ନୀଳଗିରି, (ବାଘୁଆବାର୍ତ୍ତା): ବାଲେଶ୍ଵର ଜିଲ୍ଲାର ବିଭିନ୍ନ ଅଞ୍ଚଳରେ ଦିନକୁ ଦିନ ଚୋରା ବେଆଇନ କରତ କଳ ବୃଦ୍ଧି ହେବାରେ ଲାଗିଛି। ବାଲେଶ୍ଵର ଡିଏଫଓଙ୍କ ନିର୍ଦେଶରେ ଏକ ଟିମ ଚଢ଼ାଉ କରି ଦୁଇଦିନରେ ଦୁଇଟି କରତ କଳ ଉପରେ ଚଢ଼ାଉ କରି ଲକ୍ଷ ଲକ୍ଷ ଟଙ୍କାର ମୂଲ୍ୟବାନ କାଠ ଓ ଯନ୍ତ୍ରାଂଶ ଜବତ କରାଯାଇଛି। ଫଳରେ ଚୋରା ବେପାରୀ ମାନେ ଛତ୍ରଭଙ୍ଗ ଦେଇଥିବା ଜଣାପଡିଛି। ରେମୁଣା ବ୍ଲକ ଅଧିନ ଗୋବିନ୍ଦପୁର ଅଞ୍ଚଳରେ ବହୁ ଦିନଧରି ବେଆଇନ କରତକଳ ଚାଲି ଆସୁଥିବା ବେଳେ ଡିଏଫଓ ବିମଲ ପ୍ରସନ୍ନ ଆଚାର୍ୟ୍ୟ ଙ୍କ ନିର୍ଦେଶରେ ନୀଳଗିରି ରେଞ୍ଜର ମନ୍ବର ଖାଁ ଙ୍କ ନେତୃତ୍ୱରେ ଏକ ଟିମ ଅଚାନକ ଚଢ଼ାଉ କରିବା ସହ ମୂଲ୍ୟବାନ ୬୫ ସିଫ୍ଟ କାଠ ଓ ଯନ୍ତ୍ରାଂଶ ଜବତ କରାଯାଇଛି।ଯାହାର ଆନୁମାନିକ ମୂଲ୍ୟ ମେସିନ ସାହାଯ୍ୟରେ ୫ ଲକ୍ଷ ଟଙ୍କା ହେବ ବୋଲି ଜଣାପଡିଛି। ଆଜି ମଧ୍ୟ ଅନୁରୂପ ଭାବେ ରେମୁଣା ବ୍ଲକ ଅଧିନ ସାହୁପଡା ଅଞ୍ଚଳ ପଦ୍ମପୁର ଗ୍ରାମରେ ଏକ ବେଆଇନ କରତକଳ ଉପରେ ଚଢ଼ାଉ କରିଥିଲେ। ସାଗୁଆନ,ଶାଳ, ନିମ୍ବ ସମେତ ବହୁ ମୂଲ୍ୟବାନ କାଠ ଯାହାର ଆନୁମାନିକ ମୂଲ୍ୟ ୫ଲକ୍ଷ ଟଙ୍କା ହେବ ବୋଲି ଜଣାପଡିଛି। ସେହିପରି ଲକ୍ଷାଧିକ ଟଙ୍କାର ଯନ୍ତ୍ରାଂଶ ଜବତ ହୋଇଥିବା ଜଣାପଡିଛି। ତେବେ କରତକଳକୁ ଜେସିବି ମେସିନ ସାହାଯ୍ୟରେ ଭାଙ୍ଗି ଦିଆଯାଇଥିବା ବେଳେ ଘଟଣା ସ୍ଥଳରୁ ଚୋରା ବେପାରୀ ଛତ୍ରଭଙ୍ଗ ଦେଇଥିବା ଜଣାପଡିଛି।ଏହି ଚଢ଼ାଉ ମାଜିଷ୍ଟ୍ରେଟଙ୍କ ଉପସ୍ଥିତିରେ ହୋଇଥିବା ବେଳେ ସୋର,ଚାନ୍ଦିପୁର,ନୀଳଗିରି ଓ କୂଳଡିହାର ବନ କର୍ମଚାରୀମାନେ ଉପସ୍ଥିତ ଥିଲେ।
