ଭୁବନେଶ୍ୱର, (ବାଘୁଆବାର୍ତ୍ତା): ଅଲିମ୍ପିଆନ ଦୂତି ଚାନ୍ଦ ଟୋକିଓ ଟିକେଟ୍ ହାସଲ କରିବା ପରେ ଭୁବନେଶ୍ୱର ଆସିଥିଲେ । ବିଭିନ୍ନ ସମ୍ବର୍ଦ୍ଧନା କାର୍ୟ୍ୟକ୍ରମରେ ଯୋଗଦେବା ପରେ ହାଇଦ୍ରାବାଦ ଗସ୍ତ କରି ଦ ଗୌଡିୟମ ସ୍କୁଲରେ ଅଭ୍ୟାସ ଜାରି ରଖିଛନ୍ତି । କୋଚ୍ ନାଗାପୁରୀ ରମେଶ ତାଙ୍କୁ ପ୍ରଶିକ୍ଷଣ ଦେଉଛନ୍ତି । ଦୂତି କିଛି ଫଟୋ ଏବଂ ଭିଡିଓ ସୋସିଆଲ ମିଡିଆରେ ସେୟାର କରିଛନ୍ତି । ସେ କିଛି ପୁଅ ପିଲାଙ୍କ ସହ ଅଭ୍ୟାସ ଜାରି ରଖିଛନ୍ତି । ସେ ଲେଖିଛନ୍ତି, କାହାର ଅଭିଶାପ ଆମକୁ ଖରାପ କରିପାରିବ ନାହିଁ କି କାହାର ଆଶୀର୍ବାଦ ଆମକୁ ଭଲ କରି ପାରିବ ନାହିଁ, ସବୁ ଆମ କର୍ମ ଉପରେ ନିର୍ଭର କରେ । ତେଣୁ କର୍ମକୁ ବିଶ୍ୱାସ କର, କର୍ମ ହିଁ ଭଗବାନ ।’ଦୂତି ପ୍ରଥମ ଭାରତୀୟ ଭାବେ କ୍ରମାଗତ ଦ୍ୱିତୀୟ ଥର ପାଇଁ ୧୦୦ ମିଟରରେ ଅଲିମ୍ପିକ୍ସ ଯୋଗ୍ୟତା ହାସଲ କରିଛନ୍ତି । ରିଓ ଅଲିମ୍ପିକ୍ସରେ କେବଳ ୧୦୦ ମିଟରରେ ଦୌଡ଼ିଥିଲେ । ଏଥର ସେ ଉଭୟ ୧୦୦ ଓ ୨୦୦ ମିଟରରେ ଦୌଡ଼ିବେ । ଗତ ମାସ ୨୧ ତାରିଖରେ ଅନୁଷ୍ଠିତ ଇଣ୍ଡିଆନ ଗ୍ରାଁପ୍ରି-୪ରେ ସେ ନିଜ ପୂର୍ବ ରେକର୍ଡ ଭଙ୍ଗ କରି ନୂଆ ଜାତୀୟ ରେକର୍ଡ (୧୧.୧୭ ସେକେଣ୍ଡ) ପ୍ରତିଷ୍ଠା କରିଥିଲେ ।
ହାଇଦ୍ରାବାଦରେ ଅଭ୍ୟାସ ଆରମ୍ଭ କଲେ ଦୂତି
