ନୂଆଦିଲ୍ଲୀ, (ବାଘୁଆବାର୍ତ୍ତା): ଅଲିମ୍ପିକ୍ସରେ ଆରମ୍ଭ ହୋଇଛି ଭାରତର ସ୍ବର୍ଣ୍ଣିମ ଅଧ୍ୟାୟ । ଟୋକିଓ ଅଲିମ୍ପିକ୍ସରେ ଗୋଲ୍ଡ ମେଡାଲ ଜିତି ଇତିହାସ ରଚିଛନ୍ତି ନୀରଜ ଚୋପ୍ରା । ଜାଭ୍ଲିନ ଥ୍ରୋରେ ଗୋଲ୍ଡ ମେଡାଲ ଜିତି ୧୨୧ ବର୍ଷ ପରେ ଏହି ସଫଳତା ପାଇଛନ୍ତି ନୀରଜ ଚୋପ୍ରା । ମୋଟ ୭ ମେଡାଲ ସହ ଟୋକିଓ ଅଲିମ୍ପିକ୍ସ ଯାତ୍ରା ଶେଷ କରିଛି ଭାରତ । ନୀରଜ ଚୋପ୍ରା ସ୍ବର୍ଣ୍ଣ ଜିତିଛନ୍ତି ଏବଂ ତାଙ୍କ ବ୍ୟତିତ କୁସ୍ତିରେ ରବି ଦାହିୟା, ଭାରୋତ୍ତଳନରେ ମୀରାବାଈ ଚାନୁ ରୌପ୍ୟ ଜିତିଥିବା ବେଳେ , ହକି ରେ ଭାରତୀୟ ପୁରୁଷ ଟିମ, ବ୍ୟାଡମିଣ୍ଟନରେ ପିଭି ସିନ୍ଧୁ, କୁସ୍ତିରେ ବଜରଙ୍ଗ ପୁନିଆ ଏବଂ ବକ୍ସିଂରେ ଲବଲୀନା ବୋରଗୋହେନ ବ୍ରୋଞ୍ଜ ପଦକ ଜିତିଛନ୍ତି । ନୀରଜ ଗୋଲ୍ଡ ମେଡାଲ ପାଇବା ପରେ ଏବେ ଶୁଭେଚ୍ଛା ସହ ପୁରସ୍କାରର ସୁଅ ଛୁଟୁଛି । ହରିୟାଣା ସରକାର ୬ ପୁରସ୍କାର ଆକାରରେ ୬ କୋଟି ଟଙ୍କା ଦେବାକୁ ଘୋଷଣା କରିଛନ୍ତି । ଏହା ସହିତ କ୍ଲାସ୍-୧ ଚାକିରି ମଧ୍ୟ ପାଇବେ । କେବଳ ସେତିକି ନୁହେଁ, ହରିୟାଣାର ପଞ୍ଚକୁଲାରେ ସେଣ୍ଟର ଅଫ୍ ଏକ୍ସଲେନ୍ସ୍ ଫର୍ ଆଥ୍ଲେଟ୍ସ ଖୋଲାଯିବ ଯେଉଁଠାରେ ମୁଖ୍ୟଭାବେ ରହିବେ ନୀରଜ ଚୋପ୍ରା । ହରିୟାଣାରେ ୫୦ ପ୍ରତିଶତ ଖର୍ଚ୍ଚରେ ତାଙ୍କୁ ଏକ ପ୍ଳଟ୍ ମଧ୍ୟ ଦିଆଯିବ । ଏ ନେଇ ଘୋଷଣା କରିଛନ୍ତି ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ୍ ଖଟ୍ଟର । ରାଷ୍ଟ୍ରପତି ରାମନାଥ କୋବିନ୍ଦ, ନୀରଜ ଚୋପ୍ରାଙ୍କୁ ଅଭିନନ୍ଦନ ଜଣାଇଛନ୍ତି । ଟ୍ବିଟ୍ କରି ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି, ‘ଜାଭ୍ଲିନ୍ରେ ସ୍ବର୍ଣ୍ଣ ପଦକ ଜିତି ଇତିହାସ ରଚିଛନ୍ତି ନୀରଜ। ଏହା ସହିତ ଅଲିମ୍ପିକରେ ଦେଶ ପାଇଁ ପ୍ରଥମ ଐତିହାସିକ ମେଡାଲ ଜିତିଛନ୍ତି । ତାଙ୍କର ଅବଦାନ ଦେଶର ଯୁବ ପ୍ରତିଭାମାନଙ୍କୁ ପ୍ରେରଣା ଯୋଗାଇବ । ନୀରଜ ଚୋପ୍ରାଙ୍କୁ ହୃଦୟରୁ ଅଭିନନ୍ଦନ ।’
ନୀରଜ ଚୋପ୍ରାଙ୍କୁ ମିଳିବ ୬ କୋଟି ଟଙ୍କା ଏବଂ କ୍ଲାସ୍-୧ ଚାକିରି
