ମୁମ୍ବାଇ, (ବାଘୁଆବାର୍ତ୍ତା): ବଡ଼ ପରଦାକୁ ଫେରିବେ ବଲିଉଡର ଟପ୍ ଅଭିନେତ୍ରୀ ମୀନାକ୍ଷୀ ଶେଷାଦ୍ରି । ଅଶୀ, ନବେ ଦଶକରେ ବଲିଉଡର ଜଣେ ପରିଚିତ ଅଭିନେତ୍ରୀ ଭାବେ ମୀନାକ୍ଷୀ ଶେଷାଦ୍ରି ଖ୍ୟାତି ଅର୍ଜନ କରିଥିଲେ। ସେ ତାଙ୍କ ଫିଲ୍ମ କ୍ୟାରିୟରରେ ଅନେକ ସୁପିରହିଟ୍ ଫିଲ୍ମ କରି ଦର୍ଶକଙ୍କ ମନ ଜିଣିଥିଲେ। ବହୁ ବର୍ଷ ହେବ ଫିଲ୍ମ ଜଗତରୁ ଦୂରେଇ ଯାଇଛନ୍ତି ମୀନାକ୍ଷୀ ଏବେ ପୁଣି ଫେରିବାକୁ ଚାହୁଁଛନ୍ତି। ଏକ ସାକ୍ଷାତକାରରେ ଯେତେବେଳେ ଅଭିନେତ୍ରୀଙ୍କୁ ତାଙ୍କ କମବ୍ୟାକ୍ ବିଷୟରେ ପଚରାଗଲା, ସେ କହିଥିଲେ- ‘ମୁଁ ମୋ ନୃତ୍ୟ ମାଧ୍ୟମରେ କାମ କରି ମୋର ସୃଜନଶୀଳତା ବଜାୟ ରଖିଛି। ମୁଁ ନିୟମିତ ଅଭ୍ୟାସ କରେ, ଏବଂ ମୁଁ ଆମେରିକାରେ ଏଠାରେ ନୃତ୍ୟ ଶିକ୍ଷା ମଧ୍ୟ ଦେଉଛି। ବର୍ତ୍ତମାନ ମୁଁ ଘରେ ଏକାକୀ ଅଛି । ମୋ ଝିଅ ବାହାରେ ଚାକିରି କରୁଛି ଏବଂ ମୋ ପୁଅ ଏବେ କଲେଜ ଯିବ। ତେଣୁ ବର୍ତ୍ତମାନ ସେମାନଙ୍କର ଯତ୍ନ ନେବା ଦାୟିତ୍ବ ମୋ ଉପରେ ନାହିଁ। ଏହା ନିଶ୍ଚିତ ଭାବରେ ମୋ ପାଇଁ ଏକ ଭଲ ସୁଯୋଗ । ମୁଁ ଲୋକମାନଙ୍କୁ କହିଛି ଯେ ମୁଁ କାମ କରିବାକୁ ଚାହୁଁଛି ଏବଂ ଗତ କିଛି ବର୍ଷ ମଧ୍ୟରେ ମୁଁ ଅନେକ ଅଫର ପାଇଛି, କିନ୍ତୁ ମହାମାରୀ ହେତୁ ମୁଁ ଅନେକ ପ୍ରୋଜେକ୍ଟରେ କାମ କରିପାରିଲି ନାହିଁ । ମୁଁ ପୁଣିଥରେ ଭାରତୀୟ ଚଳଚ୍ଚିତ୍ର ଇଣ୍ଡଷ୍ଟ୍ରିର ଏକ ଅଂଶ ହେବାକୁ ଅପେକ୍ଷା କରିଛି । ମୀନାକ୍ଷୀ ୧୯୮୩ ରେ ଫିଲ୍ମ ‘ପେଣ୍ଟର ବାବୁ’ରୁ ବଲିଉଡରେ ଡେବ୍ୟୁ କରିଥିଲେ। ଏହି ଫିଲ୍ମ ସେତେଟା ଭଲ ଚାଲିନଥିଲା। ଏହା ପରେ ସେ ସୁଭାଷ ଘାଇଙ୍କ ଫିଲ୍ମ ‘ହିରୋ’ରେ ଜ୍ୟାକି ଶ୍ରଫଙ୍କ ସହ କାମ କରିଥିଲେ। ଫିଲ୍ମଟି ହିଟ୍ ହେବା ପରେ ମୀନାକ୍ଷୀ ରାତାରାତି ଷ୍ଟାର ହୋଇଯାଇଥିଲେ। ଏହାପରେ ତାଙ୍କୁ ଗୋଟିଏ ପରେ ଗୋଟିଏ ଫିଲ୍ମ ପାଇଁ ଅଫର ମିଳିଥିଲା। ‘ଦାମିନୀ’. ‘ଘାୟଲ’, ‘ଘାତକ’ ଏବଂ ହିରୋ’ ଭଳି ଅନେକ ସୁପରହିଟ୍ ଫିଲ୍ମ ଦେଇଛନ୍ତି। ସେ ଦେବ ଆନନ୍ଦ, ଅମିତାଭ ବଚ୍ଚନ, ସଞ୍ଜୟ ଦତ୍ତ, ମିଥୁନ ଚକ୍ରବର୍ତ୍ତୀ, ସନି ଦେଓଲ, ଅନିଲ କପୁରଙ୍କ ଭଳି ସୁପରଷ୍ଟାରଙ୍କ ସହ ଫିଲ୍ମ କରିଥିଲେ। କ୍ୟାରିୟରରେ ସଫଳତାର ଶିଖରରେ ପହଞ୍ଚିବା ପରେ ମୀନାକ୍ଷୀ ଫିଲ୍ମ ଜଗତରୁ ବିଦାୟ ଦେଇଥିଲେ। ୧୯୯୫ରେ ସେ ଇନଭେଷ୍ଟମେଣ୍ଟ ବ୍ୟାଙ୍କର ହରିଶ ମାଇସୋରଙ୍କୁ ବିବାହ କରିଥିଲେ। ବିବାହ ପରେ ସେ ଆମେରିକାର ଟେକ୍ସାସରେ ରହିଲେ। ସେ ସୋସିଆଲ ମିଡିଆରେ ବହୁତ ସକ୍ରିୟ ଅଛନ୍ତି।
ପୁଣି ଫେରିବେ ବଲିଉଡର ସୁପରହିଟ ଅଭିନେତ୍ରୀ ମୀନାକ୍ଷୀ ଶେଷାଦ୍ରି, ଦାମିନୀ, ଘାୟଲ, ଘାତକ, ହିରୋ ରେ ଅଭିନୟ କରିଥିଲେ
