ଭୁବନେଶ୍ଵର,(ବାଘୁଆବାର୍ତ୍ତା): ଚଳିତ ବର୍ଷ ଟୋକିଓ ଅଲିମ୍ପିକସ୍ରେ ଅଂଶଗ୍ରହଣ କରୁଥିବା କିଟ୍ ବିଶ୍ୱବିଦ୍ୟାଳୟର ୩ ଜଣ ଛାତ୍ରଛାତ୍ରୀ ଓ ଜଣେ ଡାକ୍ତରଙ୍କୁ ମିଶାଇ ମୋଟ ୪ ଜଣ ପ୍ରତିନିଧିଙ୍କୁ ରାଜ୍ୟପାଳ ପ୍ରଫେସର ଗଣେଶୀ ଲାଲ ଶୁଭେଚ୍ଛା ଓ ଅଭିନନ୍ଦନ ଜଣାଇବା ସହିତ ସେମାନଙ୍କ ସଫଳତା କାମନା କରିଛନ୍ତି । ସେମାନଙ୍କର କୃତି ଓ କୃତିତ୍ୱ ମାଧ୍ୟମରେ ରାଜ୍ୟ ତଥା ଦେଶ ଗୌରବାନ୍ୱିତ ହେବ ବୋଲି ରାଜ୍ୟପାଳ ପ୍ରଫେସର ଲାଲ ଗଭୀର ଆସ୍ଥା ଏବଂ ବିଶ୍ୱାସ ପୋଷଣ କରିଛନ୍ତି । ଆଜି ରାଜଭବନରେ ଦ୍ୱିତୀୟ ଥର ଅଲିମ୍ପିକସ୍ରେ ୧୦୦ ଓ ୨୦୦ ମିଟର ଦୌଡ଼ ଭଳି ଦୁଇଟି ଇଭେଣ୍ଟରେ ଅଂଶଗ୍ରହଣ କରିବାର ସୁଯୋଗ ପାଇଥିବା ଦୂତୀ ଚାନ୍ଦଙ୍କୁ ସମ୍ବର୍ଦ୍ଧିତ କରି ରାଜ୍ୟପାଳ ଅଲିମ୍ପିକସ୍ରେ ତାଙ୍କର ନିଶ୍ଚିତ ସଫଳତା କାମନା କରିଛନ୍ତି । ଅସିଚାଳିକା ସି.ଏ. ଭବାନୀ ଦେବୀ ଓ ଜାଭେଲିନ୍ ଥ୍ରୋ ଖେଳାଳୀ ଶିବପାଲ ସିଂହ ଅନ୍ଲାଇନ୍ରେ ଯୋଡ଼ି ହୋଇ ରାଜ୍ୟପାଳଙ୍କ ଆଶୀର୍ବାଦ କାମନା କରିଥିଲେ ଏବଂ ରାଜ୍ୟପାଳ ସମସ୍ତଙ୍କର ସଫଳତା ପାଇଁ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ପ୍ରାର୍ଥନା କରୁଛନ୍ତି ବୋଲି ପ୍ରକାଶ କରିଥିଲେ । ରାଜ୍ୟପାଳ ତିନିଜଣ ଖେଳାଳୀଙ୍କୁ ୫୦ ହଜାର ଟଙ୍କା ଲେଖାଏଁ ପ୍ରୋତ୍ସାହନ ରାଶି ପ୍ରଦାନ କରିଥିଲେ । କିଟ୍ ଓ କିସ୍ର ପ୍ରତିଷ୍ଠାତା ତଥା ସାଂସଦ ଅଚୁ୍ୟତ ସାମନ୍ତ ଓ ରାଜ୍ୟପାଳଙ୍କ ସଚିବ ଡ. ପି.କେ. ମେହେର୍ଦ୍ଦା ସମ୍ବର୍ଦ୍ଧନା ଉତ୍ସବରେ ଉପସ୍ଥିତ ଥିଲେ ।
ଟୋକିଓ ଅଲିମ୍ପିକସ୍ରେ ଅଂଶଗ୍ରହଣକାରୀ ଖେଳାଳୀମାନଙ୍କୁ ରାଜ୍ୟପାଳଙ୍କ ଶୁଭେଚ୍ଛା ଓ ଅଭିନନ୍ଦନ
