୋଲାର ଲାଇଟ ସ୍ଥାପନ, ୧କୋଟି ୭୧ ଲକ୍ଷ ବ୍ୟୟରେ ଏକ ବାତ୍ୟା ଆଶ୍ରୟସ୍ଥଳୀ ନିର୍ମାଣ କାର୍ୟ୍ୟ ଆରମ୍ଭ ହୋଇଛି, ଚମ୍ପାପୁର ଠାରୁ ଗଙ୍ଗା ବାଡ଼ ପର୍ୟ୍ୟନ୍ତ ୨.୫ କିମି ରାସ୍ତାରେ ୫କୋଟି ୪୦ ଲକ୍ଷ ବ୍ୟୟରେ ଗ୍ରାମ୍ୟ ସଡ଼କ ନିର୍ମାଣ ପାଇଁ ଅର୍ଥ ମଞ୍ଜୁର ହୋଇଛି । ଏଥିସହିତ ଅଞ୍ଚଳବାସୀଙ୍କ ଜୀବନ ଜୀବିକା ପାଇଁ ୧୦୦ ଟି ପରିବାରକୁ କୁକୁଡ଼ା ଓ ୩୦ ଟି ପରିବାରକୁ ଛେଳି ପାଳନ, ତିନୋଟି ସ୍ବୟଂ ସହାୟକ ଗୋଷ୍ଠୀକୁ ରଙ୍ଗିନ ମାଛ ଚାଷରେ ସାମିଲ କରାଯିବା ସହ ସମନ୍ଵିତ ଆଦିବାସୀ ଉନ୍ନୟନ ସଂସ୍ଥା ପକ୍ଷରୁ ଅଞ୍ଚଳର କୃଷି ଉତ୍ପାଦିତ ଓ ଜଙ୍ଗଲ ଜାତ ଦ୍ରବ୍ୟର ମାର୍କେଟ ବ୍ୟବସ୍ଥା କରାଯାଇ ଲୋକଙ୍କ ବିକାଶ କ୍ଷେତ୍ରରେ ସହାୟକ ହେବାକୁ ଲକ୍ଷ୍ୟ ରଖିଥିବା କହିଛନ୍ତି ଜିଲ୍ଲାପାଳ ।