ନୂଆଦିଲ୍ଲୀ (ବାଘୁଆବାର୍ତ୍ତା): ଗୋଟିଏ ପଟେ କରୋନା ଦାଉରେ ଲୋକମାନେ ଛଟପଟ ହେଉଥିବାବେଳେ ଅନ୍ୟ ପଟେ ମହଙ୍ଗାର ତାଉ ହନ୍ତସନ୍ତ କରୁଛି । ହନ୍ତସନ୍ତ ଜନତା। ସରକାର ଅଚିନ୍ତା। ଧୀରେ ଧୀରେ ବଢ଼ୁଥିବା ପେଟ୍ରୋଲ ଦର ସାଧାରଣ ଜନତାଙ୍କର ନିଦ ହଜାଇ ଦେଲାଣି। କେତେକ ସହରରେ ପେଟ୍ରୋଲ ଦର ଲିଟର ପିଛା ୧୦୦ ପାର କରିଥିବା ବେଳେ ଆଉ କେତେକ ସହରରେ ୯୫, ୯୭ରେ ରହିଛି। ତେବେ ମୁମ୍ବାଇରେ ଆଜି ସେଞ୍ଚୁରୀ ମାରିଛି ପେଟ୍ରୋଲ। ସେହିପରି ରାଜସ୍ଥାନର ଶ୍ରୀ ଗଙ୍ଗାନଗରରେ ପେଟ୍ରୋଲ ୧୦୦ ପାର୍ କରିଛି। ତୈଳ କମ୍ପାନୀଗୁଡ଼ିକ ତେଲେ ଦର ବୃଦ୍ଧି କରିବା ପରେ ଶନିବାର ରାଜସ୍ଥାନର ଶ୍ରୀ ଗଙ୍ଗାନଗରରେ ପେଟ୍ରୋଲ ଦର ଲିଟର ୧୦୫.୧୫ ହୋଇଥିବା ବେଳେ ମୁମ୍ବାଇରେ ପେଟ୍ରୋଲ ଲିଟର ପ୍ରତି ୧୦୦.୧୯ ଟଙ୍କା ହୋଇଛି। ସେହିପରି ମାୟାନଗରୀରେ ଡିଜେଲ୍ ରେଟ୍ ୯୨.୧୭ ରହିଥିବା ବେଳେ ଶ୍ରୀ ଗଙ୍ଗାନଗରରେ ୯୭.୯୯ ହୋଇଛି। ତେବେ ପୂର୍ବରୁ ରାଜସ୍ଥାନ, ମଧ୍ୟପ୍ରଦେଶ, ଏବଂ ମହାରାଷ୍ଟ୍ରର କେତେକ ସହରରେ ତେଲ ଦର ୧୦୦ ଟଙ୍କା ପାର୍ କରି ସାରିଥିବା ବେଳେ ଆଜି ମୁମ୍ବାଇରେ ୧୦୦ ପାର୍ କରିଛି ମୂଲ୍ୟ । ସେହିପରି ଦିଲ୍ଲୀରେ ପେଟ୍ରୋଲ ଲିଟର ପ୍ରତି ୯୩.୯୪, ଏବଂ ଡିଜେଲ୍ ୮୪,୮୯ ରହିଥିବା ବଳେ କୋଲ୍କାତାରେ ପେଟ୍ରୋଲ ୯୩.୯୭, ଡିଜେଲ ୮୬.୭୪, ଚେନ୍ନାଇ ତାମିଲନାଡୁରେ ପେଟ୍ରୋଲ ୯୫.୫୧, ଡିଜେଲ ୮୯.୬୫ ଟଙ୍କା ରହିଛି। ସେହିପରି ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୯୪.୬୬ ଟଙ୍କା ରହିଛି। ସୂଚନା ଥାଉକି ମେ ୪ ତାରିଖ ଠାରୁ ଏପର୍ୟ୍ୟନ୍ତ ୧୫ ଥର ତେଲ ଦର ବଢ଼ିଲାଣି। କରୋନାରେ ସାରା ଦେଶ ଘାଣ୍ଟି ହେଉଥିବା ବେଳେ ତେଲ ଦର ସାଧାରଣ ଜନତା ଉପରେ ଅଧିକ ଚାପ ପକାଇଛି ।
