ନିଜ ଜମିରେ ପଡୋଶୀଙ୍କ ଲାଟିନ୍ ପାଣି ଛାଡିବାକୁ ବିରୋଧ କରିବାରୁ ମହିଳାଙ୍କୁ ଗାଁ ଦାଣ୍ଡରେ ମାଡ଼

ନିଶ୍ଚିନ୍ତକୋଇଲି, (ବାଘୁଆବାର୍ତ୍ତା): ନିଜ ଜମିରେ ପଡୋଶୀଙ୍କ ଲାଟିନ୍ ପାଣି ଛାଡିବାକୁ ବିରୋଧ କରିବାରୁ ମହିଳାଙ୍କୁ ଗାଁ ଦାଣ୍ଡରେ ମାଡ଼ ମାରି ଲହୁଲୁହାଣ କରିଦେଲେ ପଡୋଶୀ। କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା ଗୋପପୁର ଗାଁରେ ଘଟିଛି ଏଭଳି ଅଭାବନୀୟ ଘଟଣା। ଗୋପପୁର ଗାଁର କୃଷ୍ଣଚନ୍ଦ୍ର ଦାସ ଓ ବଟକୃଷ୍ଣ ଦାସଙ୍କ ଲାଟିନ ପାଣି ସୁଶୀଳା ଦାସଙ୍କ ଜମିରେ ଛାଡିବାରୁ ସେ ଏହାକୁ ବିରୋଧ କରିଥିଲେ। ଫଳରେ ଉଭୟ ପଡୋଶୀଙ୍କ ମଧ୍ୟରେ ଉଚ୍ଚବାଚ ହୋଇଥିଲା। ଏହାପରେ ଝଗଡ଼ା ଉଗ୍ର ରୂପ ନେବାରୁ ପଡୋଶୀ ବଟକୃଷ୍ଣ ଓ କୃଷ୍ଣଚନ୍ଦ୍ର ସୁଶୀଳାଙ୍କୁ ଏକ କାଠ ଫାଳିଆରେ ମାଡ଼ ମାରି ଲହୁଲୁହାଣ କରି ପକାଇଛନ୍ତି। ଗାଁ ଦାଣ୍ଡରେ ସୁଶୀଳା ଅନେକ ସମୟ ଧରୁ ମୁର୍ମୂଷ ଅବସ୍ଥାରେ ପଡି ରହିଥିଲେ। ଏହାପରେ ଗାଁ ଲୋକମାନଙ୍କ ସହାୟତାରେ ସୁଶୀଳାଙ୍କୁ ନିଶ୍ଚିନ୍ତକୋଇଲି ସ୍ଵାସ୍ଥ୍ୟକେନ୍ଦ୍ରକୁ ପଠାଯାଇଥିଲା। ଏହି ଖବର ପାଇ ସୁଶୀଳାଙ୍କ ଝିଅ ନିଶ୍ଚିନ୍ତକୋଇଲି ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଅଭିଯୁକ୍ତ କୃଷ୍ଣଚନ୍ଦ୍ର ଓ ବଟକୃଷ୍ଣଙ୍କୁ ଅଟକ ରଖି ପଚରାଉଚୁରା କରୁଛି।