ଭୁବନେଶ୍ୱର, (ବାଘୁଆବାର୍ତ୍ତା): ପାରଳାଖେମୁଣ୍ଡି ସହକାରୀ ବନ ସଂରକ୍ଷକ(ଏସିଏଫ୍) ସୌମ୍ୟରଞ୍ଜନ ମହାପାତ୍ରଙ୍କ ମୃତ୍ୟୁ ମାମଲାରେ ଆଉ ପାଦେ ଆଗେଇଛି କ୍ରାଇମ୍ବ୍ରାଞ୍ଚ । ଏହି ଘଟଣାରେ ଡିଏଫ୍ଓ ସଂଗ୍ରାମ କେଶରୀ ବେହେରାଙ୍କର ହୋଇଛି ଲାଇ ଡିଟେକ୍ସନ ଟେଷ୍ଟ । ତା’ପୁଣି ଲୁଚାଛପାରେ । କାଳେ ଗଣମାଧ୍ୟମ ପ୍ରତିନିଧି ଜାଣିଯିବେ, ସେଥିପାଇଁ ଏମିତି କରିଛି କ୍ରାଇମ୍ବ୍ରାଞ୍ଚ । ଭୁବନେଶ୍ୱର ରସୁଲଗଡ଼ରେ ଥିବା ଫୋରେନ୍ସିକ୍ ଲ୍ୟାବରେ ଏହି ଟେଷ୍ଟ୍ କରାଯାଇଛି । ପ୍ରାୟ ୩ ଘଣ୍ଟାକାଳ ପରୀକ୍ଷାରେ ତାଙ୍କୁ ୬୦ରୁ ଅଧିକ ପ୍ରଶ୍ନ ପଚରା ଯାଇଥିବା ସୂଚନା ମିଳିଛି । ଏଥି ସହ ସୌମ୍ୟଙ୍କ ରୋଷେୟା ମନ୍ମଥ କୁମ୍ଭଙ୍କର ମଧ୍ୟ ଲାଇ ଡିଟେକ୍ସନ ଟେଷ୍ଟ ହୋଇଥିବା ଜଣାପଡିଛି । ପୋଡ଼ି ହୋଇ ଗୁରୁତର ସୌମ୍ୟଙ୍କ ଜୁଲାଇ ୧୩ ତାରିଖ ସକାଳେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା । ପ୍ରଥମେ ପୁଲିସ୍ ଡିଏଫ୍ଓ ସଂଗ୍ରାମ, ପତ୍ନୀ ବିଦ୍ୟାଭାରତୀ, ରୋଷେୟା ଓ ଅନ୍ୟମାନଙ୍କୁ ଜେରା କରିଥିଲା । ହେଲେ ଅଳ୍ପ କିଛି ଦିନ ମଧ୍ୟରେ ପୁଲିସ୍ ଡିଏଫ୍ଓଙ୍କୁ କ୍ଲିନ୍ ଚିଟ୍ ଦେଇଥିଲା । ସୌମ୍ୟଙ୍କ ଘର ଲୋକ ପୁଲିସ୍ର ତଦନ୍ତରେ ସନ୍ତୁଷ୍ଟ ନଥିଲେ । ସେଥିପାଇଁ କ୍ରାଇମ୍ବ୍ରାଞ୍ଚ ସୌମ୍ୟଙ୍କ ମୃତ୍ୟୁ ମାମଲାର ତଦନ୍ତ ଭାର ନେଇଥିଲା । କ୍ରାଇମ୍ବ୍ରାଞ୍ଚ ଜେରା ସମୟରେ ଡିଏଫ୍ଓ ସଂଗ୍ରାମ ଓ ବିଦ୍ୟାଭାରତୀଙ୍କ କଥାରେ କୌଣସି ସାମଞ୍ଜସ୍ୟ ନଥିଲା । ଏହାରି ଭିତରେ ରାତି ଜଗୁଆଳିଙ୍କ ବିସ୍ଫୋରକ ବୟାନ ପୂରା ଘଟଣାକୁ ଓଲଟ ପାଲଟ କରି ଦେଇଥିଲା । ରାତି ଜଗୁଆଳି କହିଥିଲେ, ସେ ଡିଏଫ୍ଓଙ୍କୁ ବିଦ୍ୟାଭାରତୀଙ୍କ ଘରକୁ ରାତିରେ ଯିବା ଦେଖିଥିଲେ । ଏହାପରେ କ୍ରାଇମ୍ବ୍ରାଞ୍ଚ ଅଧିକ ସକ୍ରିୟ ହୋଇଥିଲା । ସୌମ୍ୟଙ୍କ ମୃତ୍ୟୁରେ ଯେଉଁମାନଙ୍କ ଲିଙ୍କ୍ ରହିଛି ସେମାନଙ୍କର ଲାଇ ଡିଟେକ୍ସନ ଟେଷ୍ଟ କରିବାକୁ କୋର୍ଟରେ ଆବେଦନ କରିଥିଲା । ଅନୁମତି ମିଳିବା ପରେ ଶନିବାର ଦିନ ପ୍ରଥମ ଦିନରେ ଡିଏଫ୍ଓ ଓ ରୋଷେୟାଙ୍କ ଲାଇ ଡିଟେକ୍ସନ ଟେଷ୍ଟ କରା ଯାଇଥିଲା । ଶନିବାର ପୂର୍ବାହ୍ନରେ ୨ଜଣଙ୍କୁ ଆଣି ବିଭିନ୍ନ ପ୍ରଶ୍ନର ଉତ୍ତର ଖୋଜା ଯାଇଥିଲା । ଡିଏଫ୍ଓ ସଂଗ୍ରାମ ପୂର୍ବରୁ କ୍ରାଇମ୍ବ୍ରାଞ୍ଚକୁ ଦେଇଥିବା ଉତ୍ତର ଓ ଆଜିର କଥାରେ ତାଳମେଳ ନଥିଲା ବୋଲି କ୍ରାଇମ୍ବ୍ରାଞ୍ଚର ଜଣେ ବରିଷ୍ଠ ଅଧିକାରୀ କହିଛନ୍ତି । ପ୍ରକାଶ ଥାଉ କି, ଜୁଲାଇ ୧୨ ତାରିଖ ରାତିରେ ସୌମ୍ୟଙ୍କ ଦେହରେ ନିଆଁ ଲାଗି ଯାଇଥିଲା । ଏନେଇ ସୌମ୍ୟଙ୍କ ପତ୍ନୀ ବିଦ୍ୟା ଭାରତୀ ପଡ଼ୋଶୀଙ୍କୁ ଜଣାଇଥିଲେ । ସୌମ୍ୟଙ୍କୁ ଗୁରୁତର ଅବସ୍ଥାରେ ନିଆଯାଇ ପାରଳାଖେମୁଣ୍ଡି ମେଡ଼ିକାଲରେ ଭର୍ତ୍ତି କରା ଯାଇଥିଲା । ସେଠାରେ ତାଙ୍କର ସ୍ୱାସ୍ଥ୍ୟ ଅବସ୍ଥା ସଂକଟାପନ୍ନ ହେବାରୁ ତାଙ୍କ ପ୍ରଥମେ ବ୍ରହ୍ମପୁର ଓ ପରେ କଟକର ଏକ ଘରୋଇ ମେଡିକାଲକୁ ସ୍ଥାନାନ୍ତରିତ କରା ଯାଇଥିଲା । ୧୩ ତାରିଖ ସକାଳେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା ।
ଲୁଚାଛପାରେ ଡିଏଫ୍ଓଙ୍କ ଲାଏ ଡିଟେକ୍ସନ ଟେଷ୍ଟ୍, ୩ ଘଣ୍ଟାରେ ପଚରା ଗଲା ୬୦ରୁ ଅଧିକ ପ୍ରଶ୍ନ
