କଟକ, (ବାଘୁଆବାର୍ତ୍ତା): କରୋନା ସଂକ୍ରମଣଜନିତ ଆଶଙ୍କାକୁ ଦୃଷ୍ଟିରେ ରଖି ଚଳିତ ବର୍ଷ ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ପକ୍ଷରୁ ନବମ ଓ ଦଶମ ଶ୍ରେଣୀ ପାଠ ପଢା ଓ ପରୀକ୍ଷା ଢାଞ୍ଚାରେ ପରିବର୍ତ୍ତନ କରାଯାଇଛ । ଏହି କ୍ରମରେ ବୋର୍ଡ ପକ୍ଷରୁ ନୂତନ ପରୀକ୍ଷା ଢାଞ୍ଚା ପ୍ରସ୍ତୁତ କରାଯାଇଛି। ଚଳିତ ଶିକ୍ଷା ବର୍ଷ ୨୦୨୧-୨୨ ଜୁଲାଇରୁ ଆରମ୍ଭ ହୋଇ ଏପ୍ରିଲ୍ରେ ଶେଷ ହେବ ବୋଲି ବୋର୍ଡ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି। ବିଜ୍ଞପ୍ତି ଅନୁସାରେ, ଶିକ୍ଷା ବର୍ଷକୁ ଦୁଇଟି ପର୍ୟ୍ୟାୟ(ଟର୍ମ)ରେ ବିଭକ୍ତ କରାଯାଇଛି। ପ୍ରଥମ ପର୍ୟ୍ୟାୟ ଶିକ୍ଷାଦାନ ଜୁଲାଇରୁ ନଭେମ୍ବର ଯାଏ ଓ ଦ୍ୱିତୀୟ ପର୍ୟ୍ୟାୟ ଶିକ୍ଷାଦାନ ଡିସେମ୍ବରରୁ ଏପ୍ରିଲ୍ ପର୍ୟ୍ୟନ୍ତ ଚାଲିବ। ଗତବର୍ଷ ପରି ଚଳିତ ବର୍ଷ ୭୦ ପ୍ରତିଶତ ପାଠ୍ୟକ୍ରମ ପଢାଯିବ। ତେବେ ପାଠ୍ୟକ୍ରମର ଅବଧି ଓ ଶିକ୍ଷାଦାନ କ୍ରମ ନେଇ ବୋର୍ଡ ପକ୍ଷରୁ ଖୁବ ଶୀଘ୍ର ଆଉ ଏକ ବିଜ୍ଞପ୍ତି ପ୍ରକାଶ ପାଇବ ବୋଲି ସୂଚନା ମିଳିଛି । ସେହିପରି ଚଳିତ ବର୍ଷ ମାଟ୍ରିକ ବିକଳ୍ପ ମୂଲ୍ୟାୟନକୁ ନେଇ ନାନା ବାଦବିବାଦକୁ ଦୃଷ୍ଟିରେ ରଖି ଚଳିତ ବର୍ଷ ମୂଲ୍ୟାୟନ ବ୍ୟବସ୍ଥାକୁ ନେଇ ବୋର୍ଡ ପକ୍ଷରୁ ସ୍ୱତନ୍ତ୍ର ନିର୍ଦ୍ଦେଶନାମା ଜାରି କରିଛି । ନବମ ଏବଂ ଦଶମ ଶ୍ରେଣୀର ଛାତ୍ରଛାତ୍ରୀଙ୍କ ଲାଗି ବିଦ୍ୟାଳୟରେ ଆଭ୍ୟନ୍ତରୀଣ ମୂଲ୍ୟାୟନ ୪ଟି ପର୍ୟ୍ୟାୟରେ କରାଯିବ । ଆଭ୍ୟନ୍ତରୀଣ ମୂଲ୍ୟାୟନ ଲାଗି ପ୍ରଥମ ପର୍ୟ୍ୟାୟ ମୂଲ୍ୟାଙ୍କନ ବା ପ୍ରଥମ ଆସେସ୍ମେଣ୍ଟ୍ ସେପ୍ଟେମ୍ବର ଦ୍ୱିତୀୟ ସପ୍ତାହରେ ବିଦ୍ୟାଳୟରେ କରାଯିବ । ସେହିପରି ଦ୍ୱିତୀୟ ଆସେସମେଣ୍ଟ୍ ନଭେମ୍ବର ପ୍ରଥମ ସପ୍ତାହ, ତୃତୀୟ ଆସେସ୍ମେଣ୍ଟ୍ ଜାନୁଆରୀ ଦ୍ୱିତୀୟ ସପ୍ତାହ ଏବଂ ଚତୁର୍ଥ ଆସେସ୍ମେଣ୍ଟ୍ ମାର୍ଚ୍ଚ ଦ୍ୱିତୀୟ ସପ୍ତାହରେ କରାଯିବ ବୋଲି ବୋର୍ଡ ପକ୍ଷରୁ ସମୟ ସୀମା ଧାର୍ୟ୍ୟ କରାଯାଇଛି । ଅନ୍ୟପକ୍ଷରେ ଚଳିତ ଶିକ୍ଷା ବର୍ଷରେ ନବମ ଏବଂ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ଲାଗି ଦୁଇଟି ପର୍ୟ୍ୟାୟରେ ପରୀକ୍ଷା କରାଯିବ । ପ୍ରଥମ ପର୍ୟ୍ୟାୟ(ଟର୍ମ) ପରୀକ୍ଷା ନଭେମ୍ବର ଶେଷ ସପ୍ତାହରେ ଓ ଦ୍ୱିତୀୟ ପର୍ୟ୍ୟାୟ ପରୀକ୍ଷା ଏପ୍ରିଲ୍ ଦ୍ୱିତୀୟ ସପ୍ତାହରେ ହେବ । ବୋର୍ଡ ଦ୍ୱାରା ପ୍ରସ୍ତୁତ ପ୍ରଶ୍ନପତ୍ରରେ ପରୀକ୍ଷାର୍ଥୀମାନେ ପରୀକ୍ଷା ଦେବେ । ପ୍ରଥମ ପର୍ୟ୍ୟାୟ ପରୀକ୍ଷା ୩୦ ପ୍ରତିଶତ ନମ୍ବର ଏବଂ ଦ୍ୱିତୀୟ ପର୍ୟ୍ୟାୟ ପରୀକ୍ଷା ୫୦ ପ୍ରତିଶତ ମାର୍କ ସମ୍ବଳିତ ପରୀକ୍ଷା ହେବ ବୋଲି ବୋର୍ଡ ପକ୍ଷରୁ ସୂଚନା ଦିଆଯାଇଛି । ପ୍ରତି ପରୀକ୍ଷା ଲାଗି ପରୀକ୍ଷାର୍ଥୀମାନଙ୍କୁ ଅନ୍ଲାଇନ୍ରେ ଫର୍ମ ପୂରଣ କରିବାକୁ ହେବ । ଉକ୍ତ ଦୁଇଟି ପର୍ୟ୍ୟାୟ ମାର୍କ ସହ ବିଦ୍ୟାଳୟ ପକ୍ଷରୁ ହୋଇଥିବା ଆଭ୍ୟନ୍ତରୀଣ ମୂଲ୍ୟାୟନର ୨୦ ପ୍ରତିଶତ ମାର୍କକୁ ମିଶାଇ ପରୀକ୍ଷାର୍ଥୀଙ୍କର ସମୁଦାୟ ମୂଲ୍ୟାୟନ ହେବ ବୋଲି ସୂଚନା ମିଳିଛି । କରୋନା ସଂକ୍ରମଣ ଯୋଗୁଁ ଗତବର୍ଷ ବିଦ୍ୟାଳୟରେ ପରୀକ୍ଷା ବାତିଲ୍ ହୋଇଥିଲା । ବିକଳ୍ପ ମୂଲ୍ୟାୟନ ବ୍ୟବସ୍ଥାରେ ଛାତ୍ରଛାତ୍ରୀଙ୍କ ଫଳ ପ୍ରକାଶ କରାଯାଇଥିଲା । ବିକଳ୍ପ ମୂଲ୍ୟାୟନ ବ୍ୟବସ୍ଥାରେ ମାଟ୍ରିକ୍ ଫଳ ପ୍ରକାଶନକୁ ନେଇ ରାଜ୍ୟରେ ବହୁ ବିବାଦ ମୁଣ୍ଡ ଟେକିଥିଲା । ଆଗାମୀ ଦିନରେ କରୋନା ସଂକ୍ରମଣର ସ୍ଥିତି କ’ଣ ହେବ ତାହା ସ୍ପଷ୍ଟ ନୁହେଁ । ତେଣୁ ଚଳିତ ବର୍ଷ ଯେପରି ଏସବୁ ବିବାଦ ସ୍ଥିତି ସୃଷ୍ଟି ନହେବ ସେଥିପାଇଁ ପାଠ୍ୟକ୍ରମ ପ୍ରସ୍ତୁତି, ଶିକ୍ଷାଦାନ, ପରୀକ୍ଷା ଓ ବିକଳ୍ପ ମୂଲ୍ୟାୟନ ନେଇ ବୋର୍ଡ କର୍ତ୍ତୃପକ୍ଷ ଏଇଭଳି ଅନେକ ନୂତନ ନିଷ୍ପତ୍ତି ନେଇଛି । ଚଳିତବର୍ଷ ନବମ ଏବଂ ଦଶମ ପରୀକ୍ଷାରେ ବୋର୍ଡ ଅନେକ ନୂତନ ନିଷ୍ପତ୍ତି ନେଇଛି । ଦଶମ ଛାତ୍ରଛାତ୍ରୀଙ୍କ ପାଇଁ ଦୁଇଟି ପରୀକ୍ଷା କରାଯିବ । ପ୍ରତି ପର୍ୟ୍ୟାୟ ଶେଷରେ ଏହି ପରୀକ୍ଷା ହେବ।ଛାତ୍ରଛାତ୍ରୀମାନେ ବୋର୍ଡ ଦ୍ୱାରା ବଛାଯାଇଥିବା ସେଣ୍ଟରରେ ପରୀକ୍ଷା ଦେବା ପାଇଁ ଅନଲାଇନ୍ ଫର୍ମ ପୂରଣ କରିବେ । ନଭେମ୍ବର ଶେଷ ସପ୍ତାହରେ ପ୍ରଥମ ପରୀକ୍ଷା ହେବ । ଏହି ପରୀକ୍ଷା ୫୦ ମାର୍କରେ ହେବ । ଏଥିପାଇଁ ଗୋଟିଏ ଘଣ୍ଟା ସମୟ ନିର୍ଘଣ୍ଟ ରହିବ । ଛାତ୍ରଛାତ୍ରୀ ଓଏମ୍ଆର ଉତ୍ତର ଖାତାରେ ଉତ୍ତର ଦେବେ । ପ୍ରଶ୍ନଗୁଡ଼ିକ ପ୍ରଥମ ୫୦ ପ୍ରତିଶତ ପାଠ୍ୟକ୍ରମରୁ ପଡ଼ିବ । ଚୂଡାନ୍ତ ପରୀକ୍ଷା ଏପ୍ରିଲ ଶେଷ ସପ୍ତାହରେ ହେବ । ଏଥିର ୫୦ ମାର୍କ ମଲ୍ଟିପୁଲ୍ ଚୟସ ଏବଂ ୩୦ ମାର୍କ ସବଜେକ୍ଟିଭ୍ ପ୍ରଶ୍ନ ରହିବ । ଏହି ପ୍ରଶ୍ନଗୁଡ଼ିକ ସମ୍ପୂର୍ଣ୍ଣ ପାଠ୍ୟକ୍ରମ(ଦୁଇଟି ପର୍ୟ୍ୟାୟ ମିଶାଇ)ରୁ ପଡ଼ିବ । କୋଭିଡ୍ ସଂକ୍ରମଣ ଯୋଗୁଁ ପରୀକ୍ଷା ହୋଇନପାରିଲେ ପରୀକ୍ଷାର୍ଥୀମାନେ ଘରେ ବସି ପରୀକ୍ଷା ଦେବେ ବୋଲି ବୋର୍ଡ ପକ୍ଷରୁ ସୂଚନା ଦିଆଯାଇଛି ।
ନୂଆ ଢାଞ୍ଚାରେ ନବମ ଓ ଦଶମ ପରୀକ୍ଷା, ଅନଲାଇନରେ ହେବ ଫର୍ମ ପୂରଣ
