ସମ୍ବଲପୁର, (ବାଘୁଆବାର୍ତ୍ତା): ପ୍ରଥମ କରି ଓଟିଟି ପ୍ଲାଟଫର୍ମରେ ରିଲିଜ୍ ହେଲା ଓଡ଼ିଆ ଡକ୍ୟୁମେଣ୍ଟାରି ଚଳଚ୍ଚିତ୍ର ‘ଦ ମାଉଣ୍ଟେନ୍ ହକି-ଲ୍ୟାଣ୍ଡ ଅଫ୍ ଓଡ଼ିଶା’ । ଆଦିବାସୀ ଝିଅଙ୍କୁ ହକି ଶିକ୍ଷା ପାଇଁ ଅଣ୍ଟା ଭିଡ଼ିଥିବା ଜଣେ ଶିକ୍ଷକଙ୍କ କାହାଣୀକୁ ନେଇ ଏହି ଚଳଚ୍ଚିତ୍ର ନିର୍ମାଣ କରାଯାଇଛି । ଯାହା ଖୁବ୍ ଶୀଘ୍ର ଡିସ୍ନି ପ୍ଲସ ହଟ୍ଷ୍ଟାରରେ ରିଲିଜ୍ ହେବାକୁ ଯାଉଥିବା ନିର୍ଦ୍ଦେଶକ ଅବିନାଶ ପ୍ରଧାନ କହିଛନ୍ତି । ଏହି ଚଳଚ୍ଚିତ୍ରର କାହାଣୀ ମଧ୍ୟ ଶ୍ରୀ ପ୍ରଧାନ ଲେଖିଥିବାବେଳେ ସହ ନିର୍ଦ୍ଦେଶନା ଦେଇଛନ୍ତି ଦେବାଶିଷ ମହାପାତ୍ର । ୩ ବନ୍ଧୁ ରାଜକିଶୋର ହୋତା, ମନିଷ ଭୂଷଣ ମିଶ୍ର ଓ ସୁବ୍ରଜିତ ପ୍ରଧାନଙ୍କ ପ୍ରାଯୋଜିତ ଏହି ଚଳଚ୍ଚିତ୍ରରେ ସିନେମାଟୋଗ୍ରାଫିରେ ବ୍ରଜରାଜ ବେହେରା ରହିଛନ୍ତି । ପଶ୍ଚିମ ଓଡ଼ିଶାକୁ ରାଜ୍ୟ ହକିର ଏନ୍ତୁଡ଼ିଶାଳ କୁହାଯାଉଥିବା ବେଳେ କିଭଳି ଭାବେ ଜଣେ ଶିକ୍ଷକ ନିଜ ଅଞ୍ଚଳର ଆଦିବାସୀ ଝିଅମାନଙ୍କୁ ହକି ଶିଖାଇବା ପାଇଁ ପ୍ରାଣପଣେ ଉଦ୍ୟମ ଆରମ୍ଭ କରିଥିଲେ । କିନ୍ତୁ ବର୍ତ୍ତମାନ ସ୍ଥିତିରେ ଆର୍ଥିକ ସମ୍ବଳ, ଆବଶ୍ୟକ ବ୍ୟବସ୍ଥା, ସହଯୋଗ ଓ ପ୍ଲାଟଫର୍ମ ଅଭାବ ଯୋଗୁ ଲକ୍ଷ୍ୟସ୍ଥଳରେ ପହଞ୍ଚିବାରେ କିଭଳି ସେ ସଂଘର୍ଷ ଜାରି ରଖିଛନ୍ତି ତାକୁ ନେଇ ଏହି ଚଳଚ୍ଚିତ୍ର ନିର୍ମାଣ କରାଯାଇଛି । ଏହି କାହାଣୀର ଲେଖକ ଓ ନିର୍ଦ୍ଦେଶକ ଅବିନାଶ ପ୍ରଧାନ ହେଉଛନ୍ତି ସମ୍ବଲପୁର ସହର ଏଏନ୍ଗୁହା ଲେନ୍ ବାସିନ୍ଦା । ଏହି ଚଳଚ୍ଚିତ୍ରଟି ମଧ୍ୟ ସମ୍ବଲପୁର ଜିଲ୍ଲା ବାମରା ବ୍ଲକ ଆମଲିଖମାନ୍ ଗାଁର ଏକ ମିସନାରି ସ୍କୁଲର ପ୍ରିନ୍ସିପାଲ ଭାବେ କାର୍ୟ୍ୟ କରୁଥିବା ଫାଦର ରାଜେନ୍ଦ୍ର କୁଜୁରଙ୍କ ଜୀବନୀକୁ ନେଇ ନିର୍ମାଣ କରାଯାଇଥିବା ନିର୍ଦ୍ଦେଶକ ଅବିନାଶ ପ୍ରଧାନ କହିଛନ୍ତି । ଚଳଚ୍ଚିତ୍ର ଓଟିଟି ପ୍ଲାଟଫର୍ମରେ ରିଲିଜ୍ ହେବା କେବଳ ସମ୍ବଲପୁର ନୁହେଁ ବରଂ ସମଗ୍ର ଦେଶ ପାଇଁ ଏକ ଗୌରବର ବିଷୟ ।
ରିଲିଜ ହେଲା ‘ଦ ମାଉଣ୍ଟେନ ହକି’, ଆଦିବାସୀ ଝିଅଙ୍କୁ କିପରି ଦିଆଯାଉଛି ହକି ଶିକ୍ଷା
