ପଟ୍ଟାଙ୍ଗି, (ବାଘୁଆବାର୍ତ୍ତା): ଦେଶୀ ଚେରମୂଳି ଔଷଧ ଖାଇ କୋରାପୁଟ ଜିଲ୍ଲା ପଟ୍ଟାଙ୍ଗି ଥାନା ବଦଳିଆଗୁଡ଼ା ଗାଁର ଜଣେ ଯୁବକଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି । ମୃତକ ଜଣଙ୍କ ହେଲେ ତୋଟାପାଡ଼ିଆ ଗୋପାଳ (୩୭) । ଗୋପାଳ ପ୍ରାୟ ୨ବର୍ଷ ହେଲା ପେଟ ଯନ୍ତ୍ରଣାରେ ଛଟପଟ ହେଉଥିଲେ । ବିଭିନ୍ନ ଡାକ୍ତରଖାନାକୁ ଯାଇ ଚିକିତ୍ସା ହେଉଥିଲେ । କିନ୍ତୁ ତାଙ୍କର ପେଟବ୍ୟଥା କମି ନଥିଲା । ତେଣୁ ଏକ ଦେଶୀ ବୈଦ୍ୟ ନିକଟରୁ କିଛି ଚେରିମୂଳି ଆଣି ଗୁରୁବାର ରାତି ଖାଲି ପେଟରେ ଖାଇଥିଲେ । ତାଙ୍କୁ ଭୀଷଣ ବ୍ୟଥା ହେବା ସହ ସେ ଅଚେତ ହୋଇପଡ଼ିଥିଲେ । ପରିବାର ଲୋକେ ତାଙ୍କୁ ପଟ୍ଟାଙ୍ଗି ଗୋଷ୍ଠୀ ଚିକିତ୍ସାଳୟକୁ ନେଇଥିଲେ । ଚିକିତ୍ସାଧୀନ ଅବସ୍ଥାରେ ଶୁକ୍ରାବାର ଦିନ ଗୋପାଳଙ୍କ ମୃତ୍ୟୁ ଘଟିଥିଲା । ପୁଲିସ ଡାକ୍ତରଖାନାରେ ତଦନ୍ତ କରିବା ସହ ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଛି ।
