ଗଞ୍ଜାମ, (ବାଘୁଆବାର୍ତ୍ତା): ଭାଇକୁ ହତ୍ୟା କରିଥିବା ଅଭିଯୋଗରେ ରକ୍ତଭିଜା ଖଣ୍ଡା ଜବତ କରିବା ସହ ଅଭିଯୁକ୍ତକୁ ଗିରଫ୍ କରିଛି ପୁଲିସ୍ । ସୂଚନାନୁସାରେ, ଆସିକା ଥାନା ଅଧିନରେ ଥିବା ମଙ୍ଗଳପୁର ଗାଁରେ ପାରିବାରିକ କଳହକୁ ନେଇ ଦୁଇ ଭାଇଙ୍କ ମଧ୍ୟରେ ଝଗଡା ହୋଇଥିଲା ହତ୍ୟାକାଣ୍ଡ । ଉକ୍ତ ଗାଁର ରାମଚନ୍ଦ୍ରଙ୍କ ବଡ଼ପୁଅ ହରିବନ୍ଧୁ ପ୍ରଧାନ ବିବାହ ପାଇଁ ଅମଙ୍ଗ ହେବାରୁ ସାନପୁଅ ସଞ୍ଜୟକୁ ବାହା କରାଇଥିଲେ । ସାନ ଭାଇର ବିବାହକୁ ନେଇ ଘରେ ଝଗଡା ଲାଗି ରହୁଥିଲା । ଘରର ଅଶାନ୍ତ ଦେଖା ଦେଉଥିବାରୁ ୨୦ଦିନ ତଳେ ବିବାହ କରିଥିବା ସାନ ଭାଇ ସଞ୍ଜୟ ଘର ଛାଡି କବିସୂର୍ଯ୍ୟନଗର ଅଞ୍ଚଳରେ ରହୁଥିଲେ । ଗତ ଶୁକ୍ରବାର ଦିନ ସଞ୍ଜୟ ଗାଁକୁ ଆସି ଦାଦା ପିତାମ୍ବରଙ୍କ ସହିତ ଘରେ ବସି ଆଲୋଚନା କରି ଚାହା ପିଉଥିବା ବେଳେ ବଡ଼ ଭାଇ ହରିବନ୍ଧୁ ଖଣ୍ଡା ଧରି ପହଞ୍ଚି ସେଠାରେ ସାନଭାଇ ସଞ୍ଜୟକୁ ଆକ୍ରମଣ କରି ଫେରାର ହୋଇଯାଇଥିଲା । ଘଟଣାସ୍ଥଳରେ ସଞ୍ଜୟଙ୍କ ମୃତ୍ୟୁ ହୋଇଥିଲା । ଏନେଇ ଆସିକା ଥାନାରେ ମାମଲା ରୁଜୁ କରାଯାଇ ତଦନ୍ତ କରିଥିଲା । ଅଭିଯୁକ୍ତ ବଡ଼ଭାଇ ହରିବନ୍ଧୁକୁ ଗିରଫ୍ କରିବା ପାଇଁ ପୁଲିସ୍ ଜାଲ ବିଛାଇ ଥିଲା । ହରିବନ୍ଧୁ ବଗଗଡ଼ ଥାନା ଅଞ୍ଚଳରେ ଥିବା ବିଶେଷ ସୁତ୍ରରୁ ଖବର ପାଇ ଆଜି ମାଣିକପୁର ଗାଁରେ ଚଢଉ କରି ଅଭିଯୁକ୍ତ ବଡ଼ଭାଇକୁ ଗିରଫ୍ କରିବା ସହ ରକ୍ତଭିଜା ଖଣ୍ଡା ଜବତ କରିଛି ଆସିକା ପୁଲିସ୍ । ଏନେଇ ଆସିକା ଏସଡିପିଓ ଉମାଶଙ୍କର ସିଂ ସୂଚନା ଦେଇଛନ୍ତି ।
