ଭୁବନେଶ୍ୱର, (ବାଘୁଆବାର୍ତ୍ତା): ବାତ୍ୟା ‘ଗୁଲାବ’ ଲ୍ୟାଣ୍ଡଫଲ୍ ପ୍ରକ୍ରିୟା ଆରମ୍ଭ ହୋଇଛି। ଦୀର୍ଘ ୩ ଘଣ୍ଟା ଧରି ଚାଲିବ ଲ୍ୟାଣ୍ଡଫଲ୍ ପ୍ରକ୍ରିୟା। ଆଜି ରାତି ୯ଟାରୁ ୯ଟା ୩୦ ମଧ୍ୟରେ ସରିବ ଲ୍ୟାଣ୍ଡଫଲ୍ ପ୍ରକ୍ରିୟା। ବାତ୍ୟା ‘ଗୁଲାବ’ ଆନ୍ଧ୍ରପ୍ରଦେଶର କଳିଙ୍ଗପଟ୍ଟନମଠାରୁ ୨୫ କିମି ଦୂର ଟେକାଲି ଓ ମୋଡ଼ିଗୁଡ଼ା ମଝିରେ ସ୍ଥଳଭାଗ ଅତିକ୍ରମ କରିବ। ଏନେଇ ସୂଚନା ଦେଇଛନ୍ତି SRC ପ୍ରଦୀପ ଜେନା। ସେ କହିଛନ୍ତି-“ଦିନ ୧୨ଟାରୁ ବାତ୍ୟାର ବେଗ ବଢ଼ିବାରୁ ୩ ଘଣ୍ଟା ଆଗରୁ ଲ୍ୟାଣ୍ଡଫଲ ହୋଇଛି। ଏହାର ପ୍ରଭାବରେ ଗଜପତିରେ ସାମାନ୍ୟରୁ ମଧ୍ୟମ ବର୍ଷା ଆରମ୍ଭ ହୋଇଛି। ଗଜପତିରେ ୩୦/୪୦ କିମି ବେଗରେ ପବନ ବହୁଛି। କୌଣସିଠାରେ ଅତି ବର୍ଷା ଓ ପବନର ସୂଚନା ନାହିଁ। ତେବେ ଗଞ୍ଜାମ, ଗଜପତି, ରାୟଗଡ଼ା, କନ୍ଧମାଳ, କୋରାପୁଟରେ ଅଧିକ ବର୍ଷା ଓ ପବନ ନାହିଁ। ବର୍ଷା ଓ ପବନ ନଥିବାରୁ ଲୋକେ ସ୍ଥାନାନ୍ତର ପାଇଁ ଆଗ୍ରହ ଦେଖାଉ ନାହାନ୍ତି।” ଲୋକଙ୍କୁ ସ୍ଥାନାନ୍ତର ନେଇ ଶ୍ରୀ ଜେନା କହିଛନ୍ତି-“ବର୍ତ୍ତମାନ ସୁଦ୍ଧା ୧୬ ହଜାର ଲୋକଙ୍କୁ ସ୍ଥାନାନ୍ତର କରାଯାଇଛି। ୬୦୦ ଜଣ ଗର୍ଭବତୀ, ବୃଦ୍ଧ ଓ ଭିନ୍ନକ୍ଷମଙ୍କୁ ସ୍ଥାନାନ୍ତର କରାଯାଇଛି। ଆସନ୍ତା କାଲି ପୂର୍ବାହ୍ନ ସୁଦ୍ଧା ବାତ୍ୟା ‘ଗୁଲାବ’ ଓଡ଼ିଶା ଅତିକ୍ରମ କରିବ। ତେବେ କାଲି ମଧ୍ୟାହ୍ନ ଯାଏଁ ସତର୍କ ରହିବାକୁ ପଡ଼ିବ।” ସେପଟେ ବାତ୍ୟା ‘ଗୁଲାବ’ ଲ୍ୟାଣ୍ଡଫଲ୍ ପୂର୍ବରୁ ଗଜପତି ଜିଲ୍ଲାରେ ଅଘଟଣ ଘଟିଛି। ଗୁମ୍ମା ବ୍ଳକରେ ରାସ୍ତା ଉପରକୁ ଧସିଛି ମାଟି ଅତଡ଼ା। ଭୂସ୍ଖଳନ ଫଳରେ ନାମନଗଡରୁ ଅଜୟଗଡ଼ ମଧ୍ୟରେ ଯାତାୟାତରେ ସମସ୍ୟା ଉପୁଜିଛି। ଜିଲ୍ଲା ପ୍ରଶାସନ ଓ ରେସ୍କ୍ୟୁ ଟିମ୍ ସ୍ଥିତି ସ୍ୱଭାବିକ କରିବାରେ ଲାଗିଛନ୍ତି। ସେପଟେ ବାତ୍ୟା ସହ ଭୁସ୍ଖଳନ ବିପଦ ଏଡ଼ାଇବାକୁ ରାଇପାଙ୍କା ଅଂଚଳର ପାହାଡ଼ ତଳେ ବସବାସ କରୁଥିବା ଲୋକଙ୍କୁ ଅସ୍ଥାୟୀ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି। ରାଇପାଙ୍କା ପଞ୍ଚୟତର କଡ଼କଡ଼ମା, ମାନ୍ଦ୍ରାବାଜୁ ଗାଁର ପ୍ରାୟ ୫୦ଟି ଘରକୁ ଆଶ୍ରୟସ୍ଥଳୀକୁ ଅଣାଯାଇଥିବା ବେଳେ କେ.ସୀତାପୁର ସ୍କୁଲରେ ମଧ୍ୟ ଶତାଧିକ ଲୋକଙ୍କୁ ଆଶ୍ରୟ ଦିଆଯାଇଛି। ଗଜପତି ଜିଲ୍ଲାପାଳ ନିଜେ କେ.ସୀତାପୁର ବାତ୍ୟା ଆଶ୍ରୟସ୍ଥଳକୁ ଯାଇ ସ୍ଥିତି ପରଖିଛନ୍ତି।
ବାତ୍ୟା ‘ଗୁଲାବ’ ଟେକାଲି ଓ ମୋଡ଼ିଗୁଡ଼ା ମଝିରେ ସ୍ଥଳଭାଗ ଅତିକ୍ରମ କରିବ
