ନୂଆପଡ଼ା, (ବାଘୁଆବାର୍ତ୍ତା): ନୂଆପଡ଼ା ଜିଲ୍ଲା ଖଡ଼ିଆଳ ଥାନା ଅନ୍ତର୍ଗତ ଡୁଆଝର ଗାଁର ଏକ ଢାବାରେ କୌଣସି କାରଣକୁ ନେଇ ଦୁର୍ବୃତ୍ତମାନେ ଗୁଳି ମାଡ କରିଛନ୍ତି । ଏଥିରେ ଢାବା ମାଲିକାଣୀ ବାସନ୍ତୀ ମେହେର(୪୨) ପ୍ରାଣ ହରାଇଛନ୍ତି । ଘଟଣା ସ୍ଥଳରେ ଖଡ଼ିଆଳ ପୁଲିସ ପହଞ୍ଚି ଛାନଭିନ ଆରମ୍ଭ କରିଥିବା ଥାନାଧିକାରୀ କୈଳାଶ ଚନ୍ଦ୍ର ସେଠୀ ସୂଚନା ଦେଇଛନ୍ତି । ଖଡ଼ିଆଳ-ସିନାପାଲି ରାସ୍ତାର ଡୁଆଝର ଗାଁ ମୁଣ୍ଡ ମଦଭାଟି ନିକଟରେ ଏକ ଅପନା ଢାବା ରହିଛି । ଶନିବାର ରାତି ପ୍ରାୟ ୯ଟାରେ ଢାବାର ମାଲିକାଣୀ ବସନ୍ତୀ ମେହେର ଓ ସ୍ୱାମୀ ବିଭୀଷଣ ମେହେର ଢାବାକୁ ବନ୍ଦ କରି ନିଜ ପାଇଁ ଖାଇବା ତିଆରି କରୁଥିଲେ । ଏହି ସମୟରେ ଖଡ଼ିଆଳ ପଟୁ ୨ଜଣ ଯୁବକ ଏକ ବାଇକରେ ସିନାପାଲି ପଟେ ଯାଉଥିଲେ । ବାଇକ ପଛପଟେ ବସିଥିବା ଯୁବକ ଜଣକ ମଦ ବୋତଲ ଧରି ପିଉଥିଲେ । ଏହି ଦୁଇଜଣ ଯୁବକ ଢାବାରେ ଅଟକି ଖାଇବା ପାଇଁ ମାଗିଥିଲେ । ହେଲେ ଢାବା ମାଲିକାଣୀ ବାସନ୍ତୀ ଖାଇବା ହେବନାହିଁ । ଢାବା ବନ୍ଦ ହେଲାଣି ଓ ଆମ ନିଜ ପାଇଁ ଖାଦ୍ୟ ପ୍ରସ୍ତୁତ କରୁଛୁ ବୋଲି ଉତ୍ତର ଦେଇଥିଲେ । ହେଲେ ଦୁଇଜଣ ଯୁବକ ଖାଇବା ପାଇଁ ଜୋରଜବରଦସ୍ତି କରିବା ସହ ଯୁକ୍ତିତର୍କ ଆରମ୍ଭ କରିଥିଲେ । ଏଥିରେ ଜଣେ ଯୁବକ ଉତ୍ତ୍ୟକ୍ତ ହୋଇ ବିୟର ବୋତଲକୁ ଭାଙ୍ଗି ଦେଇଥିଲେ । ପରେ ଉଭୟ ପକ୍ଷରୁ ଯୁକ୍ତିତର୍କ ବଢ଼ିବାରୁ ଜଣେ ଯୁବକ ପକେଟରୁ ପିସ୍ତଲ କାଢି ଗୁଳିଚଳାଇ ଥିଲେ । ଏହି ଗୁଳି ବାସନ୍ତୀଙ୍କ ଛାତିରେ ଲାଗିଥିଲା । ଗୁଳି ମାଡକରି ଦୁଇ ଯୁବକ ଫେରାର ହୋଇଥିଲେ । ଢାବା ମାଲିକାଣୀ ବସନ୍ତୀଙ୍କୁ ତାଙ୍କ ସ୍ୱାମୀ ଗୁରୁତର ଅବସ୍ଥାରେ ଉଦ୍ଧାର କରି ଖଡ଼ିଆଳ ଉପଖଣ୍ଡ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଚିକିତ୍ସାଧିନ ଅବସ୍ଥାରେ ବାସନ୍ତୀଙ୍କ ମୃତ୍ୟୁ ହୋଇଥିଲା । ତେବେ ପୂର୍ବ ଶତ୍ରୁତାକୁ ନେଇ ଗୁଳିକାଣ୍ଡ ହୋଇଥିବା ସ୍ଥାନୀୟ ଲୋକେ କହୁଛନ୍ତି ।
ଖାଇବାକୁ ନ ଦେବାରୁ ଗୁଳିକରି ଢାବା ମାଲିକାଣୀଙ୍କୁ ହତ୍ୟା କଲେ ଦୁର୍ବୃତ୍ତ
