କୁତ୍ରା, (ବାଘୁଆବାର୍ତ୍ତା): ଦୀର୍ଘ ଦିନ ହେବ କୁତ୍ରା ବ୍ଲକ ଅନ୍ତର୍ଗତ ଖତକୁରବାହାଲ ମାଲପଡ଼ା ଠାରେ ବେଆଇନ ମହୁଲି ମଦ କାରବାର ଚାଲୁଥିବାବେଳେ ଘରେ ଘରେ ମଦ ତିଆରିକରି ଲୋକେ କୁତ୍ରା ବ୍ଲକର ବିଭିନ୍ନ ଗ୍ରାମକୁ ଚୋରା ଚାଲାଣ କରୁଥିଲେ। ଏବାବଦରେ ଜନସାଧାରଣଙ୍କ ଅଭିଯୋଗକୁ ଭିତ୍ତିକରି କୁତ୍ରା ପୁଲିସ , ସୁନ୍ଦରଗଡ଼ ଓ ସମ୍ବଲପୁର ଅବକାରୀ ବିଭାଗ ଏହା ଉପରେ ତୀକ୍ଷ୍ଣ ନଜର ରଖି ଆଜି ଭୋର ୪ ଟାରେ ସ୍ଥାନୀୟ ପୁଲିସ, ଅବକାରୀ ବିଭାଗ, ମାଜିଷ୍ଟ୍ରେଟ ଭାବେ ଅତିରିକ୍ତ ତହସିଲଦାର ହାବିଲ ଖାଖାଙ୍କ ସମେତ ଗଣ୍ଡଗୋଳ ଆଶଙ୍କା କରି ୨ ପ୍ଲାଟୁନ ପୋଲିସ ଫୋର୍ସ ସହ ଖତକୁରବାହାଲ ମାଲିପଡାରେ ଅତର୍କିତ ଚଢାଉ କରିଥିଲେ। ଏହି ସମୟରେ ୧୦ ହଜାର କେଜି ମହୁଲି ପୋଚ , ୫୦୦ ଲିଟର ମହୁଲି ମଦ ଜବତ କରାଯିବା ସହ ମଦ ତିଆରି ସାମଗ୍ରୀ ଡେଚକି, ଢକନ୍, ମୋଟର, ଡ୍ରମ ପ୍ରଭୃତି ଗୋଟିଏ ଟ୍ରକ ପରିମାଣର ସାମଗ୍ରୀ ଜବତ କରିବାସହ ୩ ଜଣଙ୍କୁ ଗିରଫ କରାଯାଇଛି। ଅନ୍ୟମାନେ ବର୍ଷା ହେଉଥିବା କାରଣରୁ ଫେରାର ହୋଇଯାଇଛନ୍ତି। ଗିରଫ ଅଭିଯୁକ୍ତ ମାନେ ହେଲେ ବାନା ସାହୁ (୪୭), ଭୁଖନାଥ ସାହୁ (୨୮) , ଓ ଲାଲମନି ସାହୁ (୪୦) ବୋଲି ଜଣାପଡ଼ିଛି । ଏହି ଚଢାଉରେ ଅବକାରୀ ଡେପୁଟି ସୁପରିଣ୍ଟେଣ୍ଡେଣ୍ଟ ନରୋତ୍ତମ ମିଶ୍ର, ଅବକାରୀ ଇନିସପେକ୍ଟର ସତ୍ୟଜିତ ଖଟୁଆ, ଶ୍ରୁତିକାନ୍ତ ରାଉତ, ବିପ୍ର ଚରଣ ମଣ୍ଡଳ ପ୍ରମୁଖ ନେତୃତ୍ବ ନେଇଥିଲେ ।
