ଅସଦାଚରଣ ପରେ ଯୁବତୀଙ୍କ ଆତ୍ମହତ୍ୟା ଘଟଣାକୁ ନେଇ ତେଜିଲା ଅସନ୍ତୋଷ

ଭଦ୍ରକ, (ବାଘୁଆବାର୍ତ୍ତା): ଯୁବତୀଙ୍କୁ ଅସଦାଚରଣ ପାଇଁ ଥାନାରେ ଏତଲା ହୋଇଥିଲା । ଅଭିଯୁକ୍ତ ଜେଲ୍ ଯାଇ ବେଲ୍ ରେ ଆସିଲେ । କିନ୍ତୁ ଅପବାଦ ସହି ନପାରି ଯୁବତୀ ଆତ୍ମହତ୍ୟା କରିଥିବା ନେଇ ଥାନାରେ ପରିବାର ଲୋକଙ୍କ ଅଭିଯୋଗ ପରେ ବଢୁଛି ଅସନ୍ତୋଷ । ଭଦ୍ରକ ଜିଲ୍ଲା ପୁରୁଣାବଜାର ଥାନା ଅଧିନସ୍ଥ ମିର୍ଜାପୁର ସ୍ଥିତ ନାଥ ସାହିରେ ଏକ ଅଭାବନୀୟ ଘଟଣା ଘଟିଛି । ଲୋକ ଲଜ୍ଜା ସହି ନପାରି ଜନୈକ ଯୁବତୀ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଅଭିଯୋଗ ଅନୁଯାୟୀ ଦୋକାନକୁ ଚକୋଲେଟ୍ କିଣି ଯାଇଥିବା ବେଳେ ରାଜେନ୍ଦ୍ର ନାଥଙ୍କ ଝିଅଙ୍କୁ ଜନୈକ ବ୍ୟକ୍ତି ଦୋକାନ ଭିତରକୁ ଟାଣି ନେଇ ଅସଦାଚରଣ କରିଥିଲା । ତେବେ ପରିବାର ଲୋକ ପୁରୁଣାବଜାର ଥାନାରେ ଲିଖିତ ଏତଲା ଦେବା ପରେ ସେକ୍ ମୁସକିମ୍ ନାମକ ବ୍ୟକ୍ତିଙ୍କୁ ଗିରଫ କରଯାଇଥିଲା । ତେବେ କେସ୍ ଉଠାଇବା ପାଇଁ ରାଜେନ୍ଦ୍ର ନାଥଙ୍କୁ ଅର୍ଥ ପ୍ରଲୋଭନ ଦିଆଯାଇଥିବା ଅଭିଯୋଗ ଆଣିଛନ୍ତି ମୃତକଙ୍କ ବାପା । ଯୁବତୀଙ୍କ ଆତ୍ମହତ୍ୟା ପରେ ଏହାକୁ ଆଜି ତୀବ୍ର ବିରୋଧ କରି ତୁରନ୍ତ ସେକ୍ ମୁସକିମ୍ ଏବଂ ଯେଉଁମାନେ ଧମକ ଦେଇଛନ୍ତି ତାଙ୍କୁ ଗିରଫ କରାଯାଉ ବୋଲି ବିଜେପି ଜିଲ୍ଲା ଯୁବମୋର୍ଚ୍ଚା ସଭାପତି ବିକାଶ ଶ୍ରେଷ୍ଠା, ମହିଳା ମୋର୍ଚ୍ଚା ସଭାନେତ୍ରୀ ହରପ୍ରିୟା ସାହୁ ପ୍ରମୁଖ ଦାବି କରିଛନ୍ତି । ତେବେ ଆଗାମୀ ଦିନରେ ମୃତା ଯୁବତୀଙ୍କୁ ନ୍ୟାୟ ପାଇଁ ସୋସିଆଲ ମିଡିଆରେ ଜୋରଦାର କ୍ୟାମ୍ପେନ ଚାଲିଛି । ଏହାସହ ଭଦ୍ରକ ସହରରେ କ୍ୟାଣ୍ଡେଲ ଶୋଭାଯାତ୍ରା ମଧ୍ୟ କରାଯାଇଛି ।