ଯୁବକଙ୍କୁ ଭୁଜାଲି ଦେଖାଇ ଧମକ ଦେବା ସହ ଟଙ୍କା ଓ ମୋବାଇଲ ଛଡ଼ାଇ ନେବା ଅଭିଯୋଗ

ନୀଳଗିରି, (ବାଘୁଆବାର୍ତ୍ତା): ଯୁବକଙ୍କୁ ଭୁଜାଲି ଦେଖାଇ ଧମକ ଦେବା ସହ ଟଙ୍କା ଓ ମୋବାଇଲ ଛଡ଼ାଇ ନେବା ଅଭିଯୋଗ ହୋଇଛି । ପୁଲିସ ଘଟଣାର ଖୋଳତାଡ଼ କରିବା ସହ ୨ ଯୁବକଙ୍କୁ ଅଟକ ରଖିଥିବା ଜଣାପଡିଛି । ଔପଦା ବ୍ଲକ ଈଶ୍ୱରପୁର ପଞ୍ଚାୟତ ଅଧୀନ ବାହାବଳପୁର ଶିବମନ୍ଦିର ପାଖରେ ମାଧବ ସେନାପତି ନାମକ ଯୁବକଙ୍କୁ ସୋର ଥାନା ଅଧୀନ ମୁଗୁନିପୁର ଅଞ୍ଚଳର ହିମାଂଶୁ ସ୍ୱାଇଁ, ହରିପୁର ଅଞ୍ଚଳର ପ୍ରଦୀପ ମଲ୍ଲିକ ଓ ବିଦୁ ଅଞ୍ଚଳର କଟି ମୁର୍ମୁ ତାଙ୍କୁ ଅଟକାଇ ଧମକ ଦେବା ସହ ଗାଳିଗୁଲଜ ଓ ମାରପିଟ୍‌ କରିଥିବାର ଅଭିଯୋଗ ହୋଇଛି। ଏପରିକି ଭୁଜାଲି ଦେଖାଇ ତାଙ୍କ ପାଖରେ ଥିବା ମୋବାଇଲ, ହାତ ଘଣ୍ଟା ଛଡ଼ାଇ ନେଇଥିବାର ମଧ୍ୟ ଅଭିଯୋଗ ଉଠିଛି । ମାଧବଙ୍କ କହିବା ଅନୁସାରେ ବାବୁ ନାମକ ଯୁବକଙ୍କ ସହିତ ତାଙ୍କର ପୂର୍ବ ଶତ୍ରୁତା ଥିବା ବେଳେ ସେ ଏହି ଯୁବକମାନଙ୍କ ଦ୍ୱାରା ଏଭଳି ଆକ୍ରମଣ କରାଇଛି। ଏଭଳି ଘଟଣାର ଏକ ଭିଡିଓ ଫୁଟେଜ୍‌ କେହି ଉତ୍ତୋଳନ କରିଥିବା ବେଳେ ଅଭିଯୋଗ ପାଇ ନୀଳଗିରି ପୁଲିସ ଫୁଟେଜ ଆଧାରରେ ତଦନ୍ତ ପୂର୍ବକ ହିମାଂଶୁ, ପ୍ରଦୀପକୁ ଥାନାରେ ଅଟକ ରଖିଛନ୍ତି ।