ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ବନଖଣ୍ଡ ଅଧିକାରୀ ଧନରାଜ ଏଚ୍.ଡିଙ୍କ ନିର୍ଦ୍ଦେଶରେ ବନଖଣ୍ଡ ବଙ୍ଗଳାକୁ କୋଭିଡ୍ କେୟାରରେ ପରିଣତ କରାଯାଇଛି । ନୟାଗଡ଼ ସର୍କିଟ ହାଉସ ନିକଟରେ ଥିବା ବଙ୍ଗଳାରେ କରାଯାଇଥିବା ଏହି କୋଭିଡ୍ କେୟାର ସେଣ୍ଟରରେ ୮ଟି ଶର୍ଯ୍ୟାର ବ୍ୟବସ୍ଥା ରହିଛି । ତା ସହିତ ଆନୁସଙ୍ଗିକ ବ୍ୟବସ୍ଥା ମଧ୍ୟ କରାଯାଇଥିବା ସୂଚନା ମିଳିଛି । ବନକର୍ମଚାରୀଙ୍କ ସମେତ, ବନ ସୁରକ୍ଷା ସମିତ ଏବଂ ସ୍ୱାର୍ଡ଼ଙ୍କ ମଧ୍ୟରୁ କେହି କରୋନା ଆକ୍ରାନ୍ତ ହେଲେ ଏହିଠାରେ ସଙ୍ଗରୋଧରେ ରଖାଯିବା ନେଇ ବ୍ୟବସ୍ଥା କରାଯାଇଥିବା ଅତିରିକ୍ତ ବନଖଣ୍ଡ ଅଧିକାରୀ ଅରବିନ୍ଦ ମହାନ୍ତି ସୂଚନା ଦେଇଛନ୍ତି । ଜିଲ୍ଲାରେ କରୋନା ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଉଥିବା ବେଳେ ବନଖଣ୍ଡ ଅଧିକାରୀ ଜିଲ୍ଲା ପ୍ରଶାସନ ମିଶି ସଂକ୍ରମଣ ରୋକିବାଠାରୁ ଆରମ୍ଭ କରି ସ୍ୱାସ୍ଥ୍ୟ ବ୍ୟବସ୍ଥା ପର୍ଯ୍ୟନ୍ତ ସବୁ କ୍ଷେତ୍ରରେ ସହଯୋଗ କରି ଆସୁଛନ୍ତି । ବଙ୍ଗଳାକୁ କୋଭିଡ୍ କେୟାରରେ ପରିଣତ କରିବା ତାଙ୍କର ଏକ ସୁଚିନ୍ତିତ ବ୍ୟବସ୍ଥା ବୋଲି ମତ ପ୍ରକାଶ ପାଇଛି । ଯେଉଁମାନେ ଘରେ ରହିବାର ସୁବିଧା ନାହିଁ, ସେମାନଙ୍କୁ ଏହି ସ୍ଥାନରେ ଗୃହ ସଙ୍ଗରୋଧରେ ରଖିବା ନେଇ ବ୍ୟବସ୍ଥା କରାଯାଇଥିବା ବନଖଣ୍ଡ ଅଧିକାରୀ କହିଛନ୍ତି ।
