ମାଛ ଚାଷର ଲିଜକୁ ନେଇ ୨ ଗୋଷ୍ଠୀ ମୁହାଁମୁହିଁ, ୫ରୁ ଅଧିକ ଆହତ

ସାନଖେମୁଣ୍ଡି, (ବାଘୁଆବାର୍ତ୍ତା): ଗଞ୍ଜାମ ଜିଲ୍ଲା କବିସୂର୍ୟ୍ୟନଗର ଥାନା ତଥା ବାଲିଛାଇ ଫାଣ୍ଡି ଅନ୍ତର୍ଗତ ପାଇକଯମୁନା ଗ୍ରାମରେ ଗୋଷ୍ଠୀ ସଂଘର୍ଷ । ପୋଖରୀରେ ମାଛ ଚାଷ ଓ ମାଛ ଧରା ଲିଜକୁ ନେଇ ଦୁଇ ଗୋଷ୍ଠୀ ମୁହାଁମୁହିଁ ହୋଇଛନ୍ତି । ଏଥିରେ ଉଭୟ ପକ୍ଷରୁ ୫ରୁ ଅଧିକ ପୁରୁଷ ଆହତ ହୋଇଛନ୍ତି । ରବିବାର ସକାଳେ ଲିଜ୍ ଧାର୍ୟ୍ୟ କରିବା ପାଇଁ ଗାଁରେ ବୈଠକ ବସିଥିଲା । ହେଲେ ୨ ଗୋଷ୍ଠୀ ଭିତରେ ବଚସା ଓ ପରେ ମାରପିଟ ଘଟିଥିଲା। ଗଣ୍ଡଗୋଳରେ ଆହତମାନଙ୍କୁ କବିସୂର୍ୟ୍ୟନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ଏସ୍ଆଇ ଅର୍ଜୁନ କହଁର, ଏସ୍ଆଇ ଆର୍. ଶଙ୍କର ରାଓଙ୍କ ସଦଳବଳେ ଗାଁରେ ପହଞ୍ଚି ସ୍ଥିତି ନିୟନ୍ତ୍ରଣ କରୁଛନ୍ତି । ଗାଁରେ ଚାପା ଉତ୍ତେଜନା ଲାଗି ରହିଛି ।