କନ୍ୟା ଘରେ ଶିଶୁ ସୁରକ୍ଷା ଟିମର ଚଢ଼ଉ, ବନ୍ଦ କଲା ବାଲ୍ୟ ବିବାହ

ସୋର, (ବାଘୁଆବାର୍ତ୍ତା): ଲଗ୍ନ ସରିଛି । ସମସ୍ତେ ଅନେଇ ବସିଛନ୍ତି ବର କେତେବେଳେ ଆସିବ ଆଉ ବିବାହ ହେବ। ହେଲେ କିଛି ସମୟ ମଧ୍ୟରେ ସବୁ କିଛି ଓଲଟପାଲଟ ହୋଇଗଲା। ବରଯାତ୍ରୀ ପରିବର୍ତ୍ତେ ପହଞ୍ଚିଲେ ପୋଲିସ ଓ ଶିଶୁ ସୁରକ୍ଷା ଦଳ। ଆଉ ବନ୍ଦ ହେଲା ବାଲ୍ୟ ବିବାହ। ଖଇରା ଥାନା ତିଳଦା ଗାଁରେ ଏପରି ଏକ ଘଟଣା ଘଟିଛି। ତିଳଦା ଗାଁରେ ଜଣେ ୧୫ବର୍ଷୀୟା ନାବାଳିକାଙ୍କର ଲଗ୍ନ ପରେ ବିବାହ ସ୍ଥିର ହୋଇଥିଲା। ବେଦୀ ବନ୍ଧା ସରିଥିଲା। ବର ଆସିଥିଲେ ହୋଇଥାନ୍ତା ବାହାଘର। ଠିକ୍ ଏତିକିବେଳେ ଖବର ପାଇ ପହଞ୍ଚିଲା ଖଇରା ଶିଶୁ ସୁରକ୍ଷା ଦଳ। ପୋଲିସ ଅଙ୍ଗନବାଡି କର୍ମୀଙ୍କ ଉପସ୍ଥିତିରେ ଶିଶୁ ସୁରକ୍ଷା ଦଳ ଏହି ବାଲ୍ୟ ବିବାହକୁ ବନ୍ଦ କରିଥିଲା। ତେବେ ନାବାଳିକାଙ୍କ ପରିବାର ଲୋକେ ପରସ୍ପର ସହ ଆଲୋଚନା ପରେ ବିବାହ ବନ୍ଦ ପାଇଁ ରାଜି ହୋଇଛନ୍ତି। ସେପଟେ ଉଭୟ ବର କନ୍ୟାଙ୍କ ଘର ଗୋଟିଏ ଗାଁର ହୋଇଥିବା କାରଣରୁ ଅଶାନ୍ତ ପରିବେଶ ସୃଷ୍ଟି ହୋଇଛି। ଏହି ବାଲ୍ୟ ବିବାହ ରୋକିବାକୁ ଖଇରା ଶିଶୁ ସରକ୍ଷା ଉପକେନ୍ଦ୍ର ଦଳର ପଞ୍ଚାନନ ତ୍ରିପାଠୀ, ତପସ୍ୱନୀ ରାଉତ, ସାଇନ ପ୍ରଭା ଦଳେଇ, ଚିତ୍ତରଞ୍ଜନ ପଣ୍ଡାଙ୍କ ସମେତ ପୋଲିସ ଓ ସିଡିପିଓ ଅଫିସର କର୍ମକର୍ତ୍ତାମାନେ ସହଯୋଗ କରିଥିଲେ।