ମାଲକାନଗିରି, (ବାଘୁଆବାର୍ତ୍ତା): ଚୋରାରେ ହେଉଥିଲା ୧୫୦ଟି କଇଁଛ ଚାଲାଣ । ଆନ୍ଧ୍ରପ୍ରଦେଶରୁ କେତେକ ବ୍ୟବସାୟୀ ବେଆଇନ ଭାବେ ଏହି କଇଁଛ ସବୁ ମାଲକାନଗିରି ଆଣୁଥିଲେ । ଏ ସମ୍ପର୍କରେ ବିଶ୍ୱସ୍ତ ସୂତ୍ରରୁ ଖବରପାଇ ମାଳକାନଗିରି ଜିଲ୍ଲା କାଳିମେଳା ବନ ବିଭାଗ କର୍ମଚାରୀମାନେ ଚଢ଼ଉ କରିଥିଲେ। ମାଲକାନଗିରିର ମାଓପ୍ରବଣ ଲୁଗେଲ ପଞ୍ଚାୟତ ଏମ୍ପିଭି-୬୫ ଗ୍ରାମକୁ ବିକ୍ରି ପାଇଁ ନେବା ବେଳେ ବନ କର୍ମଚାରୀ ଉକ୍ତ କଇଁଛ ମାଫିଆଙ୍କ ପିଛା କରି ଦୁଇଟି ବାଇକ୍ ସହ ୧୫୦ କଇଁଛ ଜବତ କରିଛି । ଦୁଇ କଇଁଛ ମାଫିଆ ବନ କର୍ମଚାରୀଙ୍କୁ ଚକ୍ମା ଦେଇ ଜଙ୍ଗଲ ଭିତରକୁ ପଳାଇଥିଲେ । ଆନ୍ଧ୍ରପ୍ରଦେଶରୁ ବେଆଇନ ଭାବେ କଇଁଛ ମାଲକାନଗିରିକୁ ଚାଲାଣ ହେଉଥିବା ଖବର ପାଇବା ପରେ ବନଖଣ୍ଡ ଅଧିକାରୀ ପ୍ରଦୀପ ମିରସେ ତୁରନ୍ତ ଚଢ଼ଉ ପାଇଁ ନିର୍ଦ୍ଦେଶ ଦେଇଥିଲେ । କାଲିମେଳା ବନବିଭାଗ ରେଞ୍ଜର୍ ଏସ୍କେ ଦଳେଇଙ୍କ ନେତୃତ୍ୱରେ ଫରେଷ୍ଟର ସୌମ୍ୟପ୍ରଭା ପ୍ରଧାନ, ଅନୁତା ନାୟକ, ରୁଦ୍ରପ୍ରସାଦ ହନ୍ତାଳ, ଜଗନ୍ନାଥ ନାୟକ ଓ ପାରା ଷ୍ଟାଫ୍ ତୁରନ୍ତ ଚଢ଼ଉ ଅଭିଯାନରେ ବାହାରିଥିଲେ । କଇଁଛ ବେପାରୀମାନେ ଦୁଇଟି ବାଇକ୍ରେ ପ୍ରାୟ ୧୫୦ କଇଁଛ ନେଇ ମାଓପ୍ରବଣ ଲୁଗେଲ ପଞ୍ଚାୟତର ଏମ୍ପିଭି ୬୫ ଗାଁ ଅଭିମୁଖେ ଯାଉଥିଲେ । ସେମାନଙ୍କର ପିଛା କରିଥିଲେ ବନ କର୍ମଚାରୀ । ବନ କର୍ମଚାରୀମାନଙ୍କୁ ଦେଖି ଛାନିଆରେ ଦୁଇ ବାଇକ୍ ଚାଳକ ବାଇକ୍ ଛାଡ଼ି ଦେଇ ଜଙ୍ଗଲ ମଧ୍ୟକୁ ଦୌଡ଼ି ପଳାଇଥିଲେ । ବାଇକ୍ରେ ଲଦା ଯାଇଥିବା ପ୍ଲାଷ୍ଟିକ୍ ବ୍ୟାଗ୍ରୁ ୧୫୦ କଇଁଛ ଉଦ୍ଧାର କରିଥିଲେ ବନ କର୍ମଚାରୀ । କାଲିମେଳା ରେଞ୍ଜ୍ ଅଫିସ୍କୁ ଜବତ ବାଇକ୍ ଦୁଇଟି ସହିତ କଇଁଛଗୁଡ଼ିକୁ ଅଣା ଯାଇଥିଲା । ସେଗୁଡ଼ିକୁ ଗଣିବା ପରେ ୧୫୦ କଇଁଛ ଥିବା ଜଣାପଡ଼ିଥିଲା । ଏହି ବେପାରୀମାନେ ଆନ୍ଧ୍ରପ୍ରଦେଶରୁ କଇଁଛ ଆଣି ମାଲକାନଗିରି ଜିଲ୍ଲାର ବିଭିନ୍ନ ବଙ୍ଗୀୟ ଶରଣାର୍ଥୀ ଗ୍ରାମ ଓ ଛତିଶଗଡ଼ରେ ବିକ୍ରି କରିବାର ଯୋଜନା କରିଥିବା ଜଣାପଡ଼ିଛି । ଜବତ କଇଁଛଗୁଡ଼ିକ ମଧୁର ଜଳର ହୋଇଥିବାରୁ କଇଁଛଗୁଡ଼ିକୁ ସେବାରୀ ନଦୀରେ ଛାଡ଼ି ଦିଆଯିବ ବୋଲି ବନଖଣ୍ଡ ଅଧିକାରୀ ସୂଚନା ଦେଇଛନ୍ତି ।
୧୫୦ରୁ ଉଦ୍ଧ୍ୱର୍ କଇଁଛ ଉଦ୍ଧାର, ଚକ୍ମା ଦେଇ ଚମ୍ପଟ୍ ମାରିଲେ ବ୍ୟବସାୟୀ
