୧୬ ଲକ୍ଷ ଟଙ୍କାର ବ୍ରାଉନସୁଗାର ଜବତ

ନୟାଗଡ଼,(ବାଘୁଆବାର୍ତ୍ତା): ପୁଣି ୧୬ ଲକ୍ଷ ଟଙ୍କାର ବ୍ରାଉନସୁଗାର ଜବତ କରିଛି କେନ୍ଦ୍ରାଞ୍ଚଳ ଅବକାରୀ ଗୁଇନ୍ଦା ବିଭାଗ। କଟକ ବାଙ୍କୀ ବଜାରରେ ଜଣେ ଗ୍ରାଜୁଏଟ ଛାତ୍ର ବ୍ରାଉନସୁଗାର ବିକ୍ରି କଲା ବେଳେ ଧରା ପଡ଼ିଛି। ଏହି ଅଭିଯୁକ୍ତ ହେଉଛି ଖୋର୍ଧା ଜିଲ୍ଲା ବାଘମାରି ଥାନା ପୋଡ଼ାଢ଼ିହର ସୁରେଶ କୁମାର ମହାପାତ୍ର । ସୂଚନା ଅନୁଯାୟୀ, ଖୋର୍ଧାର ସୁରେଶ ଗ୍ରାଜୁଏସନ ପଢା ଛାଡ଼ି ବ୍ରାଉନସୁଗାର ବ୍ୟବସାୟ ଆରମ୍ଭ କରିଦେଇଥିଲା। ଗଲା ଏକ ବର୍ଷ ହେବ ସେ କଟକ ସହର ସମେତ ଗ୍ରାମାଞ୍ଚଳକୁ ବ୍ରାଉନସୁଗାର ଚାଲାଣ କରୁଥିଲା। ଆଜି ଭୋର ପ୍ରାୟ ୫ଟା ବେଳେ ବାଙ୍କୀ ବଜାର ନିକଟରେ ଥିବା ଏକ ପେଟ୍ରୋଲ ପମ୍ପ ନିକଟରେ ଜଣେ ବ୍ୟବସାୟୀଙ୍କୁ ବ୍ରାଉନସୁଗାର ବିକ୍ରି କରିବା ଯୋଜନାରେ ଥିଲା। କେନ୍ଦ୍ରାଞ୍ଚଳ ଅବକାରୀ ଗୁଇନ୍ଦା ଗୁଇନ୍ଦା ତଥ୍ୟ ଆଧାରରେ ବାଙ୍କୀ ବଜାରରେ ଚଢ଼ଉ କରି ସୁରେଶକୁ ଗିରଫ କରିଛି। ତା ନିକଟରୁ ମୋଟ ୧୬୪ ଗ୍ରାମ ଓଜନର ବ୍ରାଉନସୁଗାର ଜବତ ହୋଇଛି। ଗୁଇନ୍ଦା ବିଭାଗ ଆଇଆଇସି ଜଗଦୀଶ ଚନ୍ଦ୍ର ସାମଲଙ୍କ ନେତୃତ୍ୱରେ କନଷ୍ଟେବଳ କିଶୋର ଚନ୍ଦ୍ର ରାଉତ, ଆଲୋକ କୁମାର ଖଟୁଆ ପ୍ରମୁଖ ଚଢଉରେ ସାମିଲ ହୋଇଥିଲେ।