ଗଜପତି ଜିଲ୍ଲାରେ ବାତ୍ୟା ‘ଗୁଲାବ’ର ପ୍ରଭାବରେ ବିଭିନ୍ନ ସ୍ଥାନରେ ଗଛ ପଡି ରାସ୍ତା ଅବରୋଧ

ମୋହନା, (ବାଘୁଆବାର୍ତ୍ତା): ଗଜପତି ଜିଲ୍ଲାରେ ବାତ୍ୟା ‘ଗୁଲାବ’ର ପ୍ରଭାବ ଦେଖିବାକୁ ମିଳିଛି । ରବିବାରଠାରୁ ବର୍ଷାସହ ପବନ ଲାଗିରହିଥିବା ବେଳେ ବିଭିନ୍ନ ସ୍ଥାନରେ ଗଛ ପଡି ରାସ୍ତା ଅବରୋଧ ହୋଇଛି । ରବିବାର ରାତିରେ ମୋହନା ବ୍ଲକର ମାଣିକପୁରଠାରେ ବିଶାଳ ଗଛ ପଡିବା ଯୋଗୁଁ ମୋହନା-ପାରଳାଖେମୁଣ୍ଡି ମଧ୍ୟରେ ଯାତାୟାତ ଠପ୍ ହୋଇଥିଲା । ସେହିଭଳି ପିଣ୍ଡିକି ନିକଟରେ ଗଛ ପଡିଥିବା ବେଳେ ଲିଲିଗଡ଼ଠାରେ ମଧ୍ୟ ଗଛ ପଡି ମୋହନା-ବ୍ରହ୍ମପୁର ମଧ୍ୟରେ ରାସ୍ତା ଅବରୋଧ ହୋଇଛି । ଏଥିସହ ତଲାସିଙ୍ଗ ଗାଁ ନିକଟରେ ମଧ୍ୟ ଗଛ ପଡି ରାସ୍ତା ଅବରୋଧ ହୋଇଥିଲା । ସେହିପରି ଆର. ଉଦୟଗିରି ବ୍ଲକ୍ ଚମ୍ପା ଘାଟିରେ ଗଛ ପଡି ୩୨୬ ନମ୍ବର ଜାତୀୟ ରାଜପଥ ଅବରୋଧ ହୋଇଥିଲା । ତେବେ ଅଗ୍ନିଶମ ବାହିନୀ, ଓଡ୍ରାଫ ଟିମ୍ ଓ ପୋଲିସ ବାହିନୀ ଘଟଣାସ୍ଥଳରେ ପହଞ୍ଚି ଗଛ କାଟିବା ସହ ରାସ୍ତା ସ୍ଵାଭାବିକ କରିଛନ୍ତି ।