ହତ୍ୟା ଅଭିଯୁକ୍ତକୁ କୋର୍ଟ ଚାଲାଣ

ନୟାଗଡ଼,(ବାଘୁଆବାର୍ତ୍ତା) : ଖଣ୍ଡପଡ଼ା ବ୍ଲକ ବେଣାଗାଡିଆ ପଞ୍ଚାୟତ ଅଧିନ କାଦୁଆ ଗ୍ରାମର ରମେଶ ମଲ୍ଲିକ ହତ୍ୟାକାଣ୍ଡ ଘଟଣାରେ ଅଭିଯୁକ୍ତ ପ୍ରଭାତ ସ୍ଵାଇଁକୁ ଆଜି କୋର୍ଟଚାଲାଣ କରାଯାଇଛି। କୋର୍ଟରେ ଜାମିନ ନାମଞ୍ଜୁର ହେବାରୁ ଖଣ୍ଡପଡା ସବଜେଲକୁ ପଠାଇ ଦିଆଯାଇଛି । ଗତ ମଙ୍ଗଳବାର କାଦୁଆ ଗ୍ରାମର ପଞ୍ଚାନନ ମଲ୍ଲିକଙ୍କ ବାଡ଼ିରୁ ଅଭିଯୁକ୍ତ ପ୍ରଭାତ ସ୍ଵାଇଁ କଦଳୀ ଚୋରି କରୁଥିବା ବେଳେ ଧରା ପଡ଼ିଥିଲା। ପଞ୍ଚାନନଙ୍କ ଦୁଇ ପୁଅ ଅଭିଯୁକ୍ତର ପିଛା କରୁଥିବା ସମୟରେ ବେଣାଗାଡିଆ ଗାଁ ମୁଣ୍ଡରେ ଲୁଚି ରହିଥିବା ପ୍ରଭାତର ଆକ୍ରମଣରେ ବଡପୁଅ ରମେଶର ମୃତ୍ୟୁ ହୋଇଥିବା ବେଳେ ସାନପୁଅ ବାବୁଲା ଗୁରୁତର ଆହତ ହୋଇଥିଲା। ହତ୍ୟାକାଣ୍ଡ ଘଟାଇବା ପରେ ପ୍ରଭାତ ଭାପୁର ବ୍ଲକ ଅଧୀନ କରବର ଗ୍ରାମରେ ଆଶ୍ରୟ ନେଇଥିଲା। ସ୍ଥାନୀୟ ଲୋକେ ତାକୁ କାବୁ କରିନେବା ସହିତ ଗଛରେ ବାନ୍ଧି ନିସ୍ତୁକ ମାଡ଼ ମାରିଥିଲେ। ଘଟଣା ସମ୍ପର୍କରେ ଖବରପାଇ ଫତେଗଡ଼ ପୁଲିସ ତାକୁ ଉଦ୍ଧାର କରିବା ସହିତ ଖଣ୍ଡପଡ଼ା ପୁଲିସ ଜିମା ଦେଇଥିଲେ। ଗୁରୁତର ଆହତ ପ୍ରଭାତକୁ ପ୍ରଥମେ ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ପରେ ଭୁବନେଶ୍ବର ସ୍ଥିତ ଏମସ ମେଡିକାଲରେ ଚିକିତ୍ସା କରାଯିବା ପରେ ଆଜି ଅପରାହ୍ନରେ କୋର୍ଟରେ ହାଜର କରାଯାଇଥିଲା।