ଆମ୍ବୁଲାନ୍ସ ମାଗିଲା ମନ ଇଛା ଟଙ୍କା, ଝିଅର ମୃତଦେହକୁ ଶେଷରେ ବାପା ନେଲେ ୮୦ କିଲୋମିଟର

ଜୟପୁର: (ବାଘୁଆବାର୍ତ୍ତା): ମରିଗଲା ମାନବିକତା, ଆମ୍ବୁଲାନ୍ସ ମାଗିଲା ମନଇଛା ଟଙ୍କା । ଶେଷରେ ଜଣେ ପିତା ତା’ର ଝିଅର ମୃତଦେହକୁ କାର ସିଟରେ ବାନ୍ଧି ଘରକୁ ଆଣିଥିଲେ । ରାଜସ୍ଥାନର କୋଟାରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି । ଜଣେ ଅଭାଗା ପିତା ନିଜ ଝିଅର ଜୀବନ ବଞ୍ଚାଇବା କୋଟାର ନ୍ୟୁ ମେଡିକାଲ ହସ୍ପିଟାଲ ଆଣିଥିଲେ, କିନ୍ତୁ ଝିଅ ବଞ୍ଚିପାରିଲା ନାହିଁ । ଯାହା ପରେ ଝିଅର ମୃତଦେହକୁ ନେବା ପାଇଁ ପିତାକୁ ଆମ୍ବୁଲାନ୍ସ ମିଳିଲା ନାହିଁ । ହସ୍ପିଟାଲ ବାହାରେ ଥିବା ପ୍ରାଇଭେଟ ଆମ୍ବୁଲାନ୍ସ ଏତେ ଟଙ୍କା ମାଗିଲା ଯେ ଝିଅର ବାପାଙ୍କ ପକ୍ଷେ ଦେବା ଏହା ସମ୍ଭବ ନଥିଲା । ଫଳରେ ଅସହାୟ ବାପା ଆଉ କିଛି ଉପାୟ ନପାଇ ଶେଷରେ କାର ସିଟରେ ଝିଅର ମୃତଦେହକୁ ବାନ୍ଧି ୮୦ କିଲୋମିଟର ଦୂର ଝାଲାବାଡ ସ୍ଥିତ ନିଜ ଘରକୁ ନେଇଥିଲେ । ଥରେ ଭାବନ୍ତୁ, ସେହି ପିତା ପାଇଁ ୮୦ କିଲୋମିଟରର ଯାତ୍ରା କେମିତି କଟିଥିôବ? ବାସ୍ତବରେ ଏହା ଏକ ହୃଦୟ ବିଦାରକ ଘଟଣା । କିଛି ଦିନ ତଳେ ୩୪ ବର୍ଷୀୟ ସୀମାଙ୍କର ଚିକିତ୍ସା କରାଇବା ପାଇଁ ପରିବାର ଲୋକେ ଝାଲବାଡରୁ କୋଟା ଆଣିଥିଲେ । ସୀମାଙ୍କୁ ନ୍ୟୁ ମେଡିକାଲ କଲେଜ ହସ୍ପିଟାଲ ଆଡମିଟ କରାଯାଇଥିଲା, କିନ୍ତୁ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ଯାହା ପରେ ପରିବାର ଲୋକଙ୍କ ପାଇଁ ମୃତଦେହକୁ ଝାଲାୱା ନେବାକୁ ମନସ୍ଥ କଲେ । କିନ୍ତୁ କଷ୍ଟ ସେତେବେଳେ ହୋଇଥିଲା, ଯେତେବେଳେ ମର୍ଚୁରୀରୁ ସୀମାଙ୍କର ମୃତଦେହକୁ ହସ୍ପିଟାଲ ବାହାରକୁ ଆଣିବା ପାଇଁ କେହି ୱାର୍ଡ ବୟ ମଧ୍ୟ ମିଳିନଥିଲେ । ଖୋଦ ପରିବାର ଲୋକେ ହିଁ ସୀମାଙ୍କର ମୃତଦେହକୁ ମର୍ଚୁରୀରୁ ବାହାରକୁ ଆଣିଥିଲେ । ସୀମାଙ୍କର ପରିବାର ଲୋକେ ହସ୍ପିଟାଲ ବାହାରେ ଥିବା ଆମ୍ବୁଲାନ୍ସକୁ ମୃତଦେହ ନେବା ପାଇଁ କହିଥିଲେ, କିନ୍ତୁ ଆମ୍ବୁଲାନ୍ସ ସେମାନଙ୍କଠାରୁ ୨୦ରୁ୩୫ହଜାର ଟଙ୍କା ଦାବି କରିଥିଲେ । ଯାହାକି ପରିବାର ପକ୍ଷେ ଏତେ ଟଙ୍କା ଦେବାକୁ ଅସମର୍ଥ ଥିଲା । ଏଥିପାଇଁ ସୀମାଙ୍କର ପିତା ଝିଅର ମୃତଦେହକୁ ନିଜ କାର ସିଟରେ ବାନ୍ଧିଥିଲେ ଏବଂ ଝାଲୱାର ଯାଏ ଆଣିଥିଲେ । ମୃତଦେହକୁ ଏଭଳି ଆଣିବା କୋଭିଡ ପ୍ରୋଟୋକଲର ଉଲ୍ଲଘଂନ ଅଟେ । କିନ୍ତୁ ଉପାୟ ମଧ୍ୟ କିଛି ନାହିଁ । ହସ୍ପିଟାଲ ପାଖରେ ମୃତଦେହକୁ ଘର ପର୍ଯ୍ୟନ୍ତ ପହଞ୍ଚାଇବା ପାଇଁ ଅଲଗା ଆମ୍ବୁଲାନ୍ସର ବନ୍ଦୋବସ୍ଥ ନାହିଁ ଏବଂ ପ୍ରାଇଭେଟ ଆମ୍ବୁଲାନ୍ସ ମଧ୍ୟ ଏଭଳି ଜରୁରୀ ପରିସ୍ଥିତିରେ ଅଧିକ ପଇସା କମାଇବା ଅପେକ୍ଷାରେ ଥାନ୍ତି । ସେମାନେ ଅସହାୟ ଲୋକଙ୍କଠାରୁ ଦୁଃଖି ପରିବାରଙ୍କଠାରୁ ମନଇଛା ପ୍ରାପ୍ୟ ମାଗୁଛନ୍ତି । ଯେହେତୁ ଲୋକଙ୍କ ପାଖରେ ସେତେ ପଇସା ନଥାଏ, ସେଥିପାଇଁ ସେମାନଙ୍କୁ ଏଭଳି ବନ୍ଦୋବସ୍ତ କରିବାକୁ ପଡିଥାଏ । ଏଭଳି ପରିସ୍ଥିତିରେ ମିଡିଆରେ ଖବର ପ୍ରସାରିତ ହେବା ପରେ ହିଁ ପ୍ରଶାସନର ଚେତା ପଶିଥାଏ । ଆମ୍ବୁଲାନ୍ସ ଅଧିକ ପଇସା ମାଗିବାରୁ ଜଣେ ପିତା ତା’ର ଝିଅର ମୃତଦେହକୁ କାର ସିଟରେ ବାନ୍ଧିକି ଆରିବା ମାମଲା ରେ କୋଟାର ଡିଏମ କହିଛନ୍ତି ଯେ ସେମାନେ ତଦନ୍ତ କରୁଛନ୍ତି, ଘରୋଇ ଆମ୍ବୁଲାନ୍ସ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେ କହିଛନ୍ତି ଯେ ‘ଅଭିଯୋଗକାରୀ ସ୍ପଷ୍ଟ ଭାବରେ କେତେ ଟଙ୍କା, କେଉଁ ବ୍ୟକ୍ତି ଏବଂ ଗାଡ଼ି ନମ୍ବର କହିପାରୁନାହାନ୍ତି । ଏଭଳି ପରିସ୍ଥିତିରେ ଅଭିଯୁକ୍ତକୁ ଧରିବା କଷ୍ଟକର କିନ୍ତୁ ତଥାପି ଆମେ ଅନୁସନ୍ଧାନ କରିବୁ । ବର୍ତ୍ତମାନ ମ୍ୟୁନିସିପାଲିଟି କର୍ପୋରେସନ ଏଇଏନ କପିଲ ଏବଂ ଆରଟିଓ ସବ ଇନ୍ସପେକ୍ଟର ସତ୍ୟବୀର ସିଂଙ୍କୁ ନିଲମ୍ବିତ କରାଯାଇଛି । ଏଥି ସହିତ ଦୁଇଜଣ ଚୁକ୍ତିଭିତ୍ତିକ କର୍ମଚାରୀଙ୍କ ସେବା ବନ୍ଦ କରି ଦିଆଯାଇଛି । ଏକା ସାଙ୍ଗରେ ଅଧିକ ଟଙ୍କା ମାଗୁଥିôବା ଅଜଣା ଆମ୍ବୁଲାନ୍ସ କର୍ମଚାରୀଙ୍କ ବିରୋଧରେ ଏକ ଏଫଆଇଆର ଦାୟର କରାଯାଇଛି । ଏହି ଏଫଆଇଆର ମହାବୀର ନଗର ପୁଲିସ ଷ୍ଟେସନରେ କରାଯାଇଛି ଏବଂ ଦୁଇଟି ଆମ୍ବୁଲାନ୍ସ ମଧ୍ୟ ଜବତ କରାଯାଇଛି ।