ନୂଆଦିଲ୍ଲୀ (ବାଘୁଆବାର୍ତ୍ତା): ଭାରତ ସରକାରଙ୍କ ବିରୋଧରେ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହେଲା ହ୍ୱାଟସଆପ । ବୁଧବାର ଠାରୁ ସରକାର ଜାରି କରିଥିବା ନିୟମାବଳୀକୁ କାର୍ଯ୍ୟକାରୀ ନକରିବାକୁ ହ୍ୱାଟସପଆପ ଦାବି କରିଛି । ନୂତନ ନିୟମ ଅନୁଯାୟୀ ସରକାର ଫେସବୁକ ମାଲିକାନା କମ୍ପାନୀକୁ ଗୋପନୀୟତା ନିୟମରୁ ଓହରିଯିବାକୁ କହିଛନ୍ତି । ସରକାରଙ୍କ ନୂତନ ନିୟମ ମଧ୍ୟରୁ ଗୋଟିଏ ଭାରତର ସମ୍ବିଧାନ ଅନୁଯାୟୀ ଦିଆଯାଇଥିବା ଗୋପନୀୟତା ଅଧିକାର ଉଲ୍ଲଘଂନ ବୋଲି ହ୍ୱାଟସଆପ କହିଛି । ଏହି ଆଇନ ଅନୁଯାୟୀ, କେବଳ ମିଥ୍ୟା ସୂଚନା ବାଣ୍ଟିଥିବା ଅଭିଯୁକ୍ତଙ୍କୁ ହ୍ୱାଟସଆପ ଚିହ୍ନଟ କରିବାକୁ ପଡିବ । ହ୍ୱାଟସଆପ ଏହା କରିପାରିବ ନାହିଁ ବୋଲି କହିଛି । ହ୍ୱାଟସଆପ ଅନୁଯାୟୀ ଏହାର ମେସେଜ ଏଣ୍ଡ-ଟୁ-ଏଣ୍ଡ ଏନକ୍ରିପ୍ଟେଡ ହୋଇଛି । ନୂତନ ନିୟମ ପାଳନ କରିବାକୁ ହେଲେ ମେସେଜ ପାଇଥିବା ଏବଂ ସର୍ବ ପ୍ରଥମେ ମେସେଜ ପଠାଇଥିବା ବ୍ୟକ୍ତିଙ୍କ ପାଇଁ ଏନକ୍ରିପଶନ ବ୍ରେକ କରିବାକୁ ପଡିବ । ହ୍ୱାଟସଆପ ମୁଖପାତ୍ର ମଧ୍ୟ ଏହି ପ୍ରସଙ୍ଗରେ ମନ୍ତବ୍ୟ ଦେବାକୁ ମନା କରି ଦେଇଛନ୍ତି । ତେବେ ଏହି ମାମଲା ଫେସବୁକ, ଟ୍ୱିଟର ସମେତ ଅନ୍ୟ ସୋସିଆଲ ମିଡିଆ କମ୍ପାନୀ ସହ ଭାରତ ସରକାରଙ୍କ ଜାରି ବିବାଦକୁ ଆହୁରି ବଢ଼ାଇପାରେ । ଗତ ସପ୍ତାହରେ କଂଗ୍ରେସ ଏବଂ ବିଜେପି ମଧ୍ୟରେ ଟୁଲକିଟ ବିବାଦ କାରଣରୁ ଦିଲ୍ଲୀ ପୋଲିସ ଟ୍ୱିଟର କାର୍ଯ୍ୟାଳୟରେ ପହଞ୍ଚିଥିଲା । ହ୍ୱାଟସଆପ ବିଜେପି ମୁଖପାତ୍ର ସମ୍ବିତ ପାତ୍ରଙ୍କ ଏକ ଟ୍ୱିଟରେ ‘ମନିପୁଲେଟିଭ ମିଡିଆ’ ଟ୍ୟାଗ କରିଛି । ଏହାପୂର୍ବରୁ ଭାରତ ସରକାର ଟ୍ୱିଟରକୁ ଅନେକ ଟ୍ୱିଟ ଡିଲିଟ କରିବାକୁ କହିଥିଲେ । କେନ୍ଦ୍ର ସରକାର କହିଛନ୍ତି ଯେ ଏହି ଟୁଇଟ ଗୁଡ଼ିକ କରୋନା ମହାମାରୀ ବିଷୟରେ ବିଭ୍ରାନ୍ତିକର ତଥ୍ୟ ସୂଚନା ପ୍ରଦାନ କରୁଛି । ଏଥିସହ କେନ୍ଦ୍ର ସରକାରଙ୍କୁ ସମାଲୋଚନା କରାଯାଇ ହୋଇଥିବା ଟ୍ୱିଟକୁ ବିଲୋପ କରିଥିବା ମଧ୍ୟ କହିଛନ୍ତି । ହ୍ୱାଟସଆପ ଏହାର ଏଫଏକିୟୁ ପୃଷ୍ଠାରେ ମଧ୍ୟ ଏହି ବିଷୟରେ ସୂଚନା ଦେଇଛି । ତେବେ କୌଣସି ନିର୍ଦ୍ଦିଷ୍ଟ ଦେଶ ବିଷୟରେ ଲୋଖାଯାଇ ନାହିଁ । ହେଲେ ହ୍ୱାଟସଆପ ଏହି ପ୍ରସଙ୍ଗରେ ଭାରତ ସରକାରଙ୍କ ବିରୋଧରେ ମାମଲା ରୁଜୁ କରିଛି । ହ୍ୱାଟସଆପ କହିଛି ଯେ କେତେକ ତାକୁ ‘ଟ୍ରେସିବିଲିଟି’ କରିବାକୁ କହୁଛନ୍ତି । ଟ୍ରେସେବିଲିଟିର ଅର୍ଥ ହେଉଛି ପ୍ରକୃତରେ ଯିଏ ପ୍ରଥମେ ମେସେଜ ପଠାଇଛି ତାହାକୁ ଚିହ୍ନଟ କରିବା ପ୍ରକ୍ରିୟା । ଟ୍ରେସେବିଲିଟି ଏକ ‘ଏଣ୍ଡ-ଟୁ-ଏଣ୍ଡ’ ଏନକ୍ରିପସନ ବ୍ରେକ ସୃଷ୍ଟି କରିଥାଏ ଏବଂ କୋଟିକୋଟି ଲୋକଙ୍କ ଗୋପନୀୟତାକୁ ବିପଦରେ ପକାଇଥାଏ । ହ୍ୱାଟସଆପ ୨୦୧୬ ରେ ‘ଏଣ୍ଡ-ଟୁ-ଏଣ୍ଡ’ ଏନକ୍ରିପସନ ଆରମ୍ଭ କରିଥିଲା ।
ହ୍ୱାଟସଆପ ଗଲା ହାଇକୋର୍ଟ, ନୂଆ ନିୟମ ମାନିଲେ କ୍ଷୁର୍ଣ୍ଣ ହେବ ପ୍ରାଇଭେସି
