ନବରଙ୍ଗଗପୁର, (ବାଘୁଆବାର୍ତ୍ତା): ଗତବର୍ଷ ଭଳି ଚଳିତ ବର୍ଷ ରଥଯାତ୍ରା କୋଭିଡ୍ କଟକଣା ପାଳନ କରି ଶାନ୍ତି ଶୃଙ୍ଖଳାର ସହିତ ରଥଯାତ୍ରା କରିବା ପାଇଁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ସୂଚନାନୁସାରେ, ନବରଙ୍ଗପୁର ଜିଲ୍ଲାର ଐତିହାସିକ ରଥଯାତ୍ରାକୁ ନେଇ ଡାବୁଗାଁ ତହସିଲଦାର ସନ୍ଧ୍ୟା ସମରଥଙ୍କ ସଭାପତିତ୍ୱରେ ଏକ ପ୍ରସ୍ତୁତି ବୈଠକ ତହସିଲ୍ କାର୍ଯ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି । ଉକ୍ତ ବୈଠକ ଗତବର୍ଷର ଆୟବ୍ୟୟର ସମୀକ୍ଷା କରିବା ସହ ସ୍ନାନ ପୂର୍ଣ୍ଣିମା ଠାରୁ ବାହୁଡା ରଥଯାତ୍ରା ପର୍ଯ୍ୟନ୍ତ ଶ୍ରୀଜୀଉଙ୍କ ନିତୀକାନ୍ତି କେମିତି ଶାନ୍ତି ଶୃଙ୍ଖଳାରେ ସମାପନ କରାଯିବ ସେ ବିଷୟରେ ବିସ୍ତୃତ ଭାବେ ଆଲୋଚନା ହୋଇଥିଲା । ଯେହେତୁ ରାଜ୍ୟରେ ମହାମାରୀ କରୋନାର ଦ୍ୱିତୀୟ ଲହର ଥମିନଥିବାରୁ କରୋନା କଟକଣା ପାଳନ କରି ଚଳିତ ବର୍ଷ କେବଳ ମନ୍ଦିରର ପୂଜକ ଓ ସେବାୟତମାନଙ୍କୁ ନେଇ ରଥଯାତ୍ରା ପାଳନ କରାଯିବ । ଜନସାଧାରଣମାନଙ୍କୁ ମନ୍ଦିର ଭିତରକୁ ପ୍ରବେଶ ନିଷେଧ କରାଯାଇଛି ବୋଲି ତହସିଲାଦର ପ୍ରକାଶ କରିଛନ୍ତି । ଉକ୍ତ ବୈଠକରେ ତହସିଲଦାରଙ୍କ ସହ ମନ୍ଦିରର ଉପ ସଭାପତି ଜି ଭେଙ୍କଟେଶ୍ୱର ରାଓ, ସଂପାଦକ ଜି ସାଇ ରାଜୁ, ଦେବରାଜ ପାତ୍ର, ସୁରି ମିଶ୍ର, ଭଗବାନ ମହାନ୍ତି, ଭଗବାନ ଖୁଣ୍ଟିଆଙ୍କ ସମେତ ସମସ୍ତ ବିଭାଗର ଅଧିକାରୀ, ବଜାର କମିଟିର ସଦସ୍ୟମାନେ ଉପସ୍ଥିତ ଥିଲେ ।





