ଅନିର୍ଦ୍ଦିଷ୍ଟ କାଳ ପର୍ୟ୍ୟନ୍ତ ବନ୍ଦ ରହିବ ବାଲି ପରିବହନ

ଓଡ଼ଗାଁ,(ବାଘୁଆବାର୍ତ୍ତା): ବର୍ତ୍ତମାନର କରୋନା ମହାମାରୀ ସମୟରେ ହାଇୱା ଚାଳକ ଓ କର୍ମଚାରୀମାନେ ନାନା ଅସୁବିଧାରେ ରହିଛନ୍ତି । ସେମାନଙ୍କ ଜୀବନ ଜୀବିକା ଦୁର୍ବିସହ ହୋଇପଡ଼ିଛି । ଏହି ଦୁର୍ଦ୍ଦିନ ସମୟରେ କେନ୍ଦ୍ର ସରକାରଙ୍କର ଡିଜେଲ ଦର ବୃଦ୍ଧି ଅନେକଙ୍କୁ ବାଧୁଥିବା କହିଛନ୍ତି ନୟାଗଡ଼ ହାଇୱା ମାଲିକ ସଂଘ । ଏପରିକି ସେମାନଙ୍କ ଉପରେ ପଡ଼ି ରହିଥିବା ବକେୟା ଏବଂ ଅନ୍ୟାନ୍ୟ କର ଆଦାୟ କରିବାକୁ ପଛାଉ ନାହିଁ ସରକାର । ବର୍ତ୍ତମାନ ଡିଜେଲ ଦର ବୃଦ୍ଧି ହେବା ସହିତ ପରିବହନ ଭଡା କମ୍ ପାଇବା ଯୋଗୁ ହାଇୱା ମାଲିକମାନଙ୍କ ପାଇଁ ସମସ୍ୟା ଆହୁରି ବଢିଯାଇଛି । ଏହାକୁ ପାଥେୟ କରି ଗତକାଲି ଅପରାହ୍ନରେ ନୟାଗଡ଼ ଟ୍ରକ ଆସୋସିଏସନ ସଭା ଗୃହରେ ଜିଲ୍ଲା ହାଇୱା ମାଲିକ ସଂଘର ସଭାପତି ରାଜକିଶୋର ଜେନାଙ୍କ ଡ଼ାକରାରେ ଏକ ସାଧାରଣ ସଭା ଅନୁଷ୍ଠିତ ହୋଇଯାଇଛି । ବୈଠକରେ ସର୍ବସମ୍ମତିକ୍ରମେ ଡିଜେଲ ଦର ହ୍ରାସ ନ ହେବା ଯାଏଁ ୧୦ ଦିନ ପର୍ୟ୍ୟନ୍ତ ସମଗ୍ର ଜିଲ୍ଲାରେ ବାଲି ପରିବହନ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି । ବୈଠକରେ ସମ୍ପାଦକ ପ୍ରକାଶ ଚନ୍ଦ୍ର ଜେନା ଏବଂ ଜିଲ୍ଲାର ସମସ୍ତ ୬୦ ଜଣ ହାଇୱା ମାଲିକ ଉପସ୍ଥିତ ଥିଲେ ।